Read wanga MARIKO 2 Bible Online

MARIKO 2 - wanga bible

MARIKO 2

¹Ne olwa tsinyanga tsindiiti tsiali nitsihwele, Yesu yachelela mwitookho lia Kaperinaumu, mana nikamanyikha mbu achelele ingo.

²Mana abandu abanji nibakhung'anilaho halala, kho mbu obwiyangu shibwalikhwoho kata hamuliango honyene tawe. Naye Yesu yali nabayaalilanga likhuwa lia Nyasaye.

³Abandu bane betsa nibachinjile omundu owafwokoya khushitali nibamureera aha Yesu yali.

⁴Ne shichila abandu bali nibahachile mumuliango, bakhaywa shinga olwa bamubisia mbu yoole aha Yesu yali. Kho nibaniina khushilama shieinzu, nibashilisambula mana nibenjisiliaho owafwokoya oyo okhuula aha Yesu yali.

⁵Ne olwa Yesu yalola obusuubili bwabwe, yaboolela owafwokoya oyo ari, “Mwana wanje, olesheelwe obwonoonibwo.”

⁶Abahandichi bamalako bandi bali nibekhalemwo, nibakanakania mumioyo chiabwe bari,

⁷“Omundu uno aboolanga ario mbushiina? Khuno shinokhunyeka Nyasaye? Owakhanyala okhuleshela abandu obwonooni niwiina, nalali Nyasaye yenyene?”

⁸Mana habwene nahabwene Yesu namanya mumwoyokwe aka bali nibayililisinjia mumioyo chiabwe, yabareeba ari, “Mukanakaninjia murio mumioyo chienywe mbushiina?

⁹Eliangu nelilena? Okhuboolela owafwokoya mbu, ‘Olesheelwe obwonoonibwo,’ noho okhumuboolela mbu, ‘Buukha, obukule eshitalishio mana ochende?’

¹⁰Ne ndalamumanyia inywe mbu, Omwana womundu ali nobunyali khushialo okhuleshela obwonooni.” Khulweshio, yaboolela owafwokoya oyo ari,

¹¹“Ekhuboolela mbu, buukha, obukule eshitalishio, otsie ingo!”

¹²Mana owafwokoya nabuukha nabukula eshitalishie bwangu ne narula imbeli wabwe. Ne boosi nibahuchisibwa, nibaboola bari, “Khushili okhulolakhwo eshindu shinga shino tawe.” Mana nibetsoomia Nyasaye.

¹³Mana Yesu khandi narula natsia khuluchinga lweinyanza ya Galilaya. Omukanda omukhongo nikukhung'anila aha yali, naye nabeechesia.

¹⁴Ne olwa yali nabiranga, yalola Lawi, omusololi wobushuru owali omusiani wa Alufayo, niyekhaale aha basololelanga obushuru. Yesu naboolela Lawi ari, “Nondakhwo.” Naye Lawi nasinjila, namulondakhwo.

¹⁵Mana Yesu natsia munzu mwa Lawi, naheebwa eshiokhulia. Olwa yali nalitsanga, abasololi bobushuru nende abonooni abanji betsa nibekhala ninaye nende abeechibe okhulia eshiokhulia, okhuba abali nibamuloondangakhwo bali abanji.

¹⁶Ne olwa abahandichi aba Abafarisayo balola mbu, Yesu alitsanga nabonooni nende abasololi bobushuru, bareeba abeechibe bari, “Nishiina eshichila Yesu nalia nende abasololi bobushuru nende abonooni?”

¹⁷Ne olwa Yesu yahulilakhwo amakhuwa ako, yababoolela ari, “Abali abalamu shibakhabaanga omusilishi ta, habula abalwale nibo abakhabaanga omusilishi. Shindayetsa okhulanga abalunjishi ta, habula ndetsa okhulanga abonooni.”

¹⁸Ne bulano abeechi ba Yohana omubatiisi nende aba Abafarisayo bali nibeyimile eshiokhulia. Kho abandu nibetsa khu Yesu nibamureeba bari, “Mbushiina abeechi ba Yohana omubatiisi nende aba Abafarisayo nibeyimanga eshiokhulia, nabo abeechibo shibeyimangakhwo eshiokhulia tawe?”

¹⁹Mana Yesu nakalusia nabareeba ari, “Abacheni beshiselelo bakheyima barie eshiokhulia, lwomwene eshiselelo aba nashili ninabo? Oluhoono lwomwene eshiselelo ashili ninabo, shibanyala okhwiyima eshiokhulia tawe.

²⁰Nebutswa tsinyanga tsitsanga lwomwene shiselelo aliyinibwaho okhurula khubo. Inyanga yaliyinibwaho eyo, niyo eya baliiyima eshiokhulia.

²¹“Abulaho ounabanga eshilaka shieingubo imbia, khungubo ikhulu tawe. Shichila eshilaka shieingubo imbia shilekhuuna mana shimeete okhurandula ingubo ikhulu eyo.

²²Khandi abulaho outsukhanga idivai indoro mumifuko chiamaseelo emikhulu tawe. Okhuba idivai indoro yakharulaka emifuko emikhulu echio, mana biosi nibisasikha. Habula idivai indoro yitsukhungwa mumifuko chiamaseelo amayiakha.”

²³Khunyanga yindi eya Isabato, Yesu nabeechibe bali nibabiranga mumikunda chieingano. Nibali khuluchendo olwo, abeechibe bachaaka okhwamula ingano.

²⁴Kho Abafarisayo nibareeba Yesu bari, “Lola, khulwa shiina abeechibo bakholanga akomusilo khunyanga eya Isabato?”

²⁵Naye Yesu nabakalusia ari, “Shimwasomakhwo amakhuwa ka Daudi yakhola olwa ye nende aba yali ninabo bali inzala nibenyanga eshiabalia ta?

²⁶Olwa Abiatsari yali omwisaaliisi omukhulundu, Daudi yenjila munzu ya Nyasaye, nalia emikaate echiali nichihaaniilwe Nyasaye. Ne kwali omusilo omundu yesi yesi okhuliakhwo emikaate echio okhurusiakhwo abesaaliisi bonyene. Khandi nahelesiakhwo aba yali ninabo.”

²⁷Mana Yesu nababoolela ari, “Isabato yarebwaho khulwa omundu, shiali omundu owarebwaho khulwa Isabato tawe.

²⁸Kho Omwana womundu nomwami kata khunyanga eya Isabato.”