Read wanga LUKA 12 Bible Online

LUKA 12 - wanga bible

LUKA 12

¹Ne olwa abandu bekhung'asia halala ebikhumila nebikhumila, nibafindikana khandi nibasekana abeene khubeene, Yesu yaranjilila okhuboolela abeechibe ari, “Mube meeso nimwilinda okhurulana nende limela lia Abafarisayo, eshisina mbu, obwikaati.

²Libuho liosi liosi elifuunishilwa, elilafuunulilwa ta, kata eliibisilwe, elilanyala okhubisulwa liamanyikha tawe.

³Khulweshio, akamwaboolile mushiilima, kalahulilishila habulafu, nako akamumoonyela mushirwi shiomundu mubisika, nako kalarumbulwa habulafu khubilama bietsinzu.

⁴“Emuboolela inywe abetsa banje mbu, mulariitsenje abeera omubili ne shibanyala okhukhola likhuwa lindi liosi libi ta.

⁵Nebutswa ndalamumanyia inywe owamukhoyile okhuria. Mumuriitsenje Nyasaye, ouli nobunyali bwokhwira, ne khandi anyala okhukhusukuna omundu mumulilo okulasimanga ta. Emuboolela too mbu, niye owa mukhoyile okhuria!

⁶“Tsiminyi tsirano shitsikusibugwa tsisende tsibili? Ne kata ndala khutsio, Nyasaye shianyala okhuyibilila tawe.

⁷Kata liswi elili khumirwe chienywe liosi liabalwa. Kho mulariitsenje tawe. Inywe muli abolukoosi okhushila tsiminyi tsinyