Read wanga LUKA 10 Bible Online

LUKA 10 - wanga bible

LUKA 10

¹Olunyuma lwako, Omwami yaahula abandi amakhumi musafu nababili,[4] nabaruma babili babili imbeliwe mubuli litookho nende habundu hosi aha omwene yali nali okhutsia.

²Mana nababoolela ari, “Lichesa nilikhoongo, nebutswa abakholi nibatiiti. Kho musaaye Omwami omwene lichesa mbu, arume abakholi mwichesa lilie.

³Tsie, isie emurumanga shinga ebimeeme biamakondi hakari mubisutse.

⁴Mulachingakhwo iloloti yamapesa, kata omufuko, kata ebilaaro, kata mulashiesiakhwo omundu yesi yesi khunjila tawe.

⁵Munzu yosi yosi eyamwinjilamwo, muranjilile okhuboola muri, ‘Omulembe kube munzu muno.’

⁶“Ne omundu wachama omulembe naba nalimwo, omulembe kwenywe kulatong'a khuye. Ne naba nabulamwo, omulembe kwenywe kulamukalushila abeene.

⁷Ne mwikhale munzu eyo nimulia nimunywa ebia bamuhelesia, okhuba omukholi wemilimo akhoyile okhuhebwa omurungokwe. Shimulachendachenda okhurula munzu ndala okhutsia muyindi tawe.

⁸Olwa mwinjila mwitookho mana bamwinjisie, mulie ebia bamuhelesia.

⁹Muhonie abalwale abali mwitookho omwo, mana muboolele abandu balimwo mbu, ‘Obwami bwa Nyasaye busitile ahambi ninenywe!’

¹⁰Ne buli olwa mwinjila mwitookho nibalamwinjisia ta, murule ebulafu khutsinjila nimuboola muri,

¹¹‘Kata olufu lwomwitookho lienywe, oluhandile khubilenje biefwe khulurusiakhwo nikhumufukula inywe. Kata kario mwitsulile mbu, Obwami bwa Nyasaye busitile ahambi!’

¹²Emuboolela toto mbu, khunyanga yokhuyaasibwa, Nyasaye aliba netsimbabasi khu Sodomu okhushila khwitookho elo!”

¹³“Oli mushilaamo shiobubi, iwe Korasini! Oli mushilaamo shiobubi iwe Betsisaida! Okhuba akamangaliimwa akakholwa mwinywe nikaba mbu, niko akakholwa mushialo shia Tiro nende eshia Sidoni, khane baba bekalukhasia khale. Bakhekhaale nibefwalile amakunia, nibepuuchile likoshe okhumanyia mbu, baleshile obwonooni bwabwe.

¹⁴Kata kario khunyanga yokhukhalachilwa eshiina, Nyasaye alihelesia inywe eshinyasio eshikhongo okhushila eshia alihehelsia Tiro nende Sidoni.

¹⁵Nawe Kaperinaumu, wenya okhwichiinguula okhuula mwikulu? Oleeshibwa hasi okhuula olwa wikhola emakombe!”

¹⁶Mana Yesu naboolela abeechibe ari, “Oumuhulila inywe, yambulila isie! Ne oufukula inywe, afukula isie. Naye oumufukula isie afukula oyo owaruma isie.”

¹⁷Abeechi amakhumi musafu nababili abo bachelela nobusaangaali obunji nibaboola bari, “Omwami, kata ebishieno bikhuhuliile olwa khubihalabiile muliiralio.”

¹⁸Yesu nababoolela, ari, “Enduutsi Setani nakwitsanga hasi shinga oluhenu okhurula mwikulu.

¹⁹Lole, emuhelesiye inywe obunyali okhuseena khutsinzokha nende khumakhala, nende okhuhula obunyali bwosi bwomusuku oyo, ne shibulaho eshilamusaalisia inywe tawe.

²⁰Nebutswa mulasaangaale shichila mbu, ebishieno bimuhulilanga ta, habula musaangaale mbu, ameera kenywe kahandikwa mwikulu.”

²¹Khushise shienesho, Yesu niyetsuulemwo Roho Omutakatifu yasaangaala muno, kho naboola ari, “Papa, Omwami womwikulu nende mushialo! Ekhukhupila orio, shichila iwe wabisa amakhuwa kano khubachesi nende khubobumanyilisi, ne nokabisulila abaana abahele. Habwene, Papa, nolwa iwe wenya mbu, kekholeshe kario.”

