Read wanga MARIKO 1 Bible Online

MARIKO 1 - wanga bible

MARIKO 1

¹Obuchachilo obwa Injiili ya Yesu Kristo, Omwana wa Nyasaye.[1]

²Kahandikwa mushitabu shiomulakusi[2] Isaya mbu, “Nyasaye aboola ari, ‘Lola, eruma omurumwa wanje imbeliwo, owakhakasie injilayo.’

³Omwoyo kulanjilisinjia mushitsiimi kuri, ‘Kasie omuhanda okwa Omwami, khandi mukololosie tsinjilatsie.’ ”

⁴Yohana Omubatiisi nalolekha[3] mushitsiimi nabatiisinjia nende okhuyaalila abandu mbu bekalukhasie nibalekha obwonooni bwabwe.

⁵Abandu boosi beshialo eshia Yuda nende aba Yerusalemu, batsia khuye nibabatiisibwa mumwalo kwa Yorodani, nibeyamanga obwonooni bwabwe.

⁶Ne Yohana yefwalanga tsingubo tsiobwoya bweingamia, khandi yali niyeboha mushishienjeshie olukhoba lweliselo. Ne ebiokhuliabie bialinji tsisiche nende obuushi bwomubulimo.

⁷Khandi yayaala naboola ari, “Oushila nobunyali yetsanga munyuma mwanje. Kata shingwanile okhwinama hasi mbu emboholole tsikhoba tsiebilaarobie tawe.

⁸Emubatiisia namaatsi, naye namubatiisie nende Roho Omutakatifu.”

⁹Mutsinyanga etsio, Yesu yarula Nazareti mulukongo lwa Galilaya, naye Yohana namubatiisia mumwalo kwa Yorodani.

¹⁰Mana Yesu narula mumaatsi, ne habwene na habwene nalola likulu nilikuushe, naye Roho Omutakatifu niyekhanga khuye nafwana shinga lihusi.

¹¹Mana omwoyo nikurula mwikulu nikuboola kuri, “Iwe niwe Omwana wanje omuheelwa. Enjamisibungwa ninawe muno.” .

¹²Mubwangu bwene obwo, Roho Omutakatifu yamwimilila okhutsia mushitsiimi.

¹³Mana naba mushitsiimi tsinyanga amakhumi kane, Setani namuteemanga. Khandi yalimwo netsisolo nabulimo, nebutswa abamalaika bamukhalabanilanga.

¹⁴Ne olunyuma lwokhutiilwa khwa Yohana Omubatiisi, Yesu yatsia Galilaya nayaalanga Amakhuwa Amalayi ka Nyasaye,

¹⁵naboola ari, “Bulano ebise bimalile okhuula, nabwo Obwami bwa Nyasaye busitile ahambi. Mwikalukhasie nimusuubila amakhuwa amalayi kano.”

¹⁶Kho olwa Yesu yali nachendanga khulukuku lweinyanza ya Galilaya, yalola abanaabi betsinyeni babili, Simoni nende omusiani wabwe oulangwa mbu, Andereya, nibafubanga tsikhanda tsiabwe munyanza, shichila bali abanaabi betsinyeni.

¹⁷Mana Yesu nababoolela ari, “Munondekhwo, nasi ndalamukhola okhuba abanaabi babandu.”

¹⁸Habwene nahabwene, balekha tsikhanda tsiabwe mana nibamulondakhwo.

¹⁹Ne olwa Yesu yatsiakhwo hambeli hatiiti, yalola Yakobo omwana wa Zebedayo nende Yohana omusiani wabwe, nibali muliaro nibakasinjia tsikhanda tsiabwe.

²⁰Olwa Yesu yabalola, yabalanga mbu bamulondekhwo, ne nibalekha Zebedayo sabwe nende abakholi babwe, ne nibamulondakhwo.

²¹Kho Yesu nende abeechibe nibatsia nibenjila mwitaala lia Kaperinaumu. Mana khunyanga eya Isabato, niyenjila mu Sinagogi ne nachaaka okhwechesia.

²²Ne olwa abandu bahulila obwibaalibwe bahuka muno, okhuba yabeechesia shinga ouli nobunyali, nalabeechesia shinga abahandichi bamalako bechesinjia tawe.

