Read wanga MARIKO 12 Bible Online

MARIKO 12 - wanga bible

MARIKO 12

¹Mana Yesu nachaaka okhubeechesia mutsinjelo naboola ari, “Omundu undi yaraaka emitsabibu mumukunda, nasira olukaka okhubotokhana omukunda okwo. Khandi nayaba obwina bwokhutiinyilamwo emitsabibu, niyombakha omunaara kwabalindi, nahosia omukunda okwo khubalimi ne natsia mushialo shindi.

²Ne olwa tsinyanga tsiokhuchesa tsiola, yaruma omukholi undi khubalimi abo, mbu bamuhelesiekhwo khubiamo biemitsabibu.

³Ne abalimi abo nibamutiila, nibamukhupa, nibamulonda nakalukhayo eshikhaya nibalamuhelesiyekhwo eshindu shiosi tawe.

⁴Khandi nabarumila omukhabaniwe undi. Omwenoyo naye nibamwara tsinguma, nibamukholela akeshifimbwa murwe.

⁵Mwene mukunda naruma omukholiwe undi, oyo naye nibamwira. Khandi bakholela abakhalabani bandi abanji akafwana kario. Banywekha abandi ne nibera abandi.

⁶Yali nashili nende oundi mulala owokhuruma. Omwenoyo yali omwanawe omuheelwa muno. Mukhumalilikha yamuruma khubo, ne naboola mumwoyokwe ari, ‘Balahelesia Omwana wanje oluyali.’

⁷Nebutswa abalimi abo baboolelana abeene khu beene bari, ‘Uno niye mwene bulaame bwomukunda kuno. Kho yitse, chende khumwiire, mana obulaamebwe bulaba obwefwe.’

⁸Kho nibamutiila nende okhumwiira, nibamusukuna elwanyi womukunda kwemitsabibu okwo.

⁹Opaara mbu, omwene mukunda kwemitsabibu okwo alakhola shiina? Aletsa okhwira abalimi abo nende okhuhelesia abandi omukunda okwo.

¹⁰Shimwasomakhwo Amahandiko kano ta? Akaboolanga mbu, ‘Lichina liene liabombashi baloba, liekhola olwanzilo lwomukoona.

¹¹Buno, bwali obukholi obwa OMWAMI Nyasaye. Ne kano nakokhuhuchisia khwifwe!’ ”

¹²Kho abesaaliisi abakhulundu nibateema okhumuhamba. Ne nibaria abomukanda, shichila bali nibanyile mbu ababooleleele oluchelo olwo okhubafukula. Kho nibamulekha nibatsia.

¹³Abandi khu Abafarisayo nende khu aba Herode barumwa khu Yesu mbu bamureche namarebo.

¹⁴Kho betsa nibamuboolela bari, “Omwechesia, khumanyile mbu oli owobwatoto khandi shiotebanga omundu yesi yesi tawe. Shichila shiohenganga khubukhongo bwomundu yesi yesi ta, habula wechesinjia aka Nyasaye yenya mubwatoto. Lilako likhufuchilila ifwe okhurunga obushuru khumuruchi wa Roma noho tawe?”

¹⁵Khukhoyile okhurunga, noho tawe? Yesu yali namanyile obwikaati bwabwe, ne nabareeba ari, “Mundeemanga mbushiina? Mbelesiekhwo ling'ondo[11] elala endolekhwo.”

¹⁶Mana nibamureerera, naye nabareeba ari, “Obukondo buno, nende akahandikwakhwo kano nebiawina?” Nibamukalusia bari, “Nebia omuruchi wa Roma.”

¹⁷Yesu nabakalusia ari, “Ebili ebia omuruchi wa Roma muhelesie omuruchi wa Roma; ne ebili ebia Nyasaye muhelesie Nyasaye.” Nabo nibahuchisibwa muno namakhuwake.

¹⁸Abasadukayo[12] bandi ababoolanga mbu obulamushi toto bubulaho, betsa ewa Yesu yali nibamureeba bari,

¹⁹“Omwechesia, Musa yakhuhandichila ari, ‘Omundu naba nali nomusiani wabwe, mana omusiani wabwe oyo afwe, ne aleshe omukhasi, nabula omwana, omusiani wabwe oyo okhuula akalusie omukhasi oyo, mana yebule ninaye abaana okhuchinguula eliira liomusiani wabwe omufu oyo.’

²⁰Baliho abasiani musafu abomunzu ndala, omukhulundu yareera omukhasi, ne nafwa nalalikhwo nomwana tawe.

²¹Omusiani wabwe wakhabili nakalusia omuklhasiwe naye yesi nafwa, nalalekhwo omwana tawe. Khandi omusiani wabwe wakhataru yesi ario.

²²Mana boosi musafu nibalalekhakhwo omwana yesi yesi tawe. Olunyuma, omukhasi oyo yesi khandi nafwa.

²³Kho khunyanga yobulamushi, omukhasi oyo yakhabe owa wina khubandu musafu abo, shichila yali omukhasi owa boosi musafu?”

