Read wanga MATAYO 5 Bible Online

MATAYO 5 - wanga bible

MATAYO 5

¹Ne olwa Yesu yalola emikanda yatikulukha khushikulu, niyekhala hasi. Abeechibe nibetsa khuye.

²Naye nachaaka okhubeechesia naboola ari.

³“Nabeikhabi abamanani mumioyo, okhuba obwami bwa Nyasaye nobwabwe!

⁴Nabeikhabi abali neshibeela, okhuba Nyasaye alabalemia emioyo!

⁵Nabeikhabi abaholo, okhuba balanyoola aka Nyasaye yabasuubisia khushialo!

⁶Nabeikhabi abali neinzala khandi abalibwa obuloho bwokhukhola akokhwenya khwa Nyasaye, okhuba Nyasaye alabekusia!

⁷Nabeikhabi abali netsimbabasi, okhuba balanyoola tsimbabasi!

⁸Nabeikhabi abemioyo emieleleshe, okhuba balalola Nyasaye!

⁹Nabeikhabi abareeranga omulembe, okhuba balalangwa mbu, abaana ba Nyasaye!

¹⁰Nabeikhabi abasandibwa khulwa okhukhola akokhwenya khwa Nyasaye, okhuba obwami bwa Nyasaye nobwabwe!

¹¹“Muli neikhabi inywe abanyekwa nimusandibwa nende okhuchikhwa amakhuwa koosi amabi shichila mbu muli abaloondi banje.

¹²Mwikhoye nimusangaala, okhuba mwabishilwa omukabo omukhongo mwikulu. Shinga olwa bamusandinjia inywe bario, nolwa abalakusi abamuranjilila basandibwa bario.

¹³“Inywe muli shinga omunyu kweshialo. Ne omunyu nikuba nikutsinziba, eshiuya shiakwo shinyala okhukalusibwamwo shirie? Shikukaasila eshindu shiosi shiosi khandi ta, habula kusukunwa elwanyi, nende okhusenelwa hasi nabandu.

¹⁴“Inywe muli shinga obulafu bweshialo. Litookho eliombakhwa khushikulu shilinyala okhulekha okhulolekha tawe.

¹⁵Kata abandu shibahafinjia itaha nibachifunishila munyungu ta, habula bachirenjekhanga khushichibi shiayo niyibakhosilia abali munzu boosi.

¹⁶Kho obulafu bwenywe bwashenje burio imbeli wabandu, kho mbu balole ebikhole bienywe ebilayi, nibamuhelesia senywe ouli mwikulu oluyali.

¹⁷“Mulapaara mbu isie ndetsa okhurusiaho amalako ka Musa nende amechesio kabalakusi ta, shindayetsa okhukarusiaho ta, habula okhukaralisia.

¹⁸Okhuba emuboolela toto mbu, kata likulu nende eshialo nibiakhahwaho, yibulaho kata inyukuta ndala, kata akharonyelesi khalala khumalako, akhalibula okhuusibwa, okhuula koosi koosibwe.

¹⁹Khulweshio, omundu yesi yesi oufunaka lilako, kata niliba litutu mukoosi, ne niyechesia abandi okhulifunaka, omwenoyo yakhabe omututu mubwami bwa Nyasaye. Nebutswa omundu yesi yesi oukakhola, niyechesia abandu bandi okhukatiila yakhabe omukhongo mubwami bwa Nyasaye.

²⁰Niko akachila nemuboolela mbu, obwisiikwa bwenywe nibulashila obwa abeechesia abamalako nende Abafarisayo ta, shimwakhenjilekhwo mubwami bwa Nyasaye kata nahatuutu tawe.

²¹“Mwahulila shinga olwa abandu khale baboolelwa bari, ‘Shiolera omundu ta, omundu yesi owiira owashie, okhuula akhalachilwe eshiina.’

²²Nebutswa isie emuboolela bulano mbu; yesi yesi ousinyishila owashie, alakhalachilwa eshiina, naye ounyeka owashie naboola ari, ‘Oli omusilu iwe,’ alareerwa mushiina, ne yesi yesi ounyeka owashie ari, ‘Oli eshiyingwa,’ yakhabe mumatinyu akokhusukunwa mumulilo okulasimanga tawe.

²³Kho noba noli ahambi okhuhaana eshihaanwashio khu Nyasaye khu eshimalilo eshiemisango, ne niwitsulila mbu, owashio ali nelikhuwa libi khwiwe,

²⁴lekha butswa eshihaanwashio eshio hashimalilo shiemisango, mana otsie bwangu khuwashio oyo, mukaasie ninaye omulembe, kho okalushe ohaane eshihaanwashio khu Nyasaye.

²⁵“Okaasie omulembe bwangu nende oukhwinjilila itookho nimushili okhuula mushiina, yakhetsukhana yakhuhaana mumakhono komukhalachi weshiina, naye omuyaasi nakhuhaana mumakhono komusikari, ne nosukunwa mumbohe.

