Read wanga MARIKO 10 Bible Online

MARIKO 10 - wanga bible

MARIKO 10

¹Kho olwa Yesu yarulaho yatsia mungongo tsia Yuda nende injelekha womwalo kwa Yorodani. Mana abemikanda nibakhung'a ewa yali, ne nabeechesia, shinga olwa yakholanga buli lwosi.

²Mana Abafarisayo nibamulondakhwo. Ne khulwa okhumuteema bamureeba bari, “Lilako lifuchilila omusaatsa okhulekhana nomukhasiwe noho?”

³Yesu nabakalusia nabareeba ari, “Nishiina eshia Musa yamulaka okhukhola?”

⁴Nabo nibamukalusia bari, “Musa yafuchilila omusaatsa okhuhandichila omukhasiwe ibarwa yokhulekhana ninaye nende okhumuloonda.”

⁵Ne Yesu nababoolela ari, “Khulwa obuumilanu bwemioyo chienywe, kachila Musa yamuhandichila inywe lilako elo.

⁶Nebutswa okhurula khukhuchaaka khweshialo, ‘Nyasaye yabalonga, omusaatsa nende omukhasi.’

⁷‘Kho khulwa eshifune eshio, omusaatsa okhuula alalekhanga samwana nende nyina, mana ahambana nomukhasiwe,

⁸nabo boosi babili balabetsanga omubili mulala.’ Kho shibashili babili khandi tawe, habula nomubili mulala.

⁹Khulweshio, aba Nyasaye aliimaasiye halala, omundu namundu alabakabukhasinjia tawe.”

¹⁰Ne olwa bali nibali munzu, abeechi bamureeba khandi khwikhuwa elo.

¹¹Naye nababoolela ari, “Omusaatsa yesi yesi oulekhana nomukhawe ne nateeshia omukhasi undi, akhola obuheyi namwonoonela omukhasiwe.

¹²Kata omukhasi naba niyelukha nalekhana nomusaatsawe ne nateeshela omusaatsa undi, omukhasi oyo yesi khandi akhola obuheyi.”

¹³Ne abandu bandi bali nibareeranga abaana abatiiti khu Yesu mbu abarekhwo amakhono. Ne abeechibe nibabahalabila.

¹⁴Nebutswa olwa Yesu yalola ario, yasinyikha, nababoolela ari, “Leshe abaana abatiiti betse khwisie, shimulabekalila ta, okhuba Obwami bwa Nyasaye nobwa abandu shinga abaana bano.

¹⁵Emuboolela toto mbu, omundu yesi yesi oulenjisia Obwami bwa Nyasaye shinga omwana omutiiti ta, shialinjilakhwomwo kata nahatuutu tawe.”

¹⁶Mana nababukula, nabarakhwo emikhonochie ne nabasabila ikhabi. .

¹⁷Ne olwa Yesu yachaaka okhutsia, omusaatsa undi yetsa tsimbilo nasikama imbeliwe ne namureeba ari, “Omwechesia Omulayi, nishiina eshiekhoyile okhukhola kho mbu enaamilwe obulamu bweinziayo?”

¹⁸Naye Yesu namureeba ari, “Nishiina eshichila niwunanga mbu, omulayi? Abulaho omundu omulayi ta, habula Nyasaye yenyene.

¹⁹Iwe omanyile amalako akaboolanga mbu, ‘Shioleranga omundu ta; Shiolaheyanga ta, Shioleebanga ta, Shiolachikhanga owashio ta, Shiolabeeyanga, Ohelesinjie papawo nende mamawo oluyali.’ ”

²⁰Mana omusaatsa oyo namukalusia ari, “Omwechesia, ekholanga ako koosi okhurula mububuukha bwanje.”

²¹Naye Yesu namuhenga, namyheela, ne namuboolela ari, “Oshileemanga eshindu shilala, tsia okusie ebioli ninabio biosi, ohelesie abamanani, mana witse unondekhwo, ne olaba nelibishilo mwikulu.”

²²Ne Olwa omusaatsa oyo yahulila amakhuwa ako, yakhuunia obwenibwe, ne narulaho natsia nasinyiishe muno, shichila yali nobuyinda obunji.

²³Kho Yesu nahenga eyi nende eyi, ne naboolela abeechibe ari, “Bwakhabe obutinyu muno khubali nobuyinda okhwinjila Mubwami bwa Nyasaye!”

²⁴Mana abeechibe nibahuchisibwa namakhuwake, nebutswa Yesu yababoolela khandi ari, “Abaana banje, nobutinyu muno okhwinjila Mubwami bwa Nyasaye!

²⁵Nobiangu muno ingamia okhubira munduhu yeyisindani, okhushila omundu omuyinda okhwinjila Mubwami bwa Nyasaye.”

²⁶Mana abeechibe nibahuchisibwa muno, ne nibamureeba bari, “Kho ounyala okhuhonibwa niwiina?”

²⁷Yesu nabahenga, ne nababoolela ari, “Khubandu shikanyalikha ta, nebutswa khu Nyasaye, kanyalikha, shichila amakhuwa koosi kanyalikhanga khu Nyasaye.”

²⁸Petero nachaaka okhuboolela Yesu ari, “Lola, khwalekha biosi nikhukhulondakhwo.”

²⁹Yesu nababoolela ari, “Emuboolela toto mbu, abulaho omundu yesi yesi owalekha inzu, noho abasiani babwe, noho abakhaana babwe, noho nyina, noho samwana, noho abaana, noho emikunda khulwanje khandi kulwa Injiili,

³⁰owakhachweye okhunyoola ebindu bino, tsinzu, nende abasiani babwe, nabakhana babwe, nabanyina, nabaana, nemikunda, akhandi eshikhumi shilala mutsinyanga tsino, halala nende okhusandibwa tawe. Ne khandi mutsinyanga tsiolunyuma, yakhanyoole obulamu bweinziayo.

³¹Nebutswa abeimbeli abanji bakhabe abeinyuma, nabo abeinyuma bakhabe abeimbeli.”

³²Yesu nende abeechibe bali khumuhanda nibatikulukhanga okhutsia Yerusalemu. Ne Yesu yali niyemiile nali imbeli wabwe. Mana abeechibe nibang'ang'aala. Abali nibamulondakhwo nibaria. Ne nabukula abeechi ekhumi nababili, yachaaka khandi okhubaboolela akali niketsa okhwikholekha khuye.

³³Naboola ari, “Lole, khutsitsanga Yerusalemu. Ne Omwana womundu alahaanwa khubakhulundu babesaaliisi nende khu abahandichi bamalako. Nabo balamukhalachila eshiina shiokhufwa, nibamuhaana khubandu aba Amahanga.

³⁴Nabo Abamahanga balamutseshelela, nibamunyilikhakhwo amare, nibamunywekha tsikhoba, nende okhumwiira. Ne olunyuma lwetsinyanga tsitaru, alalamukha okhurula mubafu.”

³⁵Mana Yakobo nende Yohana, abaana ba Zebedayo, basita ahambi nende Yesu, nibamuboolela bari, “Omwechesia, khwenya mbu okhukholele liosi liosi elia khukhusaba.”

³⁶Yesu nabareeba ari, “Nelilena elia mwenya mbu emukholele inywe?”

³⁷Nabo nibamukalusia bari, “Okhufuchilile mbu khwikhale, mulala khumukhonokwo omusaatsa, ne oundi khumukhonokwo omukhasi, muluyalilwo.”

³⁸Nebutswa Yesu yabakalusia ari, “Shimumanyile elia musabanga tawe. Mana inywe munyala okhunywa eshikombe eshia isie nditsa okhunywa, noho okhubatiisibwa shinga olwa isie ndabaatiisibwa?”

³⁹Nabo nibamukalusia bari, “Khunyala.” Naye Yesu nababoolela ari, “Eshikombe eshia isie enywa, mulanywakhwo, khandi mulabatiisibwa shinga olwa isie ndabatiisibwa.

⁴⁰Nebutswa akokhwikhala khumukhono kwanje omusaatsa noho khumukhono kwanje omukhasi, shikali akanje isie okhuhaana ta, habula Nyasaye niye owakhakahaane khubayarecheshela obwikhalo obwo.”

⁴¹Ne olwa abeechi ekhumi abo bahulilakhwo, bachaaka okhusinyishila Yakobo nende Yohana.

⁴²Kho Yesu nabalanga boosi mbu betse ewa yali, nababoolela ari, “Mumanyile mbu abakhoyile okhuruka Abamahanga, barukanga nibabasitohela, ne abakhongo babwe abo babamanyisinjia mbu, bali nobunyali khubo.

⁴³Ne shikakhabekhwo kario mwinywe ta,

⁴⁴habula owenya okhuba omukhongo mwinywe, okhuula abe omukhalabani waboosi.

⁴⁵Okhuba Omwana womundu shiyayetsa okhukhalabanilwa ta, nebutswa yetsa okhukhalabana nende okhuhaana obulamubwe okhuba omurungo khulwa obununulwi bwabandu abanji.”

⁴⁶Mana nibetsa Yeriko. Ne olwa Yesu yali narulangayo, nali nabeechibe nende omukanda kwabandu omukhongo. Ne omwana wa Timayo owalangwa mbu, Batimayo, omubofu wasabasabanga, yali niyekhaale khundulo womuhanda.

⁴⁷Ne olwa yahulila mbu ni Yesu wa Nazareti, owali nabiranga aha yali, yachaaka okhuyiiba nalanjilisia ari, “Yesu! Omwana wa Daudi! Umbeele tsimbabasi!”

⁴⁸Ne abandu abanji khubo bamuhalabila, nibamuboolela mbu aholeele. Naye nameeta okhulanjilisia okhushilakhwo naboola ari, “Omwana wa Daudi, umbeele tsimbabasi!”

⁴⁹Mana Yesu niyema, ne naboola ari, “Mulanje yetse.” Nibalanga omubofu oyo, nibamuboolela bari, “Yuma ikholo, sinjila, Yesu akhulanganga.”

⁵⁰Kho nasukuna inguboye eyo ne naruuka niyetsa wa Yesu yali.

⁵¹Naye Yesu namureeba ari, “Nishiina eshia wenya mbu ekhukholele?” Ne omubofu oyo namukalusia ari, “Omwami, ekhusaaya mbu, ukhoonye enyalilwe okhulola.”

⁵²Yesu namuboolela ari, “Tsia. Obusuubilibwo bukhuhoniye.” Mana habwene nahabwene omubofu oyo nachaaka okhulola ne nalonda khu Yesu.