²⁴Yesu nabareeba ari, “Shikali nikano akachilanga nimukorwa, mbu obulamanya Amahandiko nende obulamanya obunyali bwa Nyasaye shinga olwa buli ta?

²⁵Okhuba olwa abafu balamukha, shibateeshia noho kata okhuteeshibwa tawe. Baba butswa shinga abamalaika bomwikulu.

²⁶Ne okhulondokhana khumakhuwa kabafu shinga olwa balamusibungwa, shimwasoomakhwo mushitabu shia Musa, khumakhuwa akeshitsakha, eshiali nishiakhanga omulilo, nebutswa shishiayitsanga ta? Kahandikwamwo mbu, Nyasaye yaboolela Musa ari, ‘Nisie Nyasaye wa Aburahamu, Nyasaye wa Isaka nende Nyasaye wa Yakobo.’

²⁷Kho shiali Nyasaye wabafu ta, habula owa abandu abaliho mwoyo. Shimuli habwene, kata nahatutu ta!”

²⁸Ne mulala khu abahandichi bamalako niyetsa aha bali. Mana nahulila nibayingananga nende Yesu. Ne olwa yalola mbu Yesu abakalusiye obulayi, yamureeba ari, “Ne lilako shiina eliambeli mu koosi?”

²⁹Yesu nakalusia naboola ari, “Eliambeli ndielino mbu, ‘Inywe Abaisiraeli, hulile, OMWAMI Nyasaye wefwe niye OMWAMI mulala yenyene.

³⁰Ne okhuula omuheelenje OMWAMI Nyasayewo nende omwoyokwo kwosi, nende amapaaroko koosi nende amaaniko koosi.’

³¹Ne eliakhabili ndielino mbu, ‘Okhuula omuheelenje owashio shinga olwa wiheela omwene.’ Libulaho lilako lindi elishila kabili ako tawe.”

³²Omuhandichi wamalako oyo namuboolela ari, “Omwechesia, oli habwene. Toto mwene oboolile mbu, Nyasaye nimulala, ne shialiho oundi ta, habula ye yenyene.

³³Ne okhumuheela Nyasaye nomwoyo kwosi, nende amapaaro koosi, nende amaani koosi, nende okhuheela owashio shinga olwa wiheela omwene, nelikhoongo muno okhushila ebihaanwa biemilukha nende emisango emisambe chiosi.”

³⁴Nolwa Yesu yalola, shinga lwomuhandichi wamalako oyo yakalusia nobuchesi, yamuboolela ari, “Shioli ehale nende Obwami bwa Nyasaye tawe.” Ne okhurula olwo, abulaho owatsaalikha okhumureeba lireebo liosi liosi tawe.

³⁵Ne olwa Yesu yali niyechesinjia muhekalu yareeba abandu ari, “Mbushiina abahandichi abamalako baboolanga mbu, Kristo nomwana wa Daudi?

³⁶Daudi mwene niyemiliilwe nende Roho Omutakatifu, yarumbula ari, ‘OMWAMI Nyasaye yaboolela Omwami wanje ari, yikhala khumukhono kwanje omusaatsa, okhuula olwa ndakhare abasukubo hasi webilenjebio!’

³⁷Daudi omwene amulanganga mbu, Omwami. Kho yakhaba arie Omwana wa Daudi khandi?” Mana omukanda kwabandu omukhongo nibamurecheresia nobusaangaali.

³⁸Ne mukhwechesiakhwe, Yesu nababoolela ari, “Mube meeso nende ahandichi bamalako, abachamanga okhuchendachenda nibefwalile tsikanzu tsirambi, nende okhushiesibwa nibali mubiiro.

³⁹Bachama okhwikhala khubifumbi ebilayi, ebieimbeli mutsisinagogi,[13] nende okhulobola habundu aholuyali ahokhwikhala nibali mumasabo.

⁴⁰Abasandinjia abakhasi abalekhwa, ne khulwa okhwikaatia, nibasaaya amasaayo amarambi. Abo nibo abakhahebwe eshinyasio eshilulu muno.”

⁴¹Kho Yesu niyekhala habundu hahengaane nende lisanduku liebihaanwa, nahenga nalola shinga olwa abandu baretsanga amapesa mwisanduku omwo. Abayinda abanji baramwo amapesa amanji.

⁴²Mana omukhasi undi omulekhwa omumanani niyetsa, naramwo amang'ondo kabili, akahela isende ndala.

⁴³Ne Yesu nalanga abeechibe, nababoolela ari, “Emuboolela toto mbu, omukhasi omulekhwa omumanani uno, areeremwo amapesa amanji okhushila boosi abarusiye nibara mwisanduku lino.

⁴⁴Shichila abandi bareeremwo khubitong'anga khubuyinda bwabwe, ne naye mubumananibwe, areeremwo koosi akabeele ninako, niko konyene akayeleetilekhwo mubulamubwe bwosi.”