Read wanga MATAYO 8 Bible Online

MATAYO 8 - wanga bible

MATAYO 8

¹Ne olwa Yesu yali nakholomooshe okhurula khushikulu, emikanda emikhongo chiamulondakhwo.

²Ne lola, omundu wobuchele yamwitsila nasikama hasi namwinamila, naboola mbu; “Omwami, noba nochama onyala okhusiiya.”

³Naye Yesu nanyiila omukhonokwe namutiilakhwo ne naboola ari, “Enjamile, siiyikha.” Habwene nahabwene obuchele nibuhwa, naye nasiyiikha.

⁴Mana Yesu namukaania naboola ari, “Hulila, olaboolelakhwo omundu yesi yesi likhuwa tawe. Ne otsie wilolesie imbeli womwisaaliisi, afuchilile okhusiiywakhwo, nawe ohaane eshihaanwa eshia Musa yalaka, shibe obuloli bwokhuhonakhwo khubo.”

⁵Ne olwa Yesu yenjila mwitookho lia Kaperinaumu, omusesia Omuroma yamwitsila namusaaya naboola ari,

⁶“Omwami, omukhalabani wanje ali ingo akonile mushitali, ne afwokoye mana atsunungwa obululu.”

⁷Yesu namuboolela ari, “Nenzitse okhumuhonia.”

⁸Omusesia oyo nakalusia namuboolela ari, “Omwami, iwe shiokhoyile okhwinjila munzu yanje ta, nebutswa laka butswa likhuwa, ne omukhalabani wanje alahona.

⁹Shichila nasi siesi endi omundu ouli hasi woburuchi, khandi endi nende abelihe abali hasi wanje; nindaka mulala khubo mbu; ‘Tsia,’ natsia. Ne nimboolela oundi mbu, ‘Yitsa’ niyetsa, kata nende omusumba mbu, ‘Khola lino,’ ne alikhola.”

¹⁰Ne olwa Yesu yahulilakhwo ario yahuka; mana naboolela abali nibalondananga ninaye ari, “Emuboolela toto mbu, eshili okhunyoolakhwo omundu mu Isiraeli owobusuubili shinga buno tawe.

¹¹Khandi emuboolela mbu, abanji bakharule ebukwe nende mumbo nibekhala halala nende Aburahamu, Isaka nende Yakobo, mubwami bwa Nyasaye.

¹²Nebutswa beene obwami balisukunwa elwanyi mushiilima aha bakhalilile nibalumasia ameeno mubutsunwi.”

¹³Mana Yesu naboolela omusesia oyo ari, “Tsia ingowo, ne kalekholekha shinga lwosuubiile.” Ne omukhalabaniwe nahona khushise shieneshio.

¹⁴Ne olwa Yesu yenjila munzu mwa Petero, yalola nyakhufialanyene Petero nakonile, nalwala omurengo.

¹⁵Yesu namutiila omukhonokwe ne nahona omurengo okwo, naye nabuukha nachaaka okhumukhalabanila.

¹⁶Khubwile eliuba niliakhayeela, abandu bareerera Yesu abali nende ebishieno boosi, naye nalaka ebishieno ebio okhubarulamwo. Mana nahonia boosi abali abalwale.

¹⁷Kano kekholekha khulwa okhuusia akomulakusi Isaya yaboola mbu; “Ye omwene yebukulila obulwale bwefwe mana niyetuukha obuteshele bwefwe.”

¹⁸Ne olwa Yesu yalola omukanda nikumubotokhaane, yalaka abeechibe okhutsia injelekha weinyanza.

¹⁹Mana omwechesia wamalako undi namwitsila naboola ari, “Omwechesia, ndalakhulondakhwo hosi hosi aha otsia.”

²⁰Yesu namukalusia naboola ari, “Amabwe kali nende obwina bwako, amanyonyi akokhwikulu nako koosi kali nebitsu biako, nebutswa Omwana womundu shialikhwo nende ahokhuhulushila tawe.”

²¹Ne oundi owokhubechibe namuboolela ari, “Omwami, chama enzie emuyabile papa wanje mbeli.”

²²Nebutswa Yesu yamukalusia naboola ari, “Nondakhwo, lekha abafu bayabilane.”

²³Yesu yenjila muliaro, abeechibe nibamulondakhwo.

²⁴Ne lola imbumbuyeka ingali niyichaaka okhuhutsa munyanza, mana eliaro niliba ahambi okhwiyinikha khulwa amarunda. Naye Yesu yali nakonanga.

²⁵Abeechi nibatsia khuye nibamubuusia nibaboola bari, “Omwami okhuhonie; khuli ahambi okhusikha.”

²⁶Nabareeba ari, “Nishiina eshichila nimuria murio? Inywe muli abobusuubili obututu?” Mana nabuukha, ne nahalabila omuyeka namarunda, mana omulenjeelo omukhongo nikubaho.

²⁷Abandu boosi bahuka, nibaboola bari, “Uno naye nomundu wambia shiina? Okhuba kata omuyeka namarunda bimuhulilanga.”

²⁸Ne olwa Yesu yola injelekha mushialo eshia Abagerasi, yabukaana nende abandu babili abali nebishieno, nibarulanga mubilindwa. Bali abahalaba muno, mbu kata abulaho omundu yesi owabirilanga khunjila eyo tawe.

²⁹Ne lola, bayiiba nibaboola bari, “Okhwenyangakhwo shiina iwe Omwana wa Nyasaye? Witsile okhukhusandia indukho niyishili?”

³⁰Ne lialiho lituuli lietsimbitsi tsinyinji nitsiayanga ahambi ninabo.

³¹Ebishieno ebio nibimusaaya Yesu nibiboola biri, “Noba nokhurusia, okhurume khutsie mwituuli lietsimbitsi etsio.”

³²Ne Yesu nabiboolela ari, “Tsie.” Nabio nibirula nibitsia mumbitsi etsio, ne lola, lituuli lietsimbitsi elo niliminina nilikholomokha munyanza nilisishilamwo liosi pe.

³³Abaayi betsimbitsi etsio belukha nibatsia mwitookho, nibaboola amakhuwa koosi akali nikekholeshe khubebishieno.

³⁴Ne lola, abomwitookho elio boosi nibarula okhwakanila Yesu, ne olwa bamulola, bamusaaya mbu arule mulukongo lwabwe olwo.