Read wanga MARIKO 16 Bible Online

MARIKO 16 - wanga bible

MARIKO 16

¹Ne olwa Isabato yali niyihwele, Mariamu Magadalene, Mariamu nyinamwana Yakobo nende Salome, bakula marashi keshing'ari eshilayi mbu, batsie batsushilile khumubili kwa Yesu.

²Mana khunyanga yambeli yelichuma, mumabwibwi eliuba niliakharula, abakhasi abo nibahuuna okhutsia khung'ani.

³Nabo nibali khunjila, bareebananga abeene khu beene bari, “Ounaukhuserenjesilie lichina okhurula khung'ani niwiina?”

⁴Nebutswa olwa bachinguula tsimoni tsiabwe nibahenga, balola lichina nilimalile okhuserenjesibwa. Liali lichina likhongo muno.

⁵Kho nibenjila mung'ani, ne nibalola omusiani omuraaka niyekhaale mung'ani khulubeka lwomukhono musaatsa, niyefwalile ikanzu indafu, ne nibahuka muno.

⁶Naye nababoolela ari, “Mulahuka tawe. Emanyile mbu mukhabanga Yesu wa Nazareti, owabambilwe. Alamuushe, shiali hano tawe. Lole, aha babeele nibamwalisiiye ngahano.

⁷Nebutswa mutsie, muboolele abeechibe nende Petero mbu, Yesu yekholeele okhutsia Galilaya inywe nimushili. Mulamulola nali ebwene eyo, shinga olwa yali niyamuboolela.”

⁸Mana nibelukha nibarula hang'ani, shichila bali nibaiire khandi nibatechelanga. Mana nibalaboolelakhwo omundu likhuwa liosi liosi tawe shichila bali nibariire. [

⁹Mana mumabwibwi khunyanga eyilonda khunyanga eya Isabato, Yesu yaranjilila okhumuloleshela Mariamu Magadalene, owa yali niyayiniamwo ebishieno musafu.

¹⁰Naye natsia naboolelakhwo abali nibabeelenje nende Yesu. Ebise ebio bali nibashiikhuulanga nibalila amasika.

¹¹Nebutswa olwa bahulila mbu, Yesu aliho mwoyo, khandi mbu, Mariamu amuluutsi, shibasuubila tawe.

¹²Olunyuma, Yesu yaloleshela abalondibe bandi babili nali mubukondo bwomundu undu butswa. Abaloondibe abo bali nibachendanga nibarula mwitookho.

¹³Nabo nibakalukha okhuboolela abeechi bandi. Nebutswa abeechi bandi abo shibasuubila abashiabwe abo tawe.

¹⁴Mana olunyuma lwene, Yesu naloleshela abeechibe beene ekhumi namulala, olwa bali nibekhaale nibaliitsanga. Ne nabahalabila khulwa okhubula okhusuubili khwabwe nende khulwa obuumilanu bwemioyo chiabwe. Shichila shibaali nibasuubile abali nibamuluutsi, olwa yali namalile okhulamukha okhurula mukhufwa tawe.

¹⁵Mana nababoolela ari, “Mutsie mushialo shiosi, muyaalile abandu boosi Injiili.

¹⁶Omundu yesi yesi ousuubila nabatiisibwa yakhahonibwe. Ne oulasuubila ta, yakhaheebwe eshinyasio.

¹⁷Ne ebilolelo bino bilalonda abasuubila, mbu muliira lianje, balarusia ebishieno, balaboolanga mutsinimi etsilali etsiabwe ta,

¹⁸balatiila tsinzokha namakhono noho kata okhunywa obufwisi bwosi obwiiranga, ne shibilabakholakhwo eshindu shiosi shiosi tawe. Balaretsanga amakhono kabwe khubalwale, ne abalwale abo bahona.”

¹⁹Mana olwa Omwami Yesu yali namalile okhubaboolela amakhuwa ako, yabukulwa nayilwa mwikulu, ne niyekhala khumukhono musaatsa kwa Nyasaye.

²⁰Kho abeechibe abo nibarulaho nibatsia okhuyaala Injiili buli habundu. Naye Omwami Yesu mwene nakhola halala ninabo nende okhutinyisia likhuwalie nebilolelo biamakana ebialoondana halala neinjiili ya Yesu eyo. Amina.] [ OKHUMALISIA KHUNDI KHWA KHALE Ne khunyanga yambeli eyiranjilila inyanga eya Isabato, olwa Yesu yali nalamuushe okhurula mukhufwa, yaranjilila okhuloleshela Mariamu Magadalene, owa Yesu yali narusiyemwo ebishieno musafu.[16] Mariamu Magalene natsia niyenoosiakhwo aba Yesu yali nabelenje ninabo, nabo bali nibekhuulanga nibalila amasika. Ne olunyuma lwako, Yesu Omwene naruma abeechibe okhutsia mushialo shiosi, okhurula ebukwe okhuula mumbo, okhuyaala Injiliye indakatifu khandi eyoburume bwobuhonia bweinziayo.]