Read wanga MARIKO 4 Bible Online

MARIKO 4 - wanga bible

MARIKO 4

¹Khandi Yesu nachaaka okhwechesia nali khuluchinga lweinyanza ya Galilaya. Ne omukanda kwabandu omukhongo nikumubotokhana. Naye niyenjila muliaro eliali munyanza, ne niyekhalamwo. Nakwo omukanda kwabandu okwo kwosi nikusinjila khuluchinga lweinyanza.

²Mana nabeechesia amakhuwa amanji mutsinjelo. Ne mumechesioke ako nababoolela ari,

³“Recheresie! Inyanga yindi, omundu yarula natsia okhumiitsa imwo.

⁴Ne olwa yamiitsa, imwo yindi yakwa khunjila, ne amanyonyi niketsa nikachibootsa.

⁵Imwo yindi niyikwa khulwanda, aha liloba lilali elinji ta, niyimela lwangu, shichila liloba shiliali elinji tawe.

⁶Ne lwomubasu kwakha omunji, kwasamba imbale eyo, ne khulwa okhuba yali niyibula emisi, yamala niyifululukha niyuma.

⁷Imwo yindi yakwa mumahwa, ne olwa kakhula lwangu nikachitiiya mana imbale eyo niyikhuunya okhukhula niyilaamakhwo ebiamo tawe.

⁸Nayo imwo yindi niyikwa mwiloba lilayi, niyimela niyikhula, niyaama ebiamo nibitsiililila okhumeetekha akhandi amakhumi kane, eyindi akhandi amakhumi kasasaba, nayo eyindi akhandi eshikhumi.”

⁹Mana Yesu naboola ari, “Ouli namarwi kokhuhulila, ahulile!”

¹⁰Olwa Yesu yali niyakhatong'a yenyene, abamuloondakhwo nende abarume abo ekhumi nababili nibamureeba mbu, abenoosiekhwo eshisina shietsinjelo etsio.

¹¹Naye nabakalusia ari, “Inywe mwahebwa amabiso aka Obwami bwa Nyasaye, nebutswa abali elwanyi wobwami, balechesibwa buli shindu mutsinjelo,

¹²Kho mbu, ‘Bahenje nibahenga, ne nibalalola eshindu ta. Khandi mbu, Bahulile nibahulila, ne nibalamanyilisia eshisina ta. Okhuba bakhetsukhana bekalukhasia mana nibaleshelwa obwonooni bwabwe.’ ”

¹³Kho Yesu nabareeba ari, “Inywe shimumanyile oluchelo luno ta? Kho bulano namukhamanye murie tsinjelo tsindi tsiosi?

¹⁴Omumiitsi amiitsanga likhuwa lia Nyasaye.

¹⁵Ne abandu bandi bali shinga imwo eyamiitswa ne niyikwa khunjila. Olwa bahulila butswa likhuwa, ne Setani yetsa bwangu nende okhubukula likhuwa elo okhurula mubo.

¹⁶Ne imwo eyamiitswa niyikwa khwiloba liokhulwanda, nibo abandu abahulilanga likhuwa, ne bwangu bwene balinjisia mumioyo chiabwe nobusaangaali.

¹⁷Ne shibaralila mulio ta, habula besimilisia butswa hatiiti, ne olwa amatinyu nende obusandibwi bwitsa khulwa likhuwa lia Nyasaye, ne barula khubusuubili bwangu.

¹⁸“Abandi nabo bali shinga imwo eyamiitswa niyikwa mwiloba liamahwa. Abo nibo abalihulilanga likhuwa lia Nyasaye,

¹⁹habula okhuhendela amakhuwa komushialo, okhuchama obuyinda nende obwikombi bwebindu bindi, binjilanga mubo mana bitiiya likhuwa elo nibilikhola okhulekha okhwama ebiamo.

²⁰“Nebutswa imwo eyamiitswa khwiloba lilayi, nibo abandu abahulilanga likhuwa lia Nyasaye, nibalifuchilila mana baama ebiamo, akhandi amakhumi kataru, abandi akhandi amakhumi kasasaba, ne abandi akhandi eshikhumi.”

