Read wanga MARIKO 6 Bible Online

MARIKO 6 - wanga bible

MARIKO 6

¹Yesu yarulaho natsia ewabwe bwene wa yebulwa. Nabo abeechibe, nibamulondakhwo.

²Mana khunyanga eya Isabato, Yesu yachaaka okhwechesia musinagogi. Ne abanji abahulilakhwo amechesioke, bahuka muno nibareebana bari, “Omundu uno yanyoola hena amakhuwa ako koosi? Nobumanyilisi shiina obwa yahebwa buno? Nakamakana shiina akakholanga kano?

³Uno shiali niye omubaatsi ulia, omwana wa Mariamu, khandi omwana wabwe Yakobo, Yosefu, Yuda nende Simoni? Ne kata abakhaana babwe shikhuli ninabo hano?” Mana nibamuloba.

⁴Naye Yesu nababoolela ari, “Omulakusi shiabulanga oluyali ta, okhuyiniakhwo abomushialoshie, aboluyialwe nende abomunzu yabwe beene nibo abalamuhelesinjia oluyali tawe.”

⁵Ne shiyakholakhwo eshiamakana eshikhongo yaho tawe. Habula yara emikhonochie khubalwale nabo nibahona.

⁶Kho nahuka muno khulwa obulasuubila bwabwe mu Nyasaye. Mana Yesu natsia mumataala kalondokhane niyechesinjia abandu.

⁷Mana nalanga abeechibe abo ekhumi nababili nababoolela mbu betse aha yali, ne nachaaka okhubaruma babili, babili, nabahelesia obunyali khubishieno.

⁸Khandi nabakania obutinyu naboola ari, “Mulabukulekhwo eshindu shiosi shiosi khulwa oluchendo ta, habula omutunga kwonyene. Mulabukulekhwo eshiokhulia, iloloti yokhusumilamwo kata amapesa mutsingubo tsienywe tawe.

⁹Nebutswa muchendelenje tsingato khandi mwifwalenje ingubo indala, shimulachinga eyindi tawe.”

¹⁰Nababoolela khandi ari, “Ewa mwinjisibwa munzu, menyemwo okhuula olwa murula mwitaala omwo.

¹¹Ne habundu hosi hosi aha abandu baloba okhumwinjisia, noho okhuhulila aka mubayaalila, muruleho nimubungulula olufu okhurula khubilenje bienywe, shibe eshilolelo khubo!”

¹²Kho nibarula nibatsia okhuyaala mbu abandu bekalukhasie bahonibwe.

¹³Barusia ebishieno ebinji mubandu, nibabakha abalwale abanji amafura nibabahonia.

¹⁴Omuruchi Herode yahulilakhwo ifuma ya Yesu, shichila eliira lia Yesu liali nilimalile okhumanyikha buli habundu. Abandi baboola bari, “Yohana Omubatiisi yalamusibwe okhurula mubafu, niko akachila obunyali buno nibukhola emilimo muye.”

¹⁵Ne abandi nabo baboola bari, “Ni Eliya.” Nabo abandi nibaboola bari, “Nomulakusi, ouli mulala khubalakusi bakhale.”

¹⁶Ne olwa Herode yahulilakhwo yaboola ari, “Yohana wandakhalaka omurwe alamusibwe!”

¹⁷Okhuba Herode yali niyaruma abandu okhutiila Yohana, mana nalaka mbu, abohwe mumbohe. Herode yakhola akene ako khulwa okhumuchamisia Herodia, omukhasi wa Filipo omusiani wabwe Herode, okhuba Herode yali niyateshia Herodia.

¹⁸Okhuba Yohana yali niyakaania Herode naboola ari, “Nomusilo iwe okhubukula omukhasi womusiani wenywe, naye omwene nashiliho mwoyo.”

¹⁹Naye Herodia yali niyabishila Yohana likhobo mumwoyokwe khandi nakhabanga okhumwira. Nebutswa shiyanyalilwa tawe.

²⁰Shichila Herode yali niyahelesia Yohana oluyali, okhuba yali niyamanya mbu, Yohana nomundu omulunjishi khandi oubula eshikha, kho yamulindanga obulayi. Herode yasangalanga okhuhulila amakhuwa ka Yohana, nebutswa olunyuma lwokhuhulila amakhuwake ako yabeyabeya mumwoyokwe muno.

²¹Obwiyangu bwokhwiira Yohana bwanyoolekha olwa Herode yakaasia lisabo liokhwitsulila inyanga eyayebulilwakhwo. Yalanga abandube aboluyali, nabemilisi belihe nende abakhongo bolukongo lwa Galilaya lwosi.

²²Ne lwomukhaana wa Herodia yenjila ewa bali, ne nashina obulayi, yachamisia Herode nende abachenibe boosi. Kho omuruchi naboolela omukhaana oyo ari, “Saba shiosi shiosi eshia wikomba, nasi ndalakhuhelesia.”

²³Mana namwitsubila ari, “Shiosi shiosi shiosaba ndalakhuhelesia, kata niyakhaba inusu yoburuchi bwanje.”

²⁴Omukhaana oyo narula natsia elwanyi nareeba nyinamwana ari, “Esabe shiina?” Nyinamwana namukalusia ari, “Saba omurwe kwa Yohana Omubatiisi.”

²⁵Omukhaana oyo yakalukha bwangu bwangu matetekhana naboolela omuruchi ari, “Enzenya bulano buno umbelesie omurwe kwa Yohana omubatiisi khulutelu.”

²⁶Mana omuruchi nabeelela muno. Nebutswa khulwa eshitsubo eshia yali niyetsubile imbeli wabachenibe, shiyayenya okhuchweya okhuusia eshia yali nasuubisiiye omukhaana oyo tawe.