²⁶Ekhuboolela toto mbu, shiolarulamwo ta, okhuula lwolaba nomalile okhurunga isende yene eyihelelesia khu akokhalachiilwe.

²⁷“Mwahulila shinga olwa kaboolwa mbu, ‘Shiolaheyanga ta!’

²⁸Nasi bulano emuboolela mbu, yesi yesi ouhenga khumukhasi namwikoomba, amalile okhuheya ninaye mumwoyokwe.

²⁹Kho imoniyo eyokhumukhono omusaatsa niyikhwinjisia mubwonooni, ochitsomole, mana ochisukune ehale, shichila bwakhaba obulayi okhukosia shilala khubiungobio bimubilikwo, okhushila omubilikwo kwosi okusukunwa mumulilo kulasimanga tawe.

³⁰Ne omukhonokwo omusaatsa nikuba nikuchila winjile mubwonooni, okureme, mana okusukune ehale, shichila bwakhaba obulayi shilala khubiungo biomubilikwo shitibe, okhushila omubilikwo kwosi okhusukunwa mumulilo okulasimanga tawe.

³¹“Mwahulila khandi akaboolwa mbu, ‘Omusaatsa yesi yesi oulekhana nomukhasiwe, okhuula amuhelesie ibarwa yokhulekhana.’

³²Nebutswa isie emuboolela mbu, omusaatsa yesi yesi oulekhana nomukhasiwe, nikalali khulwa eshifune shiobuheyi ta, akhola omukhasi oyo okhuba omuheyi; naye outeeshia omukhasi tsana oyo yesi khandi aba omuheyi.

³³“Khandi mwahulila shinga olwa abandu bakhale baboolelwa mbu, ‘Shiolachweyakhwo okhuusia aka wetsuba okhukhola ta, habula okhuula okhole aka wetsuba okhukholela OMWAMI Nyasaye.’

³⁴Nebutswa isie emuboolela mbu, shimuletsubakhwo okhukhola eshindu shiosi shiosi kata nahatutu ta, shimuletsubakhwo nimurumbula likulu ta, okhuba nilio eshifumbi shioburuchi shia Nyasaye.

³⁵Kata shimuletsubakhwo nimurumbula eshialo ta, okhuba nishio eshialambisinjiakhwo ebilenjebie, kata khulwa Yerusalemu ta, okhuba nilio litookho liomuruchi omukhongo.

³⁶Khandi shioletsubakhwo khulwa omurwekwo ta, okhuba shionyala okhukalukhasia kata elala khwiswilio liaba lietsimbutsi noho okhubula tsimbutsi tawe.

³⁷Noboola mbu, ‘efuchilile’, kabe butswa kario, ne noboola mbu, ‘Tawe,’ khandi kabe butswa kario. Elindi liosi liosi eliomeetakhwo okhushila ako, lirula khu Omwonooni oyo.

³⁸“Khandi mwahulila mbu kaboolwa mbu, ‘Imoni khumoni, ne eliino khuliino.’

³⁹Nebutswa isie emuboolela mbu, shiolarungakhwo omundu omumayanu eshikwoli tawe. Habula omundu nakhupaama olukhofi khuluseya olwa khumukhono musaatsa, omushiukhasilie oluseya lundi khandi akhupaame.

⁴⁰Ne kata omundu nakhwinjilila itookho, kho mbu abukule lishatilio, muleshele abukule kata likotilio.

⁴¹Ne omundu nakhuluunyia okhuchinga omusiikokwe khulwoluchendo oluhela ikilomita ndala, okuchinje khulwa tsikilomita tsibili.

⁴²Omundu nakhusaba eshindu shiosi shiosi omuhelesie, naye owenya okhwihola khwiwe eshindu, omuhosie.

⁴³“Mwahulila mbu kaboolwa mbu, ‘Oheele owashio, ne nosila omusukuwo.’

⁴⁴Nebutswa isie emuboolela mbu, muheele abasuku benywe khandi musaayile abo abamusandia,

⁴⁵kho mana mube abaana ba Seenywe ouli mwikulu. Okhuba ye akholanga eliubalie okhwashila abamayanu nende abalunjishi, khandi akholanga ifula okhukwiila abalunjishi nende abalali abalunjishi tawe.

⁴⁶Okhuba nimuba nimuheela abamuheela inywe bonyene, muli nomukabo shiina? Kata abasololi bobushuru bosi bakholanga akenako!

⁴⁷Khandi nimuba nimushiesania abeene kubeene butswa, kho mubashilila shiina abandi? Abamahanga bosi bakholanga akenako!

⁴⁸Khulweshio, mukhoyile okhuba abalamba, shinga olwa Senywe ouli mwikulu yesi ali omulamba.”