Read wanga MARIKO 9 Bible Online

MARIKO 9 - wanga bible

MARIKO 9

¹Khandi Yesu nababoolela ari, “Emuboolela toto mbu, baliho abandi khubasinjiile hano, shibakhafwekhwo ta, okhuula olwa bakhabe nibaluutsi Obwami bwa Nyasaye nibwitsile nende oluyali.”

²Kho olunyuma lwetsinyanga tsisasaba, Yesu yabukula Petero, Yakobo, nende Yohana, nabemilila nibanina khushikulu eshiraambi ewa bali butswa bonyene. Mana nakalulwa likondolie imbeli wabwe.

³Kho ebifwalobie nibing'inang'ina, nibiba ebilafu tswe okhushilakhwo shinga lwomundu wokhushialo khuno anyala okhubiosia nibilaba.

⁴Mana Eliya nende Musa nibabaloleshela, ne bali nibaboolanga nende Yesu.

⁵Kho Petero naboolela Yesu ari, “Omwami, nobulayi shila khuli hano! Lekha khumbashe hano amatili kataru, elala elilio, elala elia Musa, nelindi elia Eliya.”

⁶Petero yaboola ario shichila shiyali namanyile eshianyala okhuboola tawe, okhuba bali nali nende oburi obunji muno.

⁷Mana lileesi nilitsa nilibafwimba nibaba mushiinikha shialio, nakwo omwoyo nikurula mwileesi elo nikuboola kuri, “Uno niye Omwana wanje omuheelwa, mumuhulilenje!”

⁸Mana khandi olwa bahenga bwangu, shibalolakhwo omundu yesi yesi nali ninabo ta, habula balola Yesu yenyene.

⁹Ne olwa bali nibakholomokhanga okhurula khushikulu, Yesu yabakaania mbu balaboolelakhwo omundu yesi yesi aka bali nibaluutsi tawe, okhuula olwa Omwana womundu yakhabe nalamuushe okhurula mubafu.

¹⁰Kho nabo nibaholeela nelikhuwa lienelo bonyene, nibarebana abeene khu beene bari, “Eshisina shielikhuwa mbu, ‘Okhulamukha okhurula mubafu’ nishiina?” Ne shibaboolelakhwo omundu yesi yesi likhuwa elo tawe.

¹¹Nibareeba Yesu bari, “Shichila shiina abahandichi bamalako baboolanga mbu okhuula omulakusi Eliya aranjilile okhwitsa?”

¹²Naye Yesu nabakalusia ari, “Toto mwene Eliya aranjilila okhwitsa okhukaasia narechekha ebindu biosi. Ne kakhahandikwa karie khu Omwana womundu mbu, okhuula abirire mumatinyu amanji khandi mbu alobwe nabandu?

¹³Nebutswa isie emuboolela mbu, Eliya oyo yamala okhwitsa, ne abandu bamukholela koosi kabeene balola mbu namalayi okhumukholela, shinga olwa Amahandiko kahandikwa khuye.”

¹⁴Ne olwa bachelela ewa abeechibe bandi bali, balola omukanda kwabandu omukhongo nikubotokhaane abeechi abo. Ne abahandichi bamalako bali nibayingananga ninabo.

¹⁵Ne habwene nahabwene olwa abomukanda abo balola Yesu, besundukha muno, nibatsia tsimbilo ewa yali okhumushiesia.

¹⁶Mana Yesu nabareeba ari, “Eshia muyingananga ninabo nishiina?”

¹⁷Kho Mulala khubomukanda abo namukalusia naboola ari, “Omwechesia, ekhureerere omusiani wanje, shichila ali neshishieno shiokhwikala amarwi.

¹⁸Buli lwosi olwa shimutiilanga shimukhupanga hasi, lifilo lirula mumunwakwe, alumasia ameenoke halala, ne omubilikwe kwosi kuumilana kaka kaka okwolanyala okhufumba tawe. Ne embooleele abeechibo okhushirusia, nebutwa bakhayilwe.”

¹⁹Mana Yesu nabakalusia ari, “Oo, inywe olwibulo lubula obusuubili luno! Ndalabetsanga ninenywe okhuula liina? Ndalamwisumilisilia okhuula liina? Ndeerere omwana tsana oyo!”

²⁰Kho nibareerera Yesu omusiani oyo. Ne olwa eshishieno eshio shialola Yesu, habwene nahabwene shiatechesia omusiani oyo, nishimukwisia hasi nishimukalakasia, ne lifilo nilirula mumunwakwe.

²¹Mana Yesu nareeba Samwana omwana oyo ari, “Noluhoono shiina olwa amalile nali ari nanwa?” Naye samwana omwana nakalusia ari, “Okhurula niyebulwa.

²²Ne akhandi akhanji shimukhupanga mumulilo nende mumaatsi, nishienya okhumwiira. Ne noba nonyala okhukholakhwo eshindu shiosi, khulolelekhwo tsimbabasi mana okhukhoonye.”

²³Yesu namuboolela ari, “Noba nonyala! Ebindu biosi binyalikha khumundu ousuubila.”

²⁴Habwene nahabwene samwana omwana nayiiba naboola ari, “Esuubiile! Khoonyakhwo obulasuubila bwanje!”

²⁵Ne Yesu olwa yalola mbu, abomukanda betsanga nibelukha, yakondeshela eshishieno eshio nashiboolela ari, “Iwe eshishieno eshiokhwikala amarwi nende eshiokhuhanda olulimi, ekhulaka mbu, orule mumwana uno ne olamwinjilamwo khandi tawe.”

²⁶Ne olunyuma lwokhwayula obutinyu, eshishieno eshio shiakwisia omusiani oyo hasi nishimurulamwo, ne nalambaala hasi shinga oufwile. Kho abanji khubaliho nibaboola bari, “Afwile.”

²⁷Nebutswa Yesu yamutiila omukhono namubuusia, ne omusiani oyo nasinjila.

²⁸Ne olwa Yesu yali niyenjiile munzu, abeechibe nibamureeba mabiswi bari, “Shichila nishiina ifwe nikhukhaywa okhurusia eshishieno eshio?”

²⁹Naye nabakalusia ari, “Eshishieno shieimbia eyo shishinyala okhurusibwa nende eshindu shindi shiosi shiosi ta, habula amasaayo nende okhwiyima ebiokhulia khulwa okhusaaya.”

³⁰Yesu nabeechibe nibarulaho nibabirira mu Galilaya. Ne nalenya mbu omundu yesi yesi amanye aha yali tawe,

³¹okhuba yali niyechesinjia abeechibe, nababoolela ari, “Omwana womundu yetsa okhuhaanwa mumakhono kabandu ne balamwiira. Ne olwa alaba niyeerirwe namalile tsinyanga tsitaru, alalamukha.”

³²Nebutswa shibamanya eshisina shiamakhuwa ako ta, mana nibaria okhumureeba.

³³Yesu nabeechibe niboola Kaperinaumu. Ne olwa yali niyenjiile munzu, yareeba abeechibe ari, “Muyingaanenje shiina khunjila?”

³⁴Nebutswa baholeela, shichila bali nibayingaanenje abeene khu beene mbu, omukhongo muno okhushila boosi niwiina?

³⁵Ne yamala niyekhala hasi, nalanga abeechibe ekhumi nababili ne nababoolela ari, “Omundu yesi yesi niyakhenya okhuba owambeli, okhuula abe owokhumalilikha muboosi khandi okhuula abe omukhalabani wa boosi.”

³⁶Kho nabukula omwana omutiiti namura hakari wabwe, namutiila mumakhonoke nababoolela ari,

³⁷“Omundu yesi yesi owinjisia omwana shinga uno muliira lianje, aba niyanyinjisia isie. Ne omundu yesi yesi ounyinjisia, shiyanjisia isie sienyene ta, habula yenjisiye isie nende owaruma.”

³⁸Yohana naboolela Yesu ari, “Omwechesia, khwalutsi omundu undi narusinjia ebishieno muliiralio, nikhumukaania, shichila shiyali owomukanda kwefwe tawe.”

³⁹Ne Yesu nababoolela ari, “Shimulamukaanie ta, shichila abulaho omundu yesi yesi oukhola akamangaliimwa muliira lianje, ne niyakhamala okhukakhola, akalukhane habwene nahabwene okhuboola amakhuwa amabi khwisie tawe.

⁴⁰Okhuba oulali omusuku wefwe ta nowolubeka lwefwe.

⁴¹Okhuba emuboolela toto mbu, omundu yesi yesi oumuhelesia eshikombe shiamaatsi, shichila muli abalondi banje, shiyakhakosiekhwo eshihaanwashie kata nahatuutu tawe.

⁴²“Ne omundu yesi yesi naba nachila mulala khubaana abatiiti abasuubilanga mwisie, okhwonoona, bwakhabeele obulayi khu watsana oyo okhubohwa lichina likhongo mwikosilie ne nasukunwa munyanza.

⁴³Ne omukhonokwo, nikuba nikukhukhola okhwonoona, okukhalache kuruleho. Nobulayi okhwinjila mubulamu bweinziayo nobula omukhono mulala, okhushila okhutsia mumulilo kulasimanga ta noli nemikhono chibili. [

⁴⁴“Ebweneyo ‘Tsinyende etsibalitsanga shitsifwitsanga ta, khandi omulilo okubasambanga, shikusimibungwa tawe.’]

⁴⁵Ne eshilenjeshio nishiba nishikhukhola okhwonoona, oshikhalache shiruleho. Shichila nobulayi okhwinjila mubulamu bweinziayo neshilenje shilala, okhushila okhutsia mumulilo kulasimanga ta nebilenje bibili. [

⁴⁶“Ebweneyo, ‘Tsinyende etsibalitsanga shitsifwitsanga ta, khandi omulilo okubasambanga, shikusimibungwa tawe.’]

⁴⁷Ne khandi imoniyo niyiba niyikhukhola okhwonoona, ochitsomole ochirusie, nobulayi okhwinjila Mubwami bwa Nyasaye noli neimoni ndala, okhushila okhutsia mumulilo noli netsimoni tsibili.

⁴⁸Ebweneyo ‘Tsinyende etsibalitsanga shitsifwitsanga ta, khandi omulilo okubasambanga shikusimibungwa tawe’.

⁴⁹“Okhuba buli mundu yakhasiiywe nomulilo shinga lwomusango omusambe kusiiyungwa nomunyu.

⁵⁰Omunyu nomulayi, nebutswa nikuba nitsinziba, wakhakalusiamwo orie eshinosi shiakwo eshio? Mube nomunyu mwinywe khandi mube nomulembe abeene khu beene.”