Read wanga MARIKO 15 Bible Online

MARIKO 15 - wanga bible

MARIKO 15

¹Ne olwa eshialo bwashia, abesaaliisi abakhulundu, abakofu, abahandichi bamalako nende abeshiina boosi, bafuchilisania, mana nibaboha Yesu, nibamurusia nibamuhaana mumakhono ka Pilato.

²Naye Pilato nareeba Yesu ari, “Niwe omuruchi owa Abayahudi?” Naye Yesu namukalusia ari, “Niwe ouboolile orio.”

³Mana abesaaliisi abakhulundu nibamwinjilila namakhuwa amanji.

⁴Pilato namureeba khandi ari, “Shiolikhwo nelikhuwa liokalusia ta? Lolakhwo amakhuwa akachilanga nibakhusitaaka shinga olwa kali amanji!”

⁵Nebutswa Yesu shiyakalusiakhwo likhuwa liosi liosi khandi ta, mana Pilato nahuka.

⁶Buli khunyanga yelisabo lia Pasaka, Pilato yabalekhuulilanga omubohe mulala, owa benyanga mbu alekhuulwe.

⁷Ne mu abakhayi bamalako abali mumbohe, abali nibeera abandu mukhukhola induli, yalimwo oundi owalangwa mbu Baraba.

⁸Mana abandu abanji nibetsa nibachaaka okhureeba Pilato mbu, abakholele shinga olwa yabakholelanga buli lwosi.

⁹Naye nabakalusia nabareeba ari, “Mwenya mbu emulekhuulile omuruchi owa Abayahudi?”

¹⁰Yabareeba ario okhuba yali namanyile mbu, abesaaliisi abakhulundu bahaana Yesu khuye shichila imbalikha.

¹¹Nebutswa abesaaliisi abakhulundu basema abandu nibabatsuuba mbu, bareebe Pilato abalekhuulile Baraba.

¹²Mana Pilato khandi nabareeba ari, “Kho mwenya ekholele shiina omundu wa mulanganga mbu, Omuruchi owa Abayahudi uno?”

¹³Mana abandu boosi nibayiiba nibakalusia bari, “Mubambe!”

¹⁴Pilato naye nabareeba ari, “Shichila shiina? Nikhuwa shiina libi liakholile?” Nebutswa nabo bameeta butswa okhuyiiba obutinyu nibaboola bari, “Mubambe!”

¹⁵Ne, shichila Pilato yenya okhuchamisia abomukanda okwo, yabalekhuulila Baraba. Mana Pilato nasubula abandu abo mbu, banyweshe Yesu khandi namuhaana mbu bamubambe khumusalaba. .

¹⁶Mana abelihe nibarusia Yesu nibamuyila mulwanyi lwomukari lweitookho, (olulangwa mbu, Puritoriamu). Kho nibalanga omukanda kwa belihe nibakhung'ana halala boosi.

¹⁷Nibamufwala ikanzu yobukondo bweisambarau. Ne nibalukha olusimbi lwamahwa, nibara khumurwe kwa Yesu.

¹⁸Nibachaaka okhumwinamila nende okhumushiesia nibaboola bari, “Oyindile, iwe Omuruchi wa Abayahudi!”

¹⁹Kho nibamunywekha khumurwe nende indabushi yelikata nende okhumunyilikhakhwo amare. Mana nibamusikamila nende okhumwinamila.

²⁰Ne olwa bali nibamalile okhumutseshelela, bamufwalula ikanzu yobukondo bweisambarau eyo, ne nibamufwala ebifwalo bibie biene. Mana nibamurusia nibamuyila okhumubamba khumusalaba.

²¹Ne khunjila, abelihe abo babukaana nende omundu undi owali nabirangaho, owali nachelelanga mwitookho narula mungongo tsindi, oulangwa mbu, Simoni Omukirene, samwana Alekisanda nende Rufu. Kho nibanichilisia omundu oyo mbu, achinje omusalaba kwa Yesu.

²²Mana nibayila Yesu habundu ahalangwa mbu, Goligotsa, (Eshisina mbu, Habundu aha eshihanganga).

²³Nibateema okhumuhelesia idivai eyatsokaasibwamwo manemane[15] niyiranyile mbu, anywe. Nebutswa Yesu shiyachinywa tawe.

²⁴Kho nibamubamba khumusalaba, ne nibakabana ebifwalobie munjila yokhubikhupila ikha, khulwa okhumanya ingubo ya buli mundu akhoyile okhubukula.

²⁵Tsiali tsisaa tsitaru tsiomusenya, olwa bamubamba khumusalaba.

