Read wanga MARIKO 8 Bible Online

MARIKO 8 - wanga bible

MARIKO 8

¹Ebise ebio, lwomukanda kwabandu omukhongo kwali nikwikhung'asiye halala khandi, ne shibali nende eshiabalia ta, Yesu yalanga abeechibe ne nababoolela ari,

²“Endolelanga abandu bano tsimbabasi, shichila babeele ninasi bulano khulwa tsinyanga tsitaru ne shibali nende eshia balia ta.

³Kho nebaseebula mbu batsie nango wabwe nibali inzala bario, banyala okhuula khunjila botoshelela, okhuba abandi khubo barulile ehale!”

⁴Mana abeechibe nibamureeba bari, “Omundu yakhaliisia arie abandu bano boosi ebiokhulia mana bekure mushitsiimi mwa khuli muno?”

⁵Naye nabareeba ari, “Muli nemikaate chinga?” Nibakalusia bari, “Musafu.”

⁶Kho nalaka abandu abo boosi okhwikhala hasi. Mana nabukula emikaate musafu echio, nakhupila Nyasaye orio, nachisonyola nahelesia abeechibe okhukabulila abandu, nabo abeechi abo nibakhola bario.

⁷Khandi balikhwo norunyeni orutiiti rutuutu. Yesu narusabila ikhabi ne nalaka abeechibe mbu, okhuula rwosi khandi rukabulilwe abandu.

⁸Mana buli mulala khubo yalia niyekura, ne bali abandu abahela ebikhumila bine (4,000).

⁹Mana abeechibe nibabunjelesia ebitonye ebiatong'a nibitsula ebimwelo musafu.

¹⁰Kho Yesu nabaseebula, ne habwene nahabwene niyenjila muliaro lwangu halala nabeechibe nibatsia mungongo tsia Dalimanutsa.

¹¹Mana Abafarisayo bandi nibetsa khu Yesu ne nichaaka okhuyingana ninaye. Nibamureeba mbu, akholekhwo eshilolelo shiamangaliimwa, nibamureka okhwenya okhumanya nikali mbu ali nobunyali okhurula khu Nyasaye.

¹²Nebutswa Yesu niyeshia amahumo amasiro, ne naboola ari, “Mbushiina abandu bolwibulo luno benyanga eshilolelo shiamakana? Emuboolela toto mbu, eshilolelo shiamakana shishilamanyibwakhwo abandu bolwibulo luno tawe.”

¹³Mana nabalekha, niyenjila muliaro, ne niyambukha natsia injelekha undi weinyanza.

¹⁴Ne abeechibe bali nibebiliile okhubukula emikaate echibahela, bali butswa nende omukaate mulala kwonyene muliaro.

¹⁵Yesu nabachetsiyia naboola ari, “Mube meeso, nimwiliinda abeene okhurula khwimela elia Abafarisayo nende elia Herode.”

¹⁶Nabo nibachaaka okhuboolelana abeene khu beene bari, “Shikhulikhwo nemikaate tawe.”

¹⁷Yesu yali namanyile akabali nibaboolanga, ne nabareeba ari, “Mureebananga murie mbu, shimulikhwo nemikaate ta? Mushili kata okhumanyilisia okhuula khushisina ta? Emioyo chienywe chishiumilaane butswa?

¹⁸Muli netsimoni ne shimulolanga ta? Muli namarwi ne shimuhulilanga ta? Khandi inywe shimwitsulilanga ta?

¹⁹Olwa ndasonyola emikaate chirano khulwa abandu ebikhumila biraano (5,000), mwabunjelesia ebitonye nibitsula ebimwelo binga biosi halala?” Nibakalusia bari, “Biali ebimwelo ekhumi nabibili.”

²⁰“Khandi olwa ndasonyola emikaate musafu khulwa abandu ebikhumila bine (4,000), mwabunjelesiye ebitonye nibitsula ebimwelo binga biosi halala?” Nibakalusia bari, “Musafu.”

²¹Khandi nabareeba ari, “Kata okhuula bulano mushili okhumanyilisia ta?”

²²Mana niboola Betsisaida, ne abandu bandi nibareerera Yesu omubofu nibamusaaya mbu nachama, amutiilekhwo amakhonoke.

²³Kho Yesu natiila omubofu oyo omukhono namurusia mwitaala. Ne olwa yali nafutsile amare khumoni tsiomubofu oyo, Yesu yamala natsitiilakhwo amakhono, ne namureeba ari, “Ololangakhwo eshindu shiosi shiosi?” .

²⁴Mana omundu oyo nahenga ikulu ne naboola ari; “Endolanga abandu habula balolekhanga shinga emisaala echichendanga.”

²⁵Kho Yesu khandi natiila amakhonoke khumoni tsiomundu oyo, ne bulano omundu oyo nahenga niyomisia tsimonitsie mana nitsihona, ne nalola ebindu biosi obulayi.

²⁶Mana Yesu namuseebula mbu akalushe nangowe shilunji, nende okhumulachilisia ari, “Shiolenjilakhwo kata mwitaala lia Betsisaida tawe.”

²⁷Mana Yesu narula nabeechibe, nibatsia mumataala ka Kaisaria Filipi. Nibali khuluchendo olwo, Yesu nabareeba ari, “Mboolelekhwo, abandu baboolanga mbu, nisie wina?”

²⁸Nabo nibamukalusia bari, “Baboolanga mbu niwe Yohana Omubatiisi, abandi mbu niwe omulakusi Eliya, nabo abandi bari, oli mulala khubalakusi.”

²⁹Ne nabareeba ari, “Nenyu muboolanga mbu nisie wina?” Petero nakalusia ari, “Niwe Kristo.”

³⁰Naye nabakaania obutinyu mbu shibalaboolelakhwo omundu yesi yesi tawe.

³¹Mana Yesu nachaaka okhubeechesia ari, “Omwana womundu okhuula alabirira mumatinyu amanji, ne alalobwa nabakhulundu babesaaliisi nende abahandichi bamalako. Aleerwa, nebutswa khunyanga yakhataru alalamukha.”

³²Yesu yaboola amakhuwa ako habulafu obulabisakhwo tawe. Mana Petero naye nayila Yesu halubeka ne nachaaka okhukondeshela nende okhumukaania.

³³Nebutswa Yesu yashiukhana, nahenga abeechibe, nakondeshela Petero namukania naboola ari, “Rula ahendi, iwe Setani! Okhuba shioli owelubeka lwa Nyasaye ta, habula oli elubeka lwabandu.”

³⁴Mana Yesu nalanga abomukanda, nabeechibe mbu betse khuye. Ne nababoolela ari, “Omundu yesi owenya okhunondakhwo, okhuula yekane omwene, yetuushe omusalabakwe, mana yanondekhwo.

³⁵Okhuba owenya okhuhonia obulamubwe omwene, alabukosia. Nebutswa oukosia obulamubwe khulwanje nende khulwa Injiili, alabuhonia.

³⁶Nakeinganga shiina omundu okhunyoola eshialo shiosi, ne, akosie obulamubwe?

³⁷Shiakhaba shiina eshiomundu yakhahaana mushilenje shiobulamubwe?

³⁸Kho omundu yesi yesi oufimbilwa isie omurwe khandi oufimbilwa omurwe amakhuwa kanje mulwibulo luno olwobuyilani khandi olwobwonooni, Omwana womundu naye alamufimbilwa omurwe olwa yetsa muluyali lwa Samwana, halala nende olwa abamalaika abatakatifu.”