Read wanga MARIKO 13 Bible Online

MARIKO 13 - wanga bible

MARIKO 13

¹Ne olwa Yesu yali narulanga muhekalu, mulala khubeechibe yamuboolela ari, “Omwechesia, lolakhwo shinga olwa amachina kano kali akokhuhuchisia, khandi shinga olwa amombakho kano kali akokhuhuchisia!”

²Mana Yesu namukalusia ari, “Ololanga amombakho amakhongo kano? Lichina shililitong'akhwo khulindi kata elala tawe. Kakhakwisibwe hasi koosi pe.”

³Ne olwa Yesu yali niyekhaale khushikulu shia Miseituni, ahahengana nende Ihekalu, Petero, Yakobo, Yohana nende Andereya nibamureeba mumasilisi bari,

⁴“Khuboolelekhwo, amakhuwa kano kakhekholeshe liina? Ne eshiakhamanyisie mbu koosi kali hambi okhwikholelekha nishiina?”

⁵Mana Yesu nachaaka okhubaboolela ari, “Mube meeso, omundu yetsukhana yamukaatia namukoyasia.

⁶Abandu abanji bakhetse muliira lianje, nibaboola bari, ‘Isie nisie Ye!’ Ne bakhakoyasie abandu abanji.

⁷Ne olwa mwakhahulile khukelihe nende abandu okhuboola khukelihe, shimulahendekhwo emioyo ta. Ako okhuula kekholeshe, nebutswa eshihesi shiakhabe nishishili okhuula.

⁸Okhuba lihanga liakhalwane nende lihanga lindi, khandi oburuchi, bwakhalwane nende oburuchi bundi. Okhurenga khweshialo okhukhongo khwakhabeho mubialo ebiahukhane, inzala nayo yakhabeho, ne ako koosi kakhabe shinga obuchaachilo bwomukhasi oulumwa inzibula.

⁹“Nebutswa, inywe abeene mube meeso, shichila bakhamutiile nibamuyila mushiina okhuyaasibwa, khandi mwakhakhupwe mutsisinagogi, ne mwakhasinjile imbeli wabami nende abaruchi khulweliira lianje, okhukhola obuloli khwisie nende okhubayaalila Injiili.

¹⁰Ne okhuula Injiili yakharanjilile okhuyaalilwa amahanga koosi.

¹¹Ne olwa bamutiila nibamuyila mushiina okhuyaasibwa, shimularanjililekhwo okhuhenda nende okhukanakania mumioyo aka namuboole ta. Habula muboole aka muba nimuhelwe khushise shieneshio. Okhuba shimuli inywe ababoola ta, habula ni Roho Omutakatifu.

¹²Khandi abandu bakhakhobe abasiani babwe beene okhwiirwa, abasamwana abaana bosi bakhakhole bario, ne abaana nabo bakhabuushile khu bebusi babwe, nibachila niberwa.

¹³Khandi mwakhasilwe nende abandu boosi khulwa isie. Nebutswa owifwila okhuula khushihesi, yakhahonibwe.

¹⁴“Nebutswa olwa mulola amatinyu amakhongo kokhuhuchisia nikarecheekhwe aha kalakhoyile okhuba ta (Ousoma akhoyile okhumanyilisia eshisina), muleshe abandu abali mu Yuda belushile nibatsia mubikulu.

¹⁵Omundu ouba khushilama shieinzuye aleshe okhwikha kata okhwinjila munzuwe nende okhuyiniamwo eshindu shiosi shiosi tawe.

¹⁶Khandi omundu ouli mumukunda shialakalukhakhwo ingowe okhubukula ikanzuye tawe.

¹⁷Bali mushilaamo shiobubi, abakhasi abakhabe nibahela tsinda nende abakhabe nibanuninjia abaana abatoro mutsinyanga etsio!

¹⁸Musaaye mbu, kaleshe okhwikholekha kario mutsinyanga tsiomunyiri.

¹⁹Shichila mutsinyanga etsio, amatinyu kakhabeho amakhongo, akashili okhubakhwoho okhurula khukhuchaaka khweshialo okhuula bulano tawe. Khandi shikakhabekhwoho shinga ako tawe.

²⁰Ne OMWAMI Nyasaye alabula okhuba mbu, yembichitia tsinyanga etsio ta, abulaho omundu yesi yesi, owakhahonibwe ta, nebutswa yembichitia tsinyanga etsio khulwa abalobolebe, aba omwene yaahula.

²¹“Kho bulano omundu naba niyakhamuboolela inywe ari, ‘Lole, Kristo ali hano,’ kata mbu, ‘Lole, ngwoyo ali halia,’ mulasuubile tawe.

²²Okhuba Kristo bobubeeyi nende abalakusi bobubeeyi, bakhetse nibalolesia ebilolelo, akamakana nende akokhuhuchisia, mbu nikaba nikanyalikha bakoyasie abalobole ba Nyasaye.

²³Nebutswa, inywe mube meeso! Isie emubooleele khale amakhuwa koosi nikalashiekholekha ta.

²⁴“Ne mutsinyanga tsienetsio, olunyuma lwamatinyu ako, eshialo shiakhelime ti, kata omwesi shikwakhashekhwo tawe.

²⁵Tsing'ining'ini natsio tsiakhakwe nitsirula mwikulu, ne obunyali bwomwikulu bwakhatechesibwe.

²⁶Nolwa bakhalole Omwana womundu niyetsela mumaleesi nende obunyali obukhongo nende oluyali.

²⁷Mana yakharume abamalaikabe okhukhung'asia abalobolebe, okhurula mutsimbeka tsiosi tsieshialo okhuchaachila khundulo khwashio okhuula khwikulu khwashio.

²⁸“Kho bulano, mweche elieko khumusaala kwomukhuyu, ndielino mbu, olwa lisaka liakwo libetsanga nilihalulushe ne amasafu kalio nikakhachaaka okhusebukha, nimumanya mbu, eshimiyu shili hambi okhuula.

²⁹Kho mwesi olwa mwakhalole amakhuwa ako nikekholekha, mumanye mbu, Omwana womundu ali ahambi okhwitsa, kata ali hamuliango bwene.

³⁰Emuboolela toto mbu, olwibulo luno shilwakharuleho tawe, okhuula olwa ako koosi kakhabe nikamalile okhuusibwa.

³¹Likulu nende eshialo bikharusibweho, nebutswa amakhuwa kanje shikakharusibweho tawe.

³²“Abulaho oumanyilekhwo khu akeinyanga yene kata isaa yene tawe, kata abamalaika bomwikulu, kata Omwana, shibamanyile ta, habula Papa yenyene niye oumanyile.

³³Mwirecheshe, nimuba meeso, nende okhusaaya,[14] shichila shimumanyile olwa indukho yakhoole tawe.

³⁴Kali shinga oolwa omundu ouli khuluchendo mushialo shindi, alekha litaalalie nahelesia abasumbabe obunyali, nabakabila buli mulala omulimokwe, nende okhulaka omulindi weshilibwa mbu yekhalenje meeso nalinda.

³⁵Khulweshio, mwesi mube meeso, okhuba shimumanyile eshise eshia Omwami omwenengo yetsa ta, anyala okhwitsa khungoloobe, noho mushilo hakari, noho tsingokho nitsikholiokha noho kata mumabwibwi.

³⁶Yakhetsukhana yetsa matetekhana namunyoola nimukonanga tsindoolo.

³⁷Ne elia emuboolela inywe, emboolela abandu boosi mbu, mube meeso!”