Read wanga MATAYO 4 Bible Online

MATAYO 4 - wanga bible

MATAYO 4

¹Mana Roho niyemilila Yesu okhutsia mushitsiimi khulwa okhuteemwa nende Setani.

²Ne olwa yali nahonjile inzala tsinyanga amakhumi kane, eshilo neshiteere, inzala yamuluma.

³Kho Setani niyetsa khuye namuboolela ari, “Noba noli Omwana wa Nyasaye, laka amachina kano mbu kekhole emikaate.”

⁴Nebutswa Yesu yamukalusia ari, “Kahandikwa mbu, ‘omundu shialabetsanga mwoyo khulwa okhulia omukaate kwonyene ta, habula khulwa buli likhuwa elirula mumunwa kwa Nyasaye.’ ”

⁵Mana Setani namuyila mwitookho litakatifu, namusinjisia khubutenje obwa Ihekalu.

⁶Namuboolela ari, “Noba noli Omwana wa Nyasaye, ruuma okwe hasi, shichila kahandikwa mbu: ‘Nyasaye alalachilisia abamalaikabe khwiwe, bakhuchinje mumakhono kabwe, kho mbu oleshe okhukwa hasi nosaalila omubilikwo.’ ”

⁷Yesu namuboolela ari, “Khandi kahandikwa mbu: ‘Shiolamuteema OMWAMI Nyasayewo tawe.’ ”

⁸Mana khandi Setani namuyila khushikulu eshiraambi muno, namumanyia oburuchi bwosi bwokhushialo, nende oluyali lwabwo lwosi.

⁹Ne namuboolela ari, “Bino biosi ndalakhuhelesia noba nokwa mumakulu kanje niunzinamila.”

¹⁰Mana Yesu namuboolela ari, “Rulakhwo otsie, Setani! Kahandikwa mbu, ‘Winamilenje OMWAMI Nyasayewo, nomukhalabanila ye yenyene.’ ”

¹¹Kho Setani namulekha, ne abamalaika nibetsa nibakhalabanila Yesu.

¹²Olwa Yesu yahulila mbu Yohana ali mumbohe, yamala atsie Galilaya.

¹³Shiyamenya Nazareti ta, habula yatsia Kaperinaumu litaala elili ahambi nende inyanza ya Galilaya, mumbali etsia Zebuluni nende etsia Nafutali, namenya ebweneyo.

¹⁴Yakhola ako kho mbu akomulakusi Isaya yaboola koosibwe habwene mbu,

¹⁵“Inywe abeshialo shia Zebuluni nende eshia Nafutali, inywe abokhunjila eyihenjile khunyanza, injelekha womwalo kwa Yorodani, Iwe Galilaya, eshialo eshiabamahanga!

¹⁶Abandu abamenya mushiilima balalola obulafu obukhongo. Nabo abamenya mushialo eshieshilima shielifwa, obulafu bulabaashila.”

¹⁷Ne okhurula olwene olwo, Yesu yachaka okhuyaala naboola ari, “Mwikalukhasie nimulekha obwonooni bwenywe, okhuba Obwami bwa Nyasaye busitile ahambi!”

¹⁸Olwa Yesu yali nachendanga khuluchinga lweinyanza ya Galilaya, yalola abanaabi babili, Simoni owalangwa mbu Petero, nende Andereya omwana wabwe nibanaabanga tsinyeni nolukhanda munyanza.

¹⁹Yesu nababoolela ari, “Mwitse munoondekhwo, nasi ndalamukhola okhuba abanaabi babandu.”

²⁰Habwene nahabwene, nibalekha tsikhanda tsiabwe nibamuloondakhwo.

²¹Olwa Yesu yatsiakhwo hambeli hatiiti yalola khandi abasiani babili, Yakobo nende Yohana, abaana ba Zebedayo. Boosi bali muliaro liabwe halala nende Zebedayo sabwe, nibarechekhanga tsikhanda tsiabwe. Yesu nabalanga mbu bamulondekhwo,

²²ne mubwangu obwo nibarula muliaro nibalekhamwo sabwe, nibalonda khu Yesu.

²³Yesu yatsia buli habundu mu Galilaya, niyechesinjia mutsisinagogi, nayaalanga Amakhuwa Amalayi aka Obwami bwa Nyasaye, nende okhuhonia abandu abobuteshele nende obulwale bwetsimbia tsiosi.

²⁴Ifumaye yatswana mushialo shia Siria shiosi. Abandu nibamureerera abalwale abali nobutsuunwi nende obuteshele bwahukhane; abebishieno abeindulume, nende abafwokoya, naye nabahonia.

²⁵Emikanda emikhongo chiamuloondakhwo okhurula Galilaya, Dekapoli, Yerusalemu, Ebuyahudi nende mutsingongo etsili injelekha womwalo kwa Yorodani.