Read wanga MARIKO 3 Bible Online

MARIKO 3 - wanga bible

MARIKO 3

¹Mana Yesu khandi niyenjila musinagogi. Ne omundu yalimwo owomukhono kwafwokoya.

²Abandu baliho nibamuhenjelesinjia okhulola naba namuhonia khunyanga eya Isabato, kho mbu bamwinjilile itookho.

³Yesu nalanga owomukhono kwafwokoya oyo namuboolela ari, “Yitsa hano.”

⁴Mana nareeba abandu ari, “Nomusilo okhukhola amalayi khunyanga eya Isabato noho okhukhola amabi? Okhuhonia obulamu noho okhwira?” Nabo nibaholela butswa tsi.

⁵Kho olwa Yesu yabahenga yasinyikha khulwa obumilanu bwemioyo chiabwe! Nababeelelela, mana naboolela owomukhono kwafwokoya oyo ari, “Nyiila omukhonokwo kukololoshe.” Kho owomukhono kwafokoya oyo nakunyiila, nakwo nikukololokha nikukalukha habwene.

⁶Mana Abafarisayo nibarula musinagogi nibakhung'ana lwangu nende abomukanda kwa Herode, nibaloosia shinga olwa banyala okhwira Yesu.

⁷Kho Yesu nende abeechibe nibarulaho nibatsia khunyanza ya Galilaya. Mana omukanda omukhongo kwabandu nikumulondakhwo. Abandu bano barula Galilaya, Yuda,

⁸Yerusalemu nende mutsingongo tsia Idumea. Abandi barula injelekha womwalo kwa Yorodani, tsigongo tsia Tiro nende Sidoni. Betsa boosi khu Yesu olwa bahulila aka yali nakholanga.

⁹Omukanda okwo, kwali omukhongo muno. Mana Yesu naboolela abeechibe bamurecheshele eliaro yenjilemwo kho mbu abandu baleshe okhumutuya.

¹⁰Shichila yali nahoniiye abandu abanji, ne abalwale boosi bafindikana nibasita nibenya okhumutiilakhwo.

¹¹Nabo abali nebishieno olwa bamulolangakhwo butswa, bakwitsanga hasi mumakuluke nibayula nomwoyo omukhongo nibaboola bari, “Oli Omwana wa Nyasaye!”

¹²Naye nahalabila ebishieno ebio obutinyu mbu, bileshe okhuchila amanyishe.

¹³Mana Yesu nanina khushikulu, ne nalanga abo aba yachama okhwaahula, mbu betse khuye. Nabo nibatsia ewa yali.

¹⁴Kho niyaahula abandu ekhumi nababili, nabalanga abarumwa, mbu babe ninaye khandi abarume okhutsia okhuyaala,

¹⁵khandi nabahelesia obunyali bwokhurusia ebishieno.

¹⁶Ekhumi nababili abayaahula mbabano mbu, Simoni (owa Yesu yakulikha Petero),

¹⁷Yakobo wa Zebedayo nende omwana wabwe Yohana, (aba Yesu yalaha mbu, “Boanerige, eshisina mbu, Abatulukhanga shinga likulu”),

¹⁸Andereya, Filipo, Batsolomayo, Matayo, Tomasi, Yakobo wa Alufayo, Tsadayo, Simoni omukanani,

¹⁹nende Yuda Isikarioti, owakhoba Yesu.

²⁰Mana Yesu natsia ingo. Ne omukanda omukhongo kwabandu nikukhung'anilayo khandi, mbu kata ye nende abaloondibe shibanyoolakhwo ebise biokhulia eshiokhulia tawe.

²¹Olwa abeinzu yabwe bahulila akabandu bali nibaboolanga, batsia okhumubukula shichila bali nibaboolanga mbu “ulaluushe.”

²²Ne balala khubahandichi bamalako bali nibetsile okhurula Yerusalemu, baboola bari, “Eshishieno Belizebuli shimwinjilemwo! Khandi yekhoonyelanga obunyali bwomukhongo webishieno okhurusia ebishieno.”

²³Kho Yesu nabalanga okhwitsa aha yali, nabareeba mutsinjelo ari, “Setani yakhanyala arie okhulonda Setani washie?

²⁴Lihanga niliakhakabukhana mumikanda echilwana echiene khuchiene, lihanga elo shilinyala okhuralila tawe.

²⁵Kata abomunzu ndala nibakhahukhana mumikanda echilwana echiene khuchiene, abeinzu eyo balasikha.

²⁶Kho oburuchi bwa Setani nibuba nibukabukhana mumikanda, echilwana echiene khuchiene shibwakhatsiililila tawe, nebutswa buba bulasikha.

²⁷“Abulaho ounyala okhwinjila munzu yomundu wamaani mana ayaaye emianduchie, nalaranjiliile okhuboha omundu wamaani oyo. Ne namuboyile nilwo olwa anyala okhuyaaya inzuye eyo.

²⁸Toto mwene emuboolela mbu, abandu balaleshelungwa obwonooni bwabwe bwosi kata amanyeko kabanyeka Nyasaye,

²⁹nebutswa, ounyeka Roho Omutakatifu shialaleshelwa obwonoonibwe kata nahatuutu tawe. Okhuba akholile obwonooni bweshilaamo shieinziayo.”

³⁰(Yesu yaboola ako shichila abandu bandi bali nibaboolanga bari, “Ali neshishieno.”)

³¹Nyinamwana Yesu nende abasiani babwe betsa nibasinjila elwanyi nibarumana mbu, Yesu yetse.

³²Ne omukanda kwabandu kwali nikwikhale nikumubotokhane, nibamuboolela bari, “Mamawo nende abasiani benywe bali elwanyi benyanga okhukhulola.”

³³Yesu nabakalusia nabareeba ari, “Mama wanje niwina? Ne abasiani befwe nibabo wina?”

³⁴Nahenga eyi nende eyi khubandu abali nibekhale nibamubotokhane naboola ari, “Mama wanje nende abasiani befwe mbabano!

³⁵Omundu yesi yesi oukholanga aka Nyasaye yenya, omwenoyo niye omusiani wefwe, omukhaana wefwe, khandi mama wanje.”