²²Mana olunyuma Yesu naboola ari, “Papa wanje yambelesia ebindu biosi. Abulaho oumanyile mbu Omwana niye wiina ta, habula Papa yenyene, khandi abulaho oumanyile mbu Papa niye wiina ta, habula Omwana yenyene, nende abo aba Omwana yahulanga okhubamanyia mbu Papa niye wiina.”

²³Mana Yesu nashiukhana khubeechibe nababoolela mabiswi ari, “Muli neikhabi okhulola aka mulolanga kano!

²⁴Emuboolela toto mbu, abalakusi abanji nende abaruchi abanji bekoomba okhulola aka inywe mulolanga, nebutswa shibanyalilwa ta, kata okhuhulila akamuhulilanga nebutswa shibanyalilwa tawe.”

²⁵Omwechesia wamalako undi yasinjila nateema okhureka Yesu kho namureeba ari, “Omwechesia, nishiina eshiekhoyile okhukhola kho mbu, enyoole obulamu bweinziayo?”

²⁶Yesu namukalusia namureeba ari, “Amahandiko kaboolanga karie? Eshia kaboolanga nishiina?”

²⁷Mana omundu oyo nakalusia ari, “Omuhelenje Omwami Nyasayewo nende omwoyokwo kwosi nende amapaaroko koosi nende amaaniko koosi, khandi oheelenje owashio shinga olwa wiheela omwene.”

²⁸Yesu namukalusia naboola ari, “Okalusiye habwene, okholenje orio, ne olabaho mwoyo.”

²⁹Nebutswa omwechesia wamalako oyo yenya okhwikhola mbu nomulunjishi, kho nareeba Yesu ari, “Owashianje niwiina?”

³⁰Yesu namukalusia ari, “Yaliho omundu undi owali nakholomokhanga okhurula Yerusalemu natsitsanga Yeriko, ne abanuuli nibamukwakhwo nibamufwalula tsingubotsie, nibamunywekha, nibamulekha nali hambi okhufwa.

³¹Ne khane, omwisaaliisi undi yali naburanga khumuhanda okwo. Ne olwa yalola omundu oyo, yabirila butswa elubeka.

³²Khandi olwa Omulawi undi yesi yolaho, yamulola ne nabirila butswa elubeka.

³³Nebutswa Omusamaria undi, owali nabiriranga khunjila eyo yetsa niyoola khumundu oyo. Ne olwa Omusamaria oyo yamulola, yatiilwa netsimbabasi.

³⁴Mana natsia ewa omundu oyo yali, nabakha amafura nende idivai mutsimbala etsia yali naremilwe ne natsiboha. Mana namuniinia khusishiliye, namuyila munzu yabacheni ne namulinda obulayi.

³⁵Kunyanga yalondakhwo yabukula tsidinari[5] tsibili nahelesia omwenenzu yabacheni eyo, ne naboolela omwenenzu oyo ari, ‘Omulinde, ne olwa nenjelele, nekhurunje tsidinari etsia nobe niwikhonyeele okhumeeta khu tsino.’ ”

³⁶Mana Yesu namalilisia nareeba ari, “Opaara mbu, niwiina khubataru bano, ouli omumenyanwa wahabwene khumundu wabanuuli basaalisia oyo.”

³⁷Omwechesia wamalako oyo namukalusia naboola ari, “Nomwenoyo owamulolela tsimbabasi.” Yesu namuboolela ari, “Tsia, wesi okholenje orio.”

³⁸Olwa Yesu nende abeechibe bali khuluchendo lwabwe, Yesu yenjila mulusoma lundi. Mana omukhasi undi oweliira mbu, Maritsa namwinjisia munzuye.

³⁹Maritsa yali nende omukhaana wabwe owalangwa mbu Mariamu, owekhala hamakulu ka Yesu narechelesinjia amechesioke.

⁴⁰Nebutswa Maritsa naye yali nanyakhanga butswa nemilimo eminji. Kho niyetsa naboolela Yesu ari, “Omwami, shioteebakhwo mbu, omukhaana wefwe yandesheele butswa emilimo sienyene ta? Muboolele yakhoonyekhwo emilimo.”

⁴¹Nebutswa Omwami yamukalusia naboola ari, “Maritsa, Maritsa! Ohendelanga nende okhunyakhanila ebindu ebinji,

⁴²nebutswa eshindu shilala shionyene nishio eshienyekha. Mariamu yeyahuliile omukabo omulayi, nakwo shikwakharusibwe khuye tawe.”