Read wanga MARIKO 11 Bible Online

MARIKO 11 - wanga bible

MARIKO 11

¹Ne olwa Yesu nabeechibe bali nibali ahambi okhuula Yerusalemu, boola khumataala ka Betsefage nende Betsania, khushikulu shia Miseituni. Yesu naruma babili abokhubechibe,

²nababoolela ari, “Mutsie mwitaala elihengaane ninenywe. Ne olwa mwinjilamwo butswa, mulanyola eshimoosi shieisishili nishiboyilwe, eshiomundu alashianinakhokhwo tawe. Mushiboholole, mana mushireere hano.

³Ne omundu yesi yesi namureeba mbu mukholanga murio mbushiina, mumuboolele mbu, Omwami yenyile okhushiikhoonyela ne, alashikalusia hano bwangu.”

⁴Kho nibatsia nibanyoola eshimoosi shieisishili nishiboyilwe elwanyi mushilibwa, khunjila yomwitookho elo, ne nibashiboholola.

⁵Ne abali nibasinjiileho nibabareba bari, “Kho mukhakholanga shiina, mbohololanga eshimoosi shieisishili?”

⁶Ne nibababoolela shinga olwa Yesu yali nababooleele. Mana nibalekha abandu abo ne nibatsia.

⁷Nabo abeechi nibareerera Yesu eshimoosi shieisishili eshio, ne nibara ebifwalo biabwe khumukongo kwashio, naye Yesu niyekhalakhwo.

⁸Khandi abandu abanji baala tsingubo tsiabwe khunjila, ne abandi nibaala amasafu aka bali nibaremile okhurula mumikunda.

⁹Nabo abamwimilila, nende abamuloondakhwo boosi bachinga olukhu nibalanjilisia nomwoyo omukhongo bari, “Hosana[9], noweikhabi owitsa muliira elia Omwami!

¹⁰Buli neikhabi Obwami bwa kuuka wefwe Daudi, obitsanga! Hosana ikulu mwikulu!”

¹¹Mana Yesu niyenjila mu Yerusalemu, natsia muhekalu. Ne olwa yali nahenjile tsimbeka tsiosi khubindu bialimwo biosi, yarula elwanyi welitookho lia Yerusalemu, natsia Betsania halala nende abeechibe ekhumi nababili. Okhuba eshialo bwali nibwilile.

¹²Khunyanga yalondakhwo, olwa bali nibarulanga Betsania, Yesu yali nali inzala.

¹³Ne nalola omukhuyu ehale nikuli namasafu amanji. Yatsia okhulola nikakhaba mbu, eshiamo shiosi shiosi shilikhwo. Ne olwa yoola ewa kwali, shiyanyoolakhwo eshindu shiosi shiosi ta, habula amasafu konyene, shichila shitsiali tsinyanga tsiamakhuyu okhwama tawe.

¹⁴Yesu nakutsuba naboola ari, “Omundu yesi yesi shiyakhaliekhwo khandi ebiamo khwiwe okhurula olwaleelo tawe.” Mana abeechibe nibahulila amakhuwa ako.

¹⁵Mana nibetsa Yerusalemu. Naye Yesu niyenjila muhekalu,[10] ne nibachaaka okhulonda abali nibakusinjia nende okhukula ebindu muhekalu boosi. Khandi nafuumamia tsimesa tsiabandu abafunjinjia amapesa, nende ebifumbi biabandu abali nibakusinjia amakuuku.

¹⁶Khandi shiyafuchilila omundu yesi yesi okhubira muhekalu nachinjile eshindu tawe.

¹⁷Mana niyechesia abandu, nende okhubareeba ari, “Shikahandikwa mumahandiko mbu, ‘Inzu yanje yakhalangwe mbu inzu yokhwinamilamwo Nyasaye, eya amahanga koosi,’ ta? Nebutswa inywe muchikholile okhuba imbinga yabanuuli!”

¹⁸Kho abesaaliisi abakhulundu nabahandichi bamalako, nibahulila, ne nibakhaaba shinga olwa banyala okhumwira. Bali nibamuria, shichila abomukanda boosi bahuchisibwa nende omeebaaloke.

¹⁹Khubwile, Yesu nende abeechibe barula mwitookho elo.

²⁰Kho mumabwibwi olwa bali nibabirangaho, balola omukhuyu okwo nikunialile okhuula khumisi chiakwo.

²¹Mana Petero niyetsulila ne naboolela Yesu ari, “Omwami, lola! Omukhuyu kwawalaamile eshilaamo shiobubi kunialile!”

²²Mana Yesu nakalusia nababoolela ari, “Mube nobusuubili mu Nyasaye.

²³Emuboolela toto mbu, omundu yesi yesi oulaboolela eshikulu shino mbu, rula hano, okwe munyanza, nalakanakania mumwoyokwe ta, ne asuubile mbu aka aboola ketsa okhwikholekha, alakholelwa ario.

²⁴Khulweshio emuboolela mbu, shiosi shiosi eshiamusaba, mumasaayo, suubile mbu mumalile okhushinyoola, ne shilaba eshienywe.

²⁵Ne buli olwa musinjila okhusaaya, muleshelane nimuba nimuli nelikhuwa khumundu yesi yesi. Naye Senywe ouli mwikulu yesi khandi alamuleshela obumayanu bwenywe.” [

²⁶“Nebutswa nimuba nimulabaleshela abashienywe ta, Senywe ouli mwikulu shialamuleshela inywe obumayanu bwenywe tawe.”]

²⁷Mana Yesu nende abeechibe, khandi nibatsia Yerusalemu. Ne olwa Yesu yali nachendanga muhekalu, babesaaliisi abakhulundu nabahandichi bamalako, nende abakofu betsa ewa yali.

²⁸Kho nibamureeba bari, “Nobunyali shiina obwokholelanga ebindu bino, noho owakhuhelesia obunyali buno okhukhola bino niwiina?”

²⁹Naye Yesu nabakalusia ari, “Leshe ebareebekhwo lireebo, mungalusie, kho mbu emuboolele obunyali bwekholelanga ebindu bino mbu ni bwa wina.

³⁰Ngalusie, Obubatiisi bwa Yohana bwarula mwikulu noho mubandu?”

³¹Kho nibayingana abeene khu beene bari, “Nikhuboola mbu, ‘Bwarula mwikulu.’ Alakhureeba mbu, ‘Kho ni shiina eshichila nimulasuubila Yohana ta?’

³²Ne nikhukhaboole mbu, ‘Bwarula mubandu noho’ (Ne bali nibariire abandu tsana, shichila abandu boosi bali nibafuchilila mbu Yohana nomulakusi wa toto).

³³Kho nibakalusia Yesu bari, ‘Shikhumanyile tawe.’ Mana Yesu shiyabareeba obunyali bwakholelanga ebindu bino tawe.”