²¹Mana Yesu nabareeba ari, “Itaha yihafibungwakhwo munzu mana yifuunishilwa mushimwelo noho mulwalo mweshitali? Itaha shiyihafibungwa mana yirenjekhwa khushichibi shiayo noho?

²²Kho shiosi shiosi eshiabiswa, shilabisulwa, ne shiosi shiosi eshiafuunishilwa shilafuunulilwa.

²³Ne yesi yesi ouli namarwi akokhuhulila, ahulile!”

²⁴Mana nababoolela khandi ari, “Muloonde nimutiila obulayi akamuhulilanga. Eshichelo shiene shiamuhaanilangamwo nishio eshiamulahelwamwo. Ne khandi mulameetelwakhwo amanji.

²⁵Shichila ouli ninabio alameetwa ebindi, naye oubula, kata shitiiti eshia ali ninashio, alanuulwa.”

²⁶Yesu naboola khandi ari, “Obwami bwa Nyasaye buli shinga omundu oumiitsa imwo mumukunda.

²⁷Eshilo akonanga tsindoolo, ne eshiteere abuukha naba meeso, ne mubise ebio imwo yirombokha niyikhula. Nebutswa shiamanya shinga olwa yikhulanga tawe.

²⁸Liloba eliene likholanga ebiraache okhumela nibiama ebiamo. Biranjililanga okhurusia emirombo, ne bilosiakhwo okhwakara mana bimalilisia nende okhulaba khweimele yene.

²⁹Ne olwa biba nibilabile, omwene mukunda abukulanga injesoye, nachaaka okhuchesa.”

³⁰Khandi Yesu nabareeba ari, “Khwakhachelasia obwami bwa Nyasaye nende shiina? Kata khwakhekhoonyela luchelo shiina okhubwinoosia?

³¹Obwami bwa Nyasaye buli shinga olufwa lwomutarakwe, olwa lumiitswa mwiloba, nolutuutu muno khubufwa bundi bwosi mushialo.

³²Ne nilumiitsilwe lukhulanga nilwikhola omusaala omukhongo okhushila echindi chiosi. Amasaka kakwo kakhula nikaba amakhongo mbu kata amanyonyi kombakha ebitsu biako mumasaka kakwo.”

³³Yesu yabayaalila amakhuwa amanji mutsinjelo tsindi tsinyinji shinga etsio, shinga olwa bakhanyalilwa okhulihulila.

³⁴Shiyaboolakhwo ninabo nalekhoonyeele oluchelo ta, habula nali yenyene nende abeechibe, yabenoosilinjia buli shindu.

³⁵Khunyanga yene eyo nibwakhela, Yesu yaboolela abeechibe ari, “Chende khwambushe khutsie injelekha weinyanza.”

³⁶Ne nibalekha omukanda, nibenjila muliaro lia Yesu yali niyekhalemwo, nibatsia halala ninaye. Ne amaaro kandi kali nikaliho.

³⁷Mana imbumbuyeka ikhongo niyichaaka okhuhutsa. Ne amarunda kamaatsi nikekhupa muliaro, amaatsi nikachaaka okhwitsulamwo.

³⁸Ne Yesu yali niyekhaale inyuma weliaro niyeyichiishe omuto, nakonanga tsindoolo. Abeechibe nibamubuusia nibamureeba bari, “Omwechesia, shiotebakhwo mbu khuli ahambi okhufwa ta?”

³⁹Naye Yesu nabuukha nahalabila imbumbuyeka eyo, ne naboolela inyanza ari, “Holeela! Wihotselesie!” Habwene nahabwene, imbumbuyeka niyihotselesia, ne omulenjeelo omukhongo nikubaho.

⁴⁰Kho Yesu nareeba abeechibe ari, “Eshichila nimuria nishiina? Mubula obusuubili noho?”

⁴¹Bahuka muno, nibareebana abeene khu beene bari, “Kho uno naye niwiina, mbu kata imbumbuyeka nende amarunda keinyanza bimuhulilanga?”