Read wanga MARIKO 7 Bible Online

MARIKO 7 - wanga bible

MARIKO 7

¹Olwa Abafarisayo nende abandi khubahandichi bamalako, abali nibarulile Yerusalemu bakhung'ana aha Yesu yali,

²balola mbu balala khubeechibe bali nibaliitsanga namakhono kafwabiibwe, eshisina mbu, amakhono kalasaabilwe tawe.

³(Okhuba Abafarisayo nende Abayahudi boosi shibafuchililungwa okhulia nibalasaabile amakhono kabwe ta, okhuula basaabe mbeli. Bakholanga bario khulwokhusia akemilukha chiabakuuka babwe.

⁴Khandi olwa baba nibarula khushiiro, shibafuchililungwa okhulia eshiokhulia eshia barusiye khushiiro nishishili okhwosibwa obulayi, kata nibashili okhwisiiya abeene tawe. Khandi chiliho emilukha chindi ebinji, echiabahebwa, echiabakholanga, njiechino mbu, okhwosia ebikombe, tsinyungu nende ebikaye, ebiakaasibwa okhurula khumukasa.)

⁵Kho Abafarisayo nende abahandichi bamalako nibareeba Yesu bari, “Nishiina eshichilanga abeechibo nilabamenya okhulondana nemilukha chiabakuuka befwe bakhuleshela nende okhuhesia akabakhwechesia ta, nebutswa baliitsanga ebiokhulia nibalasaabile amakhono kabwe tawe?”

⁶Yesu nabakalusia ari, “Isaya yalakula habwene khwinywe abekaati, shinga olwa kahandikwa kari nanwa mbu, ‘Abandu bano bambetsanga oluyali mumakhuwa komunwa butswa, ne emioyo chiabwe chili ehale ninasi.

⁷Banzinamilanga obwinamili bwa butswa, okhuba aka bechesinjia namalachilisio kabandu nabandu butswa!’

⁸Mulekhanga lilako lia Nyasaye ne nimuhanda khu milukha chiabandu.”

⁹Khandi Yesu nababoolela ari, “Muli nende injila indayi muno eya mulobelangamwo amalako ka Nyasaye kho mbu mulonde emilukha chienywe.

¹⁰Okhuba Musa yalaka mbu, ‘Helesinjia papawo nende mamawo oluyali,’ khandi mbu ‘Ounyeka papawe kata mamawe, okhuula yeerwe.’

¹¹Nebutswa inywe mwechesinjia muri, ‘Omundu naba naboolela samwana noho nyinamwana mbu, inganga yamwakhanyoolilekhwo okhurula khwisie ni Koribani (Eshisina mbu, eshihaanwa khu Nyasaye),’

¹²bulano shimufuchililanga omundu oyo okhukholelakhwo samwana kata nyinamwana eshindu shiosi shiosi tawe.

¹³Khulwa amechesio kamwechesinjia, mufwabinjia likhuwa lia Nyasaye, nende akandi amanji akamukholanga.”

¹⁴Khandi Yesu nalanga abandu okhwitsa ewa yali, ne nababoolela ari, “Mumbulile inywe mwesi mana mumanyilisie eshisina shielikhuwa lino.

¹⁵Eshinjilanga mumundu, shishimwonooninjiakhwo ta, habula eshirulanga muye nishio eshimwonooninjia [

¹⁶Ne ouli namarwi kokhuhulila, ahulile!”]

¹⁷Ne Olwa yalekhana nabandu niyenjila munzu, abeechibe bamureeba mbu abenoosiekhwo khukoluchelo olwo.

¹⁸Mana Yesu nabareeba ari, “Khane mwesi shimuli nobumanyilisi ta? Shimumanyile mbu eshinjila mumundu nishirula elwanyi shishimwonoonia ta?

¹⁹Shichila shishinjilanga mumwoyokwe ta, habula mundamwe ne nishirula elwanyi.” Kho mukhuboola ako, Yesu yafuchilila mbu ebiokhulia biosi nebisiiyikhu khulwa okhuliibwa.

²⁰Nameeta okhuboola ari, “Ne eshirulanga mumundu nishio eshimwonooninjia.

²¹Okhuba mumwoyo kwomundu mukari, karulangamwo amapaaro amabi akemililanga omundu okhukhola obuyilani, obwifi, obwiiri, obuheyi,

²²obwikombi obumayanu, obukaati, obwilaasi, imbalikha, okhuchiikha, okhwichinjimisia nende obuyingwa.

²³Amakhuwa amabi ako koosi karulanga mumundu mukari nikamwonoonia.”

²⁴Mana Yesu narulaho natsia ehale mungongo tsia Tiro nende Sidoni.[8] Mana niyenjila munzu nalenya omundu yesi yesi okhumanya mbu alimwo ta, nebutswa, shikanyalikha okhubiswa tawe.

²⁵Ne habwene na habwene omukhasi undi, owomwanawe omukhaana omutiiti yali nanyasibungwa neshishieno, yahulila khuka Yesu yali nakholanga. Niyetsa bwangu ewa Yesu yali, ne nakwa mumakuluke namwinamila.

²⁶Omukhasi oyo yali omugiriki, owomuluyia lwa Abasirofoinike, abeshialo shia Siria. Nasaaya Yesu mbu arusie eshishieno mumukhaanawe.

²⁷Naye Yesu namukalusia ari, “Lekha mbeli abaana baliisibwe bekure, okhuba shinobulayi okhubukula eshiokhulia shiabaana nofuubila tsimbwa tawe.”

²⁸Naye omukhasi oyo nakalusia ari, “Omwami, kata tsimbwa etsili hasi weimeesa, tsiliitsanga khumbungulusi tsieshiokhulia etsiabaana babulungusiye.”

²⁹Mana Yesu namuboolela ari, “Khulwa likalusiolio elo, kalukha ingowo. Eshishieno eshio shimalile okhurula mumukhaanawo.”

³⁰Kho omukhasi oyo nakalukha ingowe ne nanyoola omukhaanawe niyeyalisiye khushitali, eshishieno nishimurulilemwo.

³¹Mana Yesu nachelela okhurula mungongo tsia Tiro ne nabirira mu Sidoni, nakholomokha khunyanza ya Galilaya, nabira okhutsia mungongo tsia Dekapoli.

³²Abandu bandi bamureerera omundu owali niyekala amarwi khandi wolulimilwe nilwahanda. Nibamusaaya mbu amurekhwo emikhono.

³³Kho Yesu namubukula namusitia handulo, narula ahomukanda kwali, nara tsinzalatsie mumarwike. Nafuutsa amare, ne natiila khululimi lwomundu oyo.

³⁴Kho Yesu nahenga mwikulu, niyeshia amahumo ne naboolela omundu oyo ari, “Efatsa,” eshisina mbu, “Wikushe!”

³⁵Mana amarwi komundu oyo nikekukha, olulimilwe nilubohololokha, ne nachaaka okhuboola obulayi.

³⁶Ne Yesu nabakaania mbu shibalaboolelakhwo omundu yesi yesi likhuwa elo tawe. Nebutswa olwa yameeta okhubakaania ario, nolwa abandu abo nabo bameeta okhukaboola nibareerekhwo omwoyo.

³⁷Abandu bahuka muno, nibaboola bari, “Akholile ebindu biosi habwene, mbu, kata akholanga abekala amarwi okhuhulila, nende abolulimi lwahanda okhuboola.”