²³Omundu owali nebishieno yenjila mu Sinagogi eyo, ne nayiiba obutinyu ari,

²⁴“Eshia okhwenyangakhwo nishiina iwe Yesu Omunazareti? Okhetsile okhukhumulula ifwe noho? Khukhumanyile iwe, okhuba oli Omurumwa Omutakatifu wa Nyasaye!”

²⁵Nebutswa Yesu yahalabila eshishieno eshio nashilaka ari, “Holeela tsi! Khandi orule mumundu uno!”

²⁶Eshishieno eshio nishimupabasia, nishiayula nomwoyo omukhongo mana nishimurulamwo.

²⁷Kho abalimwo boosi nibang'ang'aala, nibareebana abeene khu beene bari, “Kano kakhali makhuwa shina? Buno bukhali obwechesia obuyiakha noho? Okhuba omundu uno ali nobunyali bwokhukondeshela ebishieno nabio nibimuhulila.”

²⁸Mana ifumaye niyitswana mulukongo lwa Galilaya nende ebikwenyi tsirondokhaneho.

²⁹Ne olwa barula musinagogi, Yesu nende abeechibe nibali halala nende Yakobo nende Yohana, benjila munzu yabwe Simoni nende Andereya.

³⁰Ne nyakhufialanyene Simoni oweshikhasi yali nakonile mushitali nalwala omurengo. Ne olwa Yesu yenjila munzu, bamuboolela akobulwale bwa nyakhufialanyene Simoni oyo.

³¹Mana Yesu niyetsa natiila omulwale oyo omukhono namubusia, mana nahona lwangu lwene olwo. Mana nyakhufialanyene Simoni tsana oyo nabakasilia ebiokhulia.

³²Khubwile bweinyanga eyo, eliuba niliakhayeela, abandu bareerera Yesu abandu abali nibalwala boosi, kata abali nebishieno.

³³Abandu bomwitookho elo bali nibakhung'anile boosi imbeli weinzu.

³⁴Naye Yesu nahonia abanji abali nibalwala obulwale bwetsimbia tsiahukhane nende okhurusia ebishieno ebinji. Ne shiyahelesiakhwo ebishieno obwiyangu bwokhuboola ta, okhuba biali nibiamumanya.

³⁵Inyanga yaloondakhwo, mumabwibwi eshialo nibushili okhushia, Yesu yabuukha natsia mushitsiimi yenyene. Ne nali ebweneyo yasaaya.

³⁶Ne Simoni nende abashie batsia okhumukhaaba.

³⁷Ne olwa bamunyoola, bamuboolela bari, “Buli mundu akhukhaabanga.”

³⁸Naye Yesu nabakalusia ari, “Leshe khutsie mumatookho kandi, mbu mana eyaalekhwo ebweneyo khandi, shichila ako niko akachila nenzitsa.”

³⁹Mana Yesu natsia niyenjila mu tsisinagogi mulukongo lwa Galilaya nayaala nende okhurusia ebishieno.

⁴⁰Khandi omundu undi owali nobuchele yetsa khu Yesu, nasikama hasi imbeliwe naboola ari; “Noba nochama usiiye embone.”

⁴¹Khulwa tsimbabasi tsinyinji,[4] Yesu yanyiila omukhonokwe namutiilakhwo, ne naboola ari, “Efuchiliile, osiiyishe.”

⁴²Mana habwene nahabwene obuchele nibuhwa, naye owobuchele oyo nasiiyikha.

⁴³Kho Yesu namulachilisia obutinyu, namuseebula bwangu,

⁴⁴ne namuboolela ari, “Hulila, shiolaboolelakhwo omundu yesi yesi amakhuwa kano tawe. Habula tsia wilolesie khumwisaaliisi afuchilile okhusiiyikhakhwo. Nawe ohaanile Nyasaye eshihaanwa eshia Musa yalaka mbu yesi yesi ousiiyikha ahaaneneje, shibe eshilolelo khubandu boosi mbu toto osiiyishe.”[5]

⁴⁵Nebutswa omundu oyo yarulaho natsia elwanyi ne nachaaka okhutswania buli habundu aka Yesu yali namukholeele. Yatswania amakhuwa kano habulafu, nikachila nibuba obutinyu khu Yesu okhwinjila mwitookho habulafu. Habula yekhala butswa elwanyi welitookho yenyene, ne kata kario abandu betsa khuye okhurula mumbeka tsiosi.