²⁶Nalio lihandiko eliamanyia obumayanu bwachila Yesu nabambwa liali liri, “Omuruchi Owa Abayahudi.”

²⁷Yesu yabambwa halala nende abanuuli babili. Mulala khumukhonokwe musaatsa ne oundi khumukhonokwe mukhasi. [

²⁸Kho akaboolwa mu Amahandiko nikoosibwa, akaboola mbu, yabasilibwa halala nende abakhayi.]

²⁹Nabo abali ababirangaho boosi bamunyekanga nibamuresilia emirwe chiabwe nibaboola bari, “Wale! Iwe owabele niwenyanga okhulikulula Ihekalu mama ochiumbashe khulwa tsinyanga tsitaru,

³⁰wihoniekhwo omwene, mana wishe orule khumusalaba!”

³¹Khandi abesaaliisi abakhulundu nende abahandichi bamalako bosi nibatseshelela Yesu, nimuboolela bari, “Yahoniyenje abandu bandi, ne shianyala okhwihonia omwene ta!

³²Leshe khulolekhwo Kristo, Omuruchi owa Isiraeli, niyekha bulano okhurula khumusalaba kho mbu, khusuubile.” Khandi aba yabambwa ninabo bosi bamunyeka.

³³Ne olwa isaa yakhasasaba yeshiteere yola, eshialo shiosi shielima, okhuula khusaa ya shienda yokhungoloobe.

³⁴Mana khusaa ya shienda eyo, Yesu nalila nomwoyo omukhongo naboola ari, “Eloi, Eloi, Lema Sabakitsani?” Eshisina mbu, “Nyasaye wanje, Nyasaye wanje, undeshile mbushiina?”

³⁵Ne olwa abandi, abali nibasinjiileho bahulilakhwo amakhuwa ako, baboola bari, “Lole, alanganga Eliya.”

³⁶Mana oundi niyelukha tsimbilo, niyetsusia idivai eyiranyile mushiangwe, nara khwikata lielitundu, namukhofia khumunwa mbu, anywe, ne naboola ari, “Lekha khulolekhwo Eliya naba niyetsa okhumurusia khumusalaba.”

³⁷Mana Yesu nalila nomwoyo omukhongo ne nakwisia omwoyo.

³⁸Nayo ingubo yishinga yomuhekalu niyirandukhamwo ebitonye bibili, okhurula ikulu okhuula hasi.

³⁹Mana lwomwimilisi wabelihe, owali nasinjiile imbeliwe namuhenganga yalola shinga olwa Yesu yalila nakwisia omwoyo, yaboola ari, “Toto mwene, omundu uno abeele Omwana wa Nyasaye!”

⁴⁰Ne baliho abakhasi bandi, abali nibasinjiile ehale nibahenganga. Ne mubelihe abo, Mariamu Magadalene, Mariamu nyinamwana Yakobo owali omushe nende, Yose nende Salome bosi balimwo.

⁴¹Ne olwa Yesu yali mu Galilaya, abo boosi bali nibamulondilenjekhwo, nibamukhalabanila. Khandi baliho abakhasi bandi abanji, abali nibetsile ninaye okhuula Yerusalemu.

⁴²Ne eshialo bwali nibwakhela. Ne inyanga eyo yali eyokhwirechekha, (Eshisina mbu, inyanga eyiranjilila Isabato).

⁴³Yosefu owa Arimatsaya, omukofu woluyali khandi mulala khubakofu bomushiina, owali yesi nalindililanga Obwami bwa Nyasaye, yoma ikholo ne natsia khu Pilato, namusaba mbu aheebwe omubili kwa Yesu.

⁴⁴Pilato yakanakania mumwoyokwe okhuhulila mbu toto Yesu amalile okhufwa. Kho nalanga omwimilisi wabelihe, namureeba okhumanya nikaba mbu toto Yesu amalile okhufwa.

⁴⁵Ne olwa yaboolelwa nende omwimilisi wabelihe oyo mbu, Yesu amalile okhufwa, yafuchilila okhuhelesia Yosefu omubili kwa Yesu.

⁴⁶Mana Yosefu nakula isanda yeikitani, narusia omubili kwa Yesu khumusalaba nakura hasi, ne nakukanyila musanda yeikitani eyo. Niyalisia omubili kwa Yesu mung'ani, eyali niyayabwa mulwanda, ne naserenjesia lichina likhongo nalifuunikha khung'ani eyo.

⁴⁷Nabo Mariamu Magadalene nende Mariamu nyinamwana Yosefu nibalola aha Yesu yali niyalisiibwe.