Read wanga LUKA 11 Bible Online

LUKA 11 - wanga bible

LUKA 11

¹Olundi Yesu yali habundu undi nasaayanga. Ne olwa yamala, mulala khubeechibe yamureeba ari, “Omwami, okhwechesiekhwo okhusaaya shinga olwa Yohana Omubatiisi yechesia abeechibe.”

²Mana Yesu namuboolela ari, “Olwa musaaya, muboolenje muri, ‘Seefwe, eliiralio liriibwe. Obwamibwo bwitse.

³Buli lwosi okhuhelesie eshiokhulia shiefwe shia buli nyanga.

⁴Okhuleshele obwonooni bwefwe, okhuba fwesi khuleshelanga abakhwonoonelanga ifwe boosi. Khandi shiolakhuyila mukhuteemwa tawe.’ ”

⁵Mana Yesu naboolela abeechibe ari, “Oundi khwinywe naba natsia womwitsawe mushilo hakari, mana amuboolele ari, ‘Omwitsa wanje, ndenya uhosiekhwo emikaate chitaru.

⁶Okhuba omwitsa wanje undi yetsile ewanje narula khuluchendo, nasi shiendikhwo neshiokhulia shiokhumuhelesia tawe!’

⁷Ne omwitsawe oyo naba nakalusia nali munzumwe ari, ‘Lekha okhuunyasia! Emalile okhwikala omuliango, khandi isie nabaana banje khwiyalisiye. Shienyala okhubuukha ekhuhelesie eshindu shiosi shiosi tawe.’

⁸Kho kakhaba karie? Abwatoto buli mbu, kata nalanyala okhubuukha mana amuhelesie emikaate echio shichila mbu nomwitsawe ta, alabuukha amuhelesie ebia yenyile ebio biosi, shichila mbu, alumiliile okhusaba nalafimbwa omurwe tawe.

⁹“Khulweshio emuboolela mbu, Sabe, naye Nyasaye alamuhelesia, khaabe, ne mulanyoola, khong'onde, ne mulekulilwa.

¹⁰Okhuba yesi yesi ousaba, alahebwa, oukhaaba alanyoola, naye oukhong'onda khumuliango, alekulilwa.

¹¹Khwinywe alikhwoho omwibusi owomwanawe asaba inyeeni, naye namuhelesia inzokha?

¹²Noho kata owomwanawe asaba libuyu, naye namuhelesia likhala?

¹³Kho bulano inywe, shinga olwa muli butswa ababi murio, mwamanya okhuhelesia abaana benywe ebihaanwa ebilayi, Senywe ouli mwikulu yakhabula arie okhubahelesia Roho Omutakatifu abo abakhamusaba!”

¹⁴Yesu yali narusinjia eshishieno mumundu wolulimi lwahanda, ne olwa eshishieno eshio shiarula, omundu owolulimi lwali nilwahanda oyo yachaaka okhuboola. Mana abemikanda nibahuka.

¹⁵Nebutswa abandi khubo nibaboola bari, “Ni Belizebuli, omukhongo webishieno oumuhelesinjia obunyali obwokhurusia ebishieno.”

¹⁶Abandi benya okhureka Yesu, kho nibamureeba mbu, akholekhwo akamakana okhumanyia mbu, yali nobunyali okhurula khu Nyasaye.

¹⁷Nebutswa Yesu yamanya aka bali nibapaaranga, ne nababoolela ari, “Lihanga elikabukhaanemwo emikanda chiokhulwana echiene khuchiene, shilinyala okhuyindila ta. Kata litaala elikabukhaanemwo emikanda echiokhulwana echiene khuchiene lisikhanga.

¹⁸Kho oburuchi bwa Setani bwosi nibuba nibukabukhana mumikanda echiokhulwana echiene khuchiene bwakhanyala burie okhuyindila? Okhuba inywe muboolanga mbu, isie erusinjia ebishieno khulwa obunyali bwa Belizebuli.

¹⁹Ne isie nimba nirusinjia ebishieno khulwa obunyali bwa Belizebuli, kho abalondi benywe nabo babirusinjia khulwobunyali bwa wiina? Khulweshio abalondi benywe beene nibo abalamukhalachila eshiina.

²⁰Nebutswa isie nimba nirusinjia ebishieno khulwa obunyali bwa Nyasaye, kho Obwami bwa Nyasaye bumalile okhumwitsila inywe.

²¹“Olwa omundu wamaani, khandi owimanule ebimanulwa bielihe biosi, alindanga litaalalie, emianduchie chiosi chibetsanga obulayi mumulembe.

²²Nebutswa oundi, oumushila amaani naba namuseera mana amuhule, anuulanga mwene litaala oyo ebimanulwabie biosi ebia yesika, ne amala akabulamwo ebiyaayobie.

²³“Omundu yesi yesi oulali halala ninasi ta, yafukulanga isie. Naye oulakhung'asia halala ninasi ta, asalaasinjia.

²⁴“Ne olwa roho weshifwabwi abetsanga narulile mumundu, abiranga aha amaatsi kabula, nakhaaba aha ahuluushila. Ne nalanyoola ta, amalanga aboole ari, ‘Ndalakalukha munzu yali yanje.’

²⁵Kho olwa yolamwo, nanyoola inzu eyo niyeeyilwe khandi niyikaasiibwe obulayi bwene.

²⁶Ne arulaho atsia okhulanga roho bandi beshifwabwi musafu abamusila obumayanu, nibetsa benjila nibamenya munzu omwo. Kho mukhumalilikha, omundu oyo abetsanga omumayanu muno okhushilakhwo shinga olwa yali mukhuchaaka.”

²⁷Ne olwa Yesu yali nashiboolanga amakhuwa ako, omukhasi undi owali mumukanda okwo yaboola nomwoyo omukhongo ari, “Noweikhabi omukhasi owakhwibula khandi nakhunuunia!”

²⁸Nebutswa Yesu yakalusia naboola ari, “Nabeikhabi abahulilanga likhuwa lia Nyasaye ne nibalikhola.”

²⁹Ne lwomukanda kwabandu kwatsiililila okhumeetekha, Yesu yameeta okhuboola ari, “Abandu bolwibulo luno nabamayanu muno! Basabanga eshilolelo shiamakana, nebutswa shibulaho eshilolelo eshiabalihebwa, habula eshilolelo shiamakana shiali shia Yona eshio.

³⁰Okhuba shinga lwomulakusi Yona yali eshilolelo khubandu ba Nineve, nolwa Omwana womundu yesi ali ario eshilolelo khulwibulo lwa leelo luno.

³¹Khunyanga eyokhukhalachilwa eshiina, omuruchi omukhasi wa Sheba alisinjila mumuse halala nabandu bolwibulo luno, nabakhalachila eshiina. Shichila yarula mushialoshie ehale, niyetsa okhuhulila amechesio kobuchesi bwomuruchi Solomoni. Ne lole, aliho hano oushila omuruchi Solomoni ehale.

³²Khunyanga yokhukhalachilwa eshiina, abandu ba Nineve bakhayaasibwe halala ninenywe nibamukhalachila eshiina, shichila bekalukhasia nibalekha obwonooni bwabwe, olwa bahulila okhuyaala khwa Yona. Ne khandi lola, emusuubisia mbu, aliho hano oushila Yona ehale!

³³“Abulaho omundu ouhafinjia itaha mana achibisa noho achifunishila munyungu tawe. Nebutswa achirenjekhanga khushichibi shiayo kho mbu, olwa abandu benjila munzu omwo, yibakhosilie nibalola obulafu.

³⁴Tsimonitsio nitsio itaha yomubilikwo. Tsimonitsio nitsili tsindayi, omubilikwo kwosi kwitsulangamwo obulafu, nebutswa tsimonitsio nitsilali tsindayi ta, omubilikwo kwosi kwitsulangwamwo eshiilima.

³⁵Khulweshio, obe meeso, obulafu buli mwiwe bwakhetsukhana bwakwa eshiilima.

³⁶Kho omubilikwo nikuba nikwitsulamwo obulafu, ne nikulalikhwo neshipala shiosi shiosi shieshilima ta, kho kuba kwitsulamwo obulafu kwosi, shinga lwobulafu bweitaha bukhukhosilinjiayo.”

³⁷Ne olwa Yesu yali niyakhamala okhuboola amakhuwa ako, Omufarisayo undi yamwinjisia munzumwe okhulia ninaye. Kho niyenjilamwo niyekhala okhulia.

³⁸Omufarisayo oyo yahuka muno, olwa yalola mbu Yesu achaachile okhulia nashili okhusaaba amakhonoke.

³⁹Mana Omwami namuboolela ari, “Inywe Abafarisayo mwosinjia ikulu weshikombe nende isahani, nebutswa mumioyo chienywe mwitsuulemwo induli nende obumayanu.

⁴⁰Inywe abayingwa, Nyasaye owalonga khwikulu khwabio shiali ye khandi owalonga mukari wabio?

⁴¹Nebutswa muhelesie abatakha ebili mukari mwebikombe ebio nende tsisahani tsienywe etsio, nabio ebindu biosi bilaba ebisiiyikhu khwinywe.

⁴²“Nebutswa muli mushilaamo shiobubi inywe Abafarisayo! Shichila muhaanilanga Nyasaye eshitonye shienywe eshielikhumi eshiomunyu kwelikoshe nende omufuume nende eliani shinga omurele nende emiro. Nebutswa mulechelesinjia obukhalachi bwa habwene nende okhuheela Nyasaye. Mukhoyile okhukhola akenako, nimulalechelesiakhwo akandi kalia tawe.

⁴³“Muli mushilaamo shiobubi inywe Abafarisayo! Shichila mwachama okhwikhala khubifumbi bioluyali mutsisinagogi nende okhushiesibwa noluyali mubiiro.

⁴⁴Muli mushilaamo shiobubi! Shichila muli shinga ebilindwa ebiebisa, ebiabandu bachendakhwo obulamanya ta.”

⁴⁵Mana mulala khubechesia bamalako namuboolela ari, “Omwechesia, khulwa okhuboola orio, fwesi khandi kho okhunyekanga!”

⁴⁶Yesu nakalusia naboola ari, “Muli mushilaamo shiobubi inywe abechesia bamalako! Shichila mutuukhanga abandu emisiko emisiro echia balanyala okhuchinga ta, nebutswa inywe abeene shimunyala okhunyiila kata olwala lwenywe lwonyene mbu mubakhoonye okhuchinga emisiko tsana echio tawe.

⁴⁷Muli mushilaamo shiobubi! Shichila mukaasinjia ebilindwa biabalakusi obulayi, ne abakuuka benywe beene nibo ababeera.

⁴⁸Kho inywe abeene muli abaloli, okhuba mufuchilisaninjia nende ebikhole biabakuuka benywe bakhola. Okhuba nibo abeera abalakusi abo, nenywe mukaasinjia ebilindwa biabalakusi tsana abo.

⁴⁹Khulweshio niko akachila obuchesi bwa Nyasaye nibuboola buri, ‘Ndalabarumila abalakusi nende abarumwa, nabo balasandia balala khubo nibabeera.’

⁵⁰Khulweshio abandu abolwibulo luno balaheebwa eshinyasio khulwa abalakusi boosi abeerwa okhurula khukhulongwa khweshialo.

⁵¹Okhuchaachila khukhwirwa khwa Abeli, okhuula khukhwirwa khwa Zakaria, owerwa nali hakari weshimalilo shiemisango nende habundu hatakatifu. Emuboolela toto mbu, abandu bolwibulo luno balahebwa eshinyasio khulwa eshitsayi shia baraatsia eshio.

⁵²“Muli mushilaamo shiobubi, inywe abechesia bamalako! Shichila inywe mwabisa olufungwo lwokhwikula omuliango kwokhwinjila munzu yobuchesi. Ne inywe abeene shimwayenjilamwo ta, ne khandi mwekalila abenya okhwinjilamwo mbu baleshe okhwinjilamwo!”

⁵³Ne olwa Yesu yarulaho, abechesia bamalako nende Abafarisayo bachaaka okhumufukula muno nende okhumureeba amareebo amanji,

⁵⁴nibateema okhumureka kho mbu, banyoolekhwo likhuwa libi mukhuboolakhwe.