Read wanga MARIKO 14 Bible Online

MARIKO 14 - wanga bible

MARIKO 14

¹Bulano tsiali nitsishili tsinyanga tsibili okhuula khunyanga yelisabo lia Pasaka nende eliemikaate echibulamwo limela. Abesaaliisi abakhulundu nende abahandichi bamalako bali nibakhabaanga shinga olwa batiila Yesu mabiswi nende okhumwiira.

²Okhuba baboola bari, “Shikhulamutiilakhwo olwa lisabo liba nililiho ta, shichila abandu bakhetsukhana bakhola indiri.”

³Ne Yesu nali Betsania, niyekhaale nalitsanga munzu mwa Simoni, owali owobuchele, omukhasi undi yetsa nali nende eshimuka eshia amafura keshing'ari khandi akobukusi obweikulu. Nafunula eshimuka eshio, natsukhulula amafura ako khumurwe kwa Yesu.

⁴Nebutswa abandi khu bandu balimwo, basinyikha nibabuluula nibareebana abeene khu beene bari, “Eshichila amafura ako nikasasibwa butswa kario nishiina?

⁵Okhuba amafura ako kakhakusiibwe amapesa amanji akashila tsidinari ebikhumi bitaru, ne nikakabilwa abamanani.” Kho nibayiibila omukhasi oyo, nibaboola mbu shiyakhakholile ario tawe.

⁶Naye Yesu nababoolela ari, “Muleshe abe! Mumunyasinjia shichila shiina? Ye yakholeele omulimo omulayi okwolukoosi.

⁷Shichila mubetsanga nende abamanani tsinyanga tsiosi, ne buli olwa mwenya lwosi, munyala okhubakholela amalayi. Nebutswa shimulabetsanga ninasi tsinyanga tsiosi tawe.

⁸Ye akholile kanyaliilwe, yekholeleele okhutsushilila nende okhubakha omubili kwanje amafura, khulwa okhukurechekha okhuyabilwa.

⁹Emuboolela toto mbu, buli aha Injiili yakhayaalungwe mushialo shiosi, aka akholile ako kakhaboolungwekhwo khulwa okhwitsulila omukhasi uno.”

¹⁰Mana Yuda Isikarioti, owali mulala khubeechi ekhumi nababili, yatsia khu abesaaliisi akhulundu kho mbu, akhobe Yesu.

¹¹Ne olwa bahulilakhwo, basaangaala, ne nibamusuubisia okhumuhelesia amapesa. Naye nachaaka okhukhaaba obwiyangu obulayi bwokhumuhaana mumakhono kabwe.

¹²Mana khunyanga yambeli yelisabo liemikaate echibulamwo limela, olwa basinzanga eshimeeme shielikondi khulwa lisabo lia Pasaka, abeechi ba Yesu bamureeba bari, “Wenya mbu khutsie khukhukaasilie hena lisabo lia Pasaka?”

¹³Kho Yesu naruma babili abokhubeechibe, nababoolela ari, “Tsie mwitookho, ne mulabukaana nende omusaatsa undi niyetuushile isiongo yamaatsi khumurwekwe, mumulondekhwo.

¹⁴Ne, hosi hosi aha nayenjile, muboolele mwenenzu eyo muri, ‘Omwechesia areebanga mbu, eshisika shianje shiabacheni shili hena, eshia isie nende abeechi banje khulaliilamwo lisabo lia Pasaka?’

¹⁵Naye omwene alamumanyia eshisika shieikulu eshikkongo eshialilwe obulayi khandi shimalile okhurechekhwa. Mukhukaasilie mubwenomwo.”

¹⁶Mana abeechi abo nibarula nibatsia mwitookho omwo, ne nibanyoola nikali shinga olwa Yesu yali nababooleele. Kho nibakaasia lisabo lia Pasaka.

¹⁷Ne bwela, Yesu niyetsa nende abeechi ekhumi nababili abo.

¹⁸Kho olwa bali nibekhale nibaliitsanga, Yesu yaboola ari, “Emuboolela toto mbu, mulala khwinywe oulitsanga ninasi alaakhoba.”

¹⁹Mana buli mulala nachaaka okhumureeba ari, “Ekhali sie noho?”

²⁰Naye Yesu nabakalusia ari, “Nimulala khwinywe ekhumi nababili, outonganga omukaate ninasi mushikaye shilala.

²¹Okhuba Omwana womundu atsia okhufwa shinga olwa kahandikwa mbu yakhafwe. Nebutswa ali mushilaamo shiobubi, omundu oukhoba Omwana womundu! Bwakhabeele obulayi omundu oyo kata yalekha okhwibulwa.”

²²Ne olwa bali nibaliitsanga, Yesu yabukula omukaate, ne nakusabila ikhabi, nakusonyola, ne nabahelesia abeechibe naboola ari, “Bukule muliekhwo, kuno nomubili kwanje.”

²³Khandi nabukula eshikombe shieidivai, ne olwa yali namalile okhukhupa orio, yahelesia abeechibe, mana boosi nibanywa.

²⁴Kho nababoolela ari, “Kano namabanga kanje akeindakano imbia, akebeena khulwabandu abanji.

²⁵Emuboolela toto mbu, shindakhanywekhwo khandi idivai ta, okhuula olwa ndakhachinywe obuyia mubwami bwa Nyasaye.”

²⁶Ne olwa bali nibamalile okhwimba olwimbo, barula nibatsia khushikulu shia Miseituni.

²⁷Mana Yesu naboolela abeechibe ari, “Inywe mwesi namunzilushe, shichila kahandikwa mbu, ‘Ndakhakhupe omwayi, ne amakondi kakhasalaane.’

²⁸Nebutswa olwa ndakhabe nemalile okhulamusibwa okhurula mubafu, ndakharanjilile okhutsia Galilaya.”

²⁹Naye Petero namuboolela ari, “Kata boosi nibakhwilukha, isie shindakhakhwilushe tawe.”

³⁰Yesu namuboolela ari, “Ekhuboolela toto mbu, eshilo shino, olanzikaana akhandi khataru, itaywa niyilashialakula akhandi khabili tawe.”

³¹Naye Petero naboola natinyisia muno ari, “Kata nikaba mbu, okhuula khufwe ninawe, shinekhwikaanekhwo tawe.” Khandi abeechi bandi boosi nibaboola bario.

³²Mana nibatsia habundu ahalangungwa mbu, Getsisemane. Mana Yesu naboolela abeechibe ari, “Mwikhalekhwo hano, nasi neshisaaya.”

³³Mana olunyuma nabukula Petero, Yakobo nende Yohana, ne nachaaka okhubeyabeya nende okhunyakhana mumwoyokwe muno.

³⁴Mana nababoolela ari, “Omwoyo kwanje kuli neshibeela eshinji. Shienya okhunzira, mutoonye hano, ne mube meeso.”

³⁵Natsiakhwo hambeli hatiiti, niyekhupa hasi nasaaya naboola mbu, nikaba nikanyalikha, aleshe okhubirakhwo mushise shiamatinyu eshio tawe.

³⁶Mana naboola ari, “Papa wanje, amakhuwa koosi kanyalikhanga khwiwe, umbiniekhwo eshikombe shiamatinyu shino. Nebutswa kalaba aka sie enzenya ta, habula aka iwe wenya.”

³⁷Mana niyetsa nabanyoola nibakonanga tsindoolo, nareeba Petero ari, “Simoni, okonanga? Shionyaliilwe okhuba meeso kata khulwa isaa ndala yonyene ta?

³⁸Mube meeso, nimusaaya, kho mbu muleshe okhwinjila mukhuteemwa. Omwoyo kwenyanga, nakwo omubili nomuteshele.”

³⁹Khandi narulaho natsia nasaaya, ne nakalushila okhuboola amakhuwa malala tsana ako.

⁴⁰Niyetsa khandi nabanyoola nibakonanga tsindoolo, shichila tsimoni tsiabwe tsiali nitsisitohe, ne nibakorwa elia bamukalusia.

⁴¹Khandi niyetsa olwakhataru, nabareeba ari, “Mushikonanga tsindoolo nimuhuluukha? Tsihelile! Eshise bulano shiakhoola. Lole, Omwana womundu ahaanilwe mubunyali bwabandu abonooni.

⁴²Buushe, chende khutsie. Lole, omukhobi wanje amalile okhuula!”

⁴³Olwa Yesu yali nashiboolanga amakhuwa ako, Yuda, mulala khubeechi ekhumi nababili abo, niyetsa. Yali nende omukanda kwabetsinganga nende tsindabushi, abali nibarumilwe nende abesaaliisi abakhulundu, abahandichi bamalako nende abakofu.

⁴⁴Ne Yuda, omukhobi wa Yesu yali nabamanyiye eshilolelo, nababooleele ari, “Owa ndalafumbeelela niye owatsana oyo, mumutiile mumuyile nali hasi wobulindi.”

⁴⁵Nolwa Yuda yetsa, yasita aha Yesu yali bwangu naboola ari, “Omwami!” Ne namufumbeelela.

⁴⁶Mana nibamukwakhwo ne nibamutiila.

⁴⁷Nebutswa oundi khubali nibasinjiileho yatsomola olukangalwe, nakhalaka eshirwi shiomukhalabani womwisaaliisi omukhulundu.

⁴⁸Naye Yesu nabareeba ari, “Mwitsile netsinganga nende tsindabushi okhundiila, shinga abatiila omunuuli?

⁴⁹Ndabelenje ninenywe halala muhekalu buli lwosi, ninzechesinjia ne shimwayandiilakhwo ta. Nebutswa bulano leshe Amahandiko koosibwe.”

⁵⁰Mana abeechi boosi nibelukha nibamulekha.

⁵¹Ne omusiani undi omubuukha yalonda khu Yesu neyefwalile butswa ingubo yeikitani yonyene. Abelihe nibateema okhutiila omubuukha oyo,

⁵²nebutswa niyelukha shichula, nalekha inguboye yeikitani eyo.

⁵³Mana abelihe nibayila Yesu womwisaaliisi omukhulundu, ewa abesaaliisi abakhulundu boosi nabakofu nende abahandichi bamalako bali nibakhung'anile.

⁵⁴Petero yali namulondangakhwo nali ehalekhwo, niyola mukari mwolwanyi lwomwisaaliisi omukhulundu. Yali niyekhaale halala nende abalindi, niyooranga omulilo.

⁵⁵Abesaaliisi abakhulundu nende abeshiina boosi nibakhaaba obuloli khu Yesu mbu bamwiire, habula shibanyoola tawe.

⁵⁶Okhuba abandu abanji bakholela Yesu obuloli bwobubeeyi, khulwa okhumwinjilila, ne obuloli bwabwe shibwafuchilisania tawe.

⁵⁷Khandi abandi khubo basinjila nibakhola obuloli bwobubeeyi khulwa okhumwinjilila nibaboola khuye bari,

⁵⁸“Khwamuhuliile naboolanga ari, ‘Ndalalikulula Ihekalu yino eyoombakhwa nabandu, mana khulwa tsinyanga tsitaru ndalombakha eyindi, eyilombakhwa namakhono kabandu tawe.’ ”

⁵⁹Kata kario obuloli bwabwe shibwafuchilisania tawe.

⁶⁰Mana Omwisaaliisi omukhulundu nasinjila hakari kari wabwe nareeba Yesu ari, “Obula likhuwa liokhukalusia? Nobuloli shiina obwabandu bano bakholanga khwiwe khulwa okhukhwinjilila iwe itookho?”

⁶¹Nebutswa Yesu yaholeela butswa tsi, nalakalusiakhwo likhuwa liosi liosi tawe. Khandi Omwisaaliisi omukhulundu namureeba ari, “Niwe Kristo watsana, Omwana wa Nyasaye Mwene ikhabi?”

⁶²Yesu nakalusia ari, “Nisie. Khandi mwakhalole Omwana womundu niyekhaale khumukhono musaatsa kwa Nyasaye mwene bunyali ne niyetselanga khumaleesi komwikulu.”

⁶³Mana omwisaaliisi omukhulundu oyo narandula tsingubotsie ne nareeba abakhalachi beshiina ari, “Eshichila nikhushienya abaloli bandi nishiina?

⁶⁴Inywe abeene muhulile amanyekoke khu Nyasaye. Mukhalaka murie?” Boosi nibamukhalachila eshiina mbu akwanile okhufwa.

⁶⁵Mana abandi nibachaaka okhunyilikha khu Yesu amare, nibamufuunikha mumoni, nibamukhupa, nibaboola bari, “Lakulakhwo! Oukhukhupile niwiina?” Mana abelihe bandi nibamubukula nibamupaama tsikhofi.

⁶⁶Ne olwa Petero yali nashili mulwanyi emwalo walwo, Omukhaana undi mulala khubakhalabani bomwisaaliisi omukhulundu niyetsaho.

⁶⁷Ne olwa yalola Petero niyooranga omulilo, yamuhenga ne namureeba ari, “Wesi wabeele nende Omunazareti oulangwa mbu Yesu?”

⁶⁸Nebutswa Petero niyekaana naboola ari, “Shiemanyilekhwo akoboolanga ta khandi shiendikhwo nobumanyilisi khuko tawe.” Mana Petro narula natsia elwanyi mushiliibwa.

⁶⁹Ne Omukhaana omukhalabani oyo namulola, nachaaka khandi okhuboolela abali basinjiileho ari, “Omundu uno, nimulala khubo.”

⁷⁰Nebutswa khandi Petero yekaana. Ne olunyumakhwo khandi abali nibasinjiileho nibaboolela Petero bari, “Toto mwene oli mulala khubo. Okhuba oli Omugalilaya.”

⁷¹Naye Petero niyetsuba naboola ari, “Nditsuba mubwatoto mbu, emboolanga akahabwene! Nyasaye akhoya yambelesia eshinyasio nemba nemboolanga akobubeeyi! Shiemanyilekhwo omundu wa muboolangakhwo uno tawe!”

⁷²Habwene nababwene itaywa niyikholiokha olwa khabili. Mana Petero niyetsulila shinga olwa Yesu yali namuboolele, ari “Itaywa niyilashiakholiokha akhandi khabili, nobe niunzikaanile akhandi kataru mbu, shiumanyile ta.” Mana nachaaka okhulila amasika.