²⁷Kho habwene nahabwene omuruchi naruma omusikari, namulaka atsie areere omurwe kwa Yohana. Mana omusikari natsia mumbohe nakhalaka omurwe kwa Yohana,

²⁸nareerera omuruchi nakuchinjile khulutelu nahelesia omukhaana oyo, naye nakuhaana khunyina mwana.

²⁹Kho olwa abeechi ba Yohana bahulilakhwo, betsa nibabukula omubilikwe nibakwalisia mung'ani.

³⁰Abarume nibakalukha khu Yesu nibamuboolela koosi aka bali nibakholile nende okhwechesia.

³¹Mana Yesu naboolela abeechibe ari, “Chende khutsie habundu aha abandu balali ta muhulushekhwo hatutu.” Yaboola ario shichila abandu abetsangaho nibatsia bali abanji muno, kata Yesu nende abechebe shibaalikhwo nobwiyangu bwokhulia tawe.

³²Kho nibenjila muliaro nibatsia habundu aha bandu balali ta.

³³Nebutwa abandu abanji babalola nibatsitsanga, ne nibabamanyilisia. Mana abandu abanji nibetsa okhurula mu buli litookho, nibatsia tsimbilo ne nibaranjilila okhuula habundu tsana aho, Yesu nende abeechibe nibashili.

³⁴Ne olwa Yesu yarula muliaro yalola omukanda kwabandu omukhongo ne nabalolela tsimbabasi, shichila bali shinga amakondi akabula omwayi. Kho nachaaka okhubechesia amakhuwa amanji.

³⁵Olwa eshialo bwela, abeechibe betsa nibamuboolela bari, “Hano nihabundu aha bandu balali ta, ne bulano bwakhela.

³⁶Kho baseebule batsie mumatookho nende mutsisoma tsirondokhane nende hano, bakule eshiokhulia.”

³⁷Nebutswa Yesu yakalusia abeechibe ari, “Inywe mubahelesie eshiokhulia.” Nabo nibamureeba bari, “Wenya mbu khutsie khukule emikaate echihela tsidinari ebikhumi bibili khubahelesie balie noho?”

³⁸Naye nabareeba ari, “Muli nemikaate chinga? Tsie mulolekhwo!” Ne olwa batsia okhulola, bamuboolela bari, “Khuli nemikaate chirano nende tsinyeni tsibili.”

³⁹Mana Yesu nalaka abeechibe okhwikhasia abandu hasi khubunyasi mumikanda.

⁴⁰Kho abandu nibekhala hasi mumikanda chiebikhumi ebikhumi nende echia amakhumi karano karano.

⁴¹Ne Yesu nabukula emikaate chirano echio nende tsinyeni tsibili etsio, nahenga hekulu mwikulu, nabisabila tsikhabi. Kho nasonyola emikaate echio nahelesia abeechibe okhukabila abandu. Khandi nasonyola tsinyeni tsibili etsio nabakabila boosi.

⁴²Mana boosi nibalia nibekura.

⁴³Kho abeechibe nibakhung'asia ebisonye biemikaate nende ebietsinyeni ebiali nibitoonyile, nibitsula ebimwelo ekhumi nabibili.

⁴⁴Ne abandu abalia emikaate netsinyeni bali abasaatsa ebikhumila biraano.

⁴⁵Bwangu bwene obwo, Yesu yaboolela abeechibe okhwinjila muliaro mbu bamuranjilile okhutsia Betsisaida, injelekha weinyanza, naye nashiseebula emikanda chiabandu.

⁴⁶Olunyuma lwokhubaseebula, yatikulukha khushikulu okhusaaya.

⁴⁷Ne olwa bwela, eliaro liali hakari munyanza, naye Yesu yali yenyene khuluchinga.

⁴⁸Mana nalola mbu abeechi bali nibanyakhananga okhufuka eliaro, shichila omuyeka kwali nikuhutsanga okhurula imbeli wabwe. Ne olwa eshialo bwali nibushietsanga, Yesu yachenda khumaatsi natsia aha bali, ne nachenda shinga oubabirakhwo.

⁴⁹Nebutswa olwa bamulola nachendanga khumaatsi, bapaara mbu, neshishieno mana nibayula obutinyu.

⁵⁰Boosi olwa bamulola ikholo yabarumukha. Mana bwangu bwene obwo, Yesu nababoolela ari, “Muume ikholo, nisie, mularie tawe.”

⁵¹Mana nanina muliaro omwa bali. Ne omuyeka nikuleenjeela. Nabo nibang'ang'aala butswa.

⁵²Okhuba shibamanyilisia eshisina shiabandu ebikhumila birano okhulia emikaate tawe. Bali nibashisiluhalile butswa.

⁵³Kho olwa bambukha inyanza, boola injelekha wa Genesareti ne nibaboha eliaro liabwe khulukuku lweinyanza.

⁵⁴Ne olwa barula muliaro bwangu bwene obwo, abandu balola Yesu nibamumanya.

⁵⁵Kho nibelukha tsimbilo nibatswania ifumaye mutsingongo tsiosi etsirondokhaneho. Ne hosi aha baboolelungwa mbu, Yesu yetsileho, bachinjilanga abalwale babwe khumacheela nibabayilaho.

⁵⁶Mana buli hosi aha Yesu yatsitsanga, mumataala, mumatookho kata mutsisoma, abandu bachinganga abalwale nibabara khubiiro, ne nibamusaaya mbu afuchilile abalwale batiilekhwo kata khwichemo lieinguboye lionyene. Ne shinga olwa abanji batilangakhwo, bahonanga.