Read wanga MATAYO 9 Bible Online

MATAYO 9 - wanga bible

MATAYO 9

¹Yesu yenjila muliaro niyambukha niyoola mwitaala liewabwe elia Kaperinaumu.

²Ne lola abandu bamureerera omundu owafwokoya, niyalisibwe khushitali. Ne olwa Yesu yalola shinga olwa bali nobusuubili obunji yaboolela owafwokoya oyo ari, “Mwana wanje, tinya omwoyo, olesheelwe obwonoonibwo.”

³Ne abandi khubeechesia bamalako nibaboolelana abeene khu beene bari, “Omundu uno yechelasinjia khu Nyasaye, Nyasaye yenyene niye ounyala okhuleshela abandu obwonooni.”

⁴Mana Yesu namanya amapaaro kabwe, naboola ari, “Nishiina eshichila nimupaara amakhuwa amabi mumioyo chienywe murio?

⁵Okhuba eliangu nelilena, okhuboola mbu, ‘Oleshelwe obwonoonibwo,’ noho okhuboola mbu, ‘Bukha ochende?’

⁶Kho ndalamumanyia mbu, Omwana womundu ali nobunyali mushialo okhuleshela abandu obwonooni.” Kho naboolela owafwokoya oyo ari, “Bukha, wituushe eshitalishio otsie ingowo.”

⁷Omundu oyo nabuukha natsia ingowe.

⁸Ne olwa abemikanda balolakhwo amakhuwa ako baria, nibamwitsoomia Nyasaye ouhaananga obunyali shinga obwo khubandu.

⁹Ne olwa Yesu yali narulileyo, ne nabiranga, yalola omundu oweliira mbu, Matayo, niyekhaale aha basololelanga obushuru, namuboolela ari, “Unondekhwo.” Naye nasinjila namulondakhwo.

¹⁰Olwa Yesu yali nalitsanga munzu mwa Matayo, abasololi bobushuuru abanji nende abonooni bandi nende abeechi ba Yesu, bekhala nibalia ninaye.

¹¹Kho olwa Abafarisayo bandi balola, bareeba abeechibe abo bari, “Mbushiina Omwami wenywe nalitsanga nende abonooni?”

¹²Yesu yahulila akababoola ne nabakalusia ari, “Abandu abalamu shibakhaabanga omusilishi ta, habula abalwale nibo abakhaabanga omusilishi.

¹³Tsie mumanyilisie eshisina eshia Amahandiko akaboolanga mbu; ‘Enzenyanga abalolesinjia tsimbabasi, tawe abakholelanga isie emisango.’ Shichila shindayetsa okhulanga abalunjishi ta, habula abonooni.”

¹⁴Mana Abeechi ba Yohana omubatiisi nibetsa khu Yesu nibamureeba bari, “Mbushiina ifwe nende Abafarisayo nikhwiyimanga ebiokhulia khulwa okhusaaya, ne abeechibo nibalakhola bario tawe?”

¹⁵Yesu nakalusia mbu, “Abacheni beshiselelo bakhanyala barie okhubeelela olwa mwene eshiselelo ashili ninabo? Nebutswa tsinyanga tsiakhoole lwomwene eshiselelo yakhabe nayinibwe khubo, kho nilwo olwa bakheyime ebiokhulia.

¹⁶“Abulaho ounabanga ingubo yikhulu niyekhoonyela eshilaka eshiyia ta, shichila eshilaka eshiyia shilekhuuna mana nishimeete okhurandula ingubo eyo.

¹⁷Kata abandu shibatsukhanga idivai indoro mumifuko chiamaseelo amakhulu ta, shichila emifuko echio chilarundukha, ne idivai niyisundukha, ne emifuko echio nichionekha. Habula idivai indoro yitsukhungwa mumifuko emiyia mana biosi nibiba habwene.”

¹⁸Olwa Yesu yali nashiboolanga amakhuwa ako, omukhulundu undi owa Abayahudi yamwitsila, nasikama imbeliwe, naboola ari, “Omwana wanje omukhaana wakhafwa; nebutswa yitsa omurekhwo amakhono kho mbu abe omulamu.”

¹⁹Kho Yesu narula namuloondakhwo halala nabeechibe.

²⁰Omukhasi undi owali niyerulutsanga emiyika ekhumi nachibili, yetsa emukongo wa Yesu, mana natiila khundulo weingubo ya Yesu.

²¹Naboola mumwoyokwe ari; “Nindakhatiilakhwo butswa khunguboye ndalahona.”

²²Yesu nashiukhana namulola naboola ari, “Tinya omwoyo Omukhaana wanje, obusuubilibwo bukhuhoniye.” Habwene nahabwene omukhasi oyo nahonibwa.

²³Mana niyenjila munzu mwa Yairo. Ne olwa yalola abakhupi bebisiliba biamasika nende abali nibekhuulanga,

²⁴yababoolela ari, “Rule elwanyi mwesi! Omukhaana shiafwile tawe, akonanga butswa tsindoolo!” Nabo nibamutseshelela butswa.

²⁵Ne olwa abomukanda bali nibarusibwe elwanyi, Yesu yenjila mushikoro shiomukhaana oyo, namutiila omukhono, mana omukhaana oyo nabuukha.

²⁶Amakhuwa ako nikatswana mushialo eshio shiosi.

²⁷Yesu yarula habundu yaho, ne olwa yali nabiranga, ababofu babili bachaaka okhumulondakhwo. Nibalanjilisia bari, “Khubele tsimbabasi Omwana wa Daudi!”

²⁸Ne olwa Yesu yenjila munzu, ababofu babili abo bamwitsila, naye nabareeba ari, “Musuubila mbu enyala okhumuhonia?” Nibamukalusia bari, “khusuubile, Omwami.”

²⁹Mana Yesu natiila khutsimoni tsiabwe naboola ari, “Kakholeshe kario shinga olwa musuubile!”

³⁰Mana tsimoni tsiabwe nitsitimbusibwa. Yesu nabalaka obutinyu ari, “Mulaboolelakhwo omundu yesi yesi kano tawe!”

³¹Nabo nibarula nibatswania ifumaye mushialo eshio shiosi.

³²Ne olwa abandu, bali nibarulanga, Yesu yarereelwa omundu owali niyahanda olulimi, shichila yali neshishieno.

³³Olwa eshishieno shiali nishirusibwe, omundu oyo yachaaka okhuboola; abemikanda nibahuka nibaboola bari, “Khushili okhulolakhwo kano mu Isiraeli tawe.”

³⁴Nebutswa Abafarisayo baboola bari, “Arusinjia ebishieno khulwa obunyali bwomwami webishieno.”

³⁵Yesu yabotokhana mumatookho koosi nende mutsingongo tsiabwe tsiosi, niyechesinjia mutsisinagogi tsiabwe, nayaalanga Amakhuwa Amalayi aka Obwami bwa Nyasaye, nahoninjia abobuteshele bwetsimbia tsiosi nende obulwale.

³⁶Olwa yalola abemikanda yabatililwa tsimbabasi, shichila bali nibahumbutsananga, khandi nibabula omulindi shinga amakondi akabula omwayi.

³⁷Mana naboolela abeechibe ari, “Lichesa nelikhongo, nebutswa abakholi nabatiiti.

³⁸Kho musaaye Omwami, omwene lichesa mbu, arume abakholi mwichesalie.”