Read wanga MATAYO 6 Bible Online

MATAYO 6 - wanga bible

MATAYO 6

¹“Mwichendelesie, mwitsukhana mwakhola ebikhole bienywe biobulunjishi imbeli wabandu kho mbu bamulole, nimukhola murio, mulachweya okhunyoola omurungo okhurula khu Senywe ouli mwikulu.

²“Khulweshio, lwokhola aketsimbabasi, shioleyitsiala nende okhwiyitsoomia shinga olwa abekaati bakholanga mutsisinagogi nende khumihanda kho mbu, abandu babetsoomie tawe. Emuboolela toto mbu, bamala okhunyoola omurungo kwabwe.

³Nawe lwokhola aketsimbabasi, shiolafuchililakhwo omukhonokwo mukhasi okhumanya eshiomukhonokwo musaatsa kukhola tawe.

⁴Haana obukhoonyibwo mabiswi, naye Papawo oulolanga akomumabiswi alakhurunga. .

⁵“Ne olwa musaaya, mulakholekhwo shinga olwa abekaati abo bakholanga tawe! Bo baheela okhusaaya nibasinjiile mutsisinagogi nende khumasanganjila, kho mbu abandu babalole. Emuboolela toto mwene mbu, bamala okhunyoola omurungo kwabwe.

⁶Nawe lwosaaya, winjile mushisikashio eshiomukari, wikaleho omuliango, mana osaaye khu Papawo oulalolekhanga ta, naye Papawo oulolanga akamabiswi, alakhuhelesia omurungo.

⁷“Khandi, olwa musaaya, mulelakalakaniekhwo butswa shinga olwa Abamahanga bakholanga ta, shichila bo bapaaranga mbu, Nyasaye alabahulila khulwa amakhuwa kabwe amanji.

⁸Nebutswa inywe shimulabeekhwo shinga bo ta, okhuba Senywe amanyile aka mutakha kata nimushili okhumusaba.

⁹Khulweshio, olwa musaaya, muboolenje muri, ‘Seefwe ouli mwikulu, eliiralio liriibwe.

¹⁰Obwamibwo bwitse; aka wenya kekhole mushialo shinga olwa kekholanga mwikulu.

¹¹Okhuhelesie ebiokhulia biefwe bia leelo.

¹²Okhuleshele obwonooni bwefwe, shinga olwa ifwe khubaleshelanga abakhwonoonela.

¹³Shiolakhuyila mukhuteemwa ta, nebutswa okhuhonie okhurula khu Omumayanu oyo.’[2]

¹⁴ “Okhuba nimuba nimubeela abandu obwonooni bwabwe, Senywe womwikulu alamubeela mwesi khandi.

¹⁵Ne nimuba nimulabeela abandu ta, kata Senywe shialamubeelakhwo obwonooni bwenywe tawe.

¹⁶“Khandi olwa mwiyima eshiokhulia khulwokhusaaya, mulakhuunia mumoni shinga olwa abekaati bakholanga ta, okhuba babiyinjia mumoni kho mbu, abandu balole mbu beyimile eshiokhulia khulwokhusaaya. Emuboolela toto mbu, bamala okhunyoola omurungo kwabwe.

¹⁷Nebutswa iwe olwa wiyima eshiokhulia khulwokhusaaya, obashe liswilio amafura, niwiyosia mumoni,

¹⁸kho mbu, abandu baleshe okhumanya mbu oli neinzala tawe. Habula kamanyishe butswa khu Papawo oulalolekhaga ta, naye oulolanga akakholwa mumabiswi alakhurunga.

¹⁹“Shimulebunjishila abeene amabishilo khushialo khuno, okhwa amatsilili nende tsindebelende bisasinjia, khandi okhwa abefi bafunakanga nibeba tawe.

²⁰Nebutswa mwibishile amabishilo mwikulu, omwa amatsilili kata tsindebelende bilanyala okhusasia, kata abefi okhufunaka nibeba tawe.

²¹Okhuba aha libishilolio lili, niho ahomwoyokwo kwakhabe.

²²“Imoni yili shinga itaha yomubili. Kho imoniyo niyiba niyili yinamu, omubilikwo kwosi kuletsulamwo obulafu.

²³Nebutswa imoniyo niyiba niyilali yinamu ta, omubilikwo kwosi kuletsulamwo eshilima. Ne obulafu obuli mwiwe nibuba nibuli eshilima, kho eshilima eshio neshikhongo muno!

²⁴“Abulaho ounyala okhukhalabanila abaami babili, okhuba alasila mulala khubo, ne naheela oundi, noho alafuchilila mulala, ne nachaaya oundi. Shimunyala okhukhalabanila Nyasaye khandi mukhalabanile emiandu tawe.

²⁵“Khulweshio emuboolela mbu, mulahendela akobulamu bwenywe, mbu namulie shi? Khandi mbu namunywe shi? Kata akemibili chienywe mbu, namufwale shi? Tawe. Obulamu shibushila ebiokhulia? Nakwo omubili shikushila ebifwalo?

²⁶Lolele khumanyonyi akokhwikulu, shikarakanga kata okhuchesa kata okhubiikha mubiachi ta, nebutswa Senywe ouli mwikulu akalisinjia. Nenyu shimushila muno amanyonyi ako?

²⁷Niwiina khwinywe, khulwa okhuhenda omwoyo muno, ounyala okhumeeta kata inyanga ndala khutsinyanga tsiobulamubwe?

²⁸“Kho mbushiina nimuhendela ebifwalo? Lolele khu amatanye[3] akomubulimo shinga olwa kakhulanga. Shikakholanga emilimo, kata okhwifwala ebifwalo ta,

²⁹nebutswa emuboolela toto mbu, kata omuruchi Solomoni neing'oonoye yosi shiyafwalakhwo obulayi shinga elala khuko tawe.

³⁰Kho Nyasaye niyakhafwala obunyasi bwomubulimo ebifwalo ebilayi ario, obuliho bulano, ne mukamba busukunwa mumulilo, shialamufwala inywe okhushila? Inywe muli nobusuubili butiiti!

³¹“Khulweshio mulahenda omwoyo nimwireeba mbu; ‘Nakhulie shiina?’ Khandi mbu ‘Nakhunywe shiina?’ Kata mbu ‘Nakhwifwale shiina?’ Tawe.

³²Okhuba ebio nibio ebihendinjia abamahanga, abalamumanyile Nyasaye ta, nebutswa Senywe ouli mwikulu amanyile shinga olwa mukhoyile okhuba nebindu ebio biosi.

³³Nebutswa ranjilile mukhaabe Obwami obwa Nyasaye nende akobulunjishibwe; naye alamuhelesia ebindi ebio biosi.

³⁴Kho mulahendela aka mukamba tawe; okhuba inyanga ya mukamba yilahendela akayo eyeene. Amatinyu keinyanga ndala kamuhelile khulwa inyanga eyo.”