Read wanga MATAYO 7 Bible Online

MATAYO 7 - wanga bible

MATAYO 7

¹“Shimulakhalachile abashienywe eshiina ta, nenywe mwesi khandi shimukhalachilwa eshiina tawe.

²Okhuba Nyasaye alamukhalachila inywe eshiina munjila ndala, eyamukhalachilamwo abashienywe, khandi alekhoonyela amalako malala tsana akamwikhoonyela khubashienywe.

³Nishiina eshichila nolola akhakokha akhali mumoni yowashio, ne nolanyala okhulola eshirundu eshili mumoniyo ta?

⁴Kata wakhaboolela orie owashio mbu, ‘Lekha ekhuyinie akhakokha akhali mumoniyo,’ olwa nawe oli neshirundu mumoniyo?

⁵Iwe omwikaati! Ranjilila oyinie eshirundu eshili mumoniyo, kho mana olole obulayi lwoyinia akhakokha akhali mumoni yowashio.

⁶“Shimulahelesiakhwo tsimbwa ebindu ebitakatifu ta.Khandi shimulafuubilakhwo tsimbiitsi tsilulu tsienywe ta, tsiakhetsukhana tsiatsisenachilila butswa nebilenje biatsio, ne nitsikalukha okhumuseera inywe.

⁷“Sabe Nyasaye, naye alamuhelesia, khaabe, ne mulanyoola; khong'onde, naye Nyasaye alamwikulilaho.

⁸Okhuba buli omundu ousaba, alaheebwa, ne oukhaba, alanyoola; naye oukhong'onda omuliango, alekulilwa.

⁹Kata niwiina khwinywe womwanawe amusaba omukaate, naye namuhelesia lichina?

¹⁰Noho namusaba inyeeni, naye namuhelesia inzokha?

¹¹Kho inywe kata nimuli abamayanu murio, mumanyile okhuhelesia abaana benywe ebindu ebilayi; kho toto mwene Senywe ouli mwikulu alahelesia abo abamusaba ebindu ebilayi muno!

¹²“Kho mukholelenje abashienywe amalayi aka mwesi mwakhekomba mbu boosi bamukholele inywe. Shino nishio eshisina shiamalako ka Musa nende amechesio kabalakusi.

¹³“Mwinjilile mumuliango omunyelele. Shichila omuliango okwinjila mumulilo nomubambalifu khandi omuhanda kwokhutsiamwo nomubambalifu, ne abaloondakhwo nabanji.

¹⁴Nebutswa omuliango okwinjila mubulamu bwobumeli neshinyelele, khandi omuhanda kwokhutsiayo nomunyelele; ne abaloondakhwo nibatiiti.

¹⁵“Mwilinde okhurula khubalakusi bobubeeyi abamwitsila, elwanyi bali shinga amakondi, nebutswa mukari bali shinga ebisutse ebihalaba.

¹⁶Mulabamanya khulwa ebikhole biabwe. Abandu bakhanokakhwo tsinzabibu okhurula khubisisia? Kata amakhuyu okhurula khumarakalu?

¹⁷Khulweshio, omusaala omulayi kwamanga ebiamo ebilayi; nebutswa omusaala omubi, kwamanga ebiamo ebibi.

¹⁸Omusaala omulayi shikunyala okhwama ebiamo ebibi ta, nakwo omusaala omubi shikunyala okhwama ebiamo ebilayi tawe.

¹⁹Buli omusaala okulaama ebiamo ebilayi ta, kularemwa, nikusukunwa mumulilo.

²⁰Khulweshio mulamanya abalakusi bobubeeyi khulwebikhole biabwe.

²¹“Shikali mbu, buli mundu ounanga naboola ari, ‘Omwami, Omwami’ niye oulinjila mubwami obwa Nyasaye tawe; habula oyo oukholanga akokhwenya khwa Papa ouli Mwikulu.

²²Khundukho yokhukhalachilwa eshiina abanji bakhareebe bari, ‘Omwami, Omwami, shikhwayaala muliiralio, kata shikhwarusia ebishieno muliiralio, khandi shikhwakhola akamakana amanji muliiralio?’

²³Nilwo olwa nasi siesi ndilibaboolela habulafu endi, ‘Shindamumanyakhwo ta, muurulekhwo inywe abandu abamayanu!’

²⁴“Kho buli mundu ouhulila amakhuwa kanje nende okhukakhola, ali shinga omundu omuchesi owombakha inzuye khulwanda.

²⁵Ifula yinyinji yakwa, emikhula nichibira, imbumbuyeka niyihutsa, nibiikhupa khunzu eyo; nebutswa inzu tsana shiyakwa hasi ta, okhuba omuse kwayo kwasimikhwa khulwanda.

²⁶Ne buli mundu ouhulila amakhuwa kanje kano, ne nalakakhola ta, ali shinga omuyingwa, owombakha inzuye khumuyeshe,

²⁷ne olwa ifula yinyinji yakwa, emikhula nichibira, imbumbuyeka niyihutsa, nibikhupa inzu eyo, nayo niyikwa hasi. Ne okhukwa khwayo nikhuba okhukhongo khwokhuhuchisia.”

²⁸Mana olwa Yesu yamala okhuboola amakhuwa ako, abemikanda bahuchisibwa muno nende amechesioke,

²⁹okhuba shiyabeechesia shinga abeechesia bandi bamalako bechesinjia ta, habula yabeechesia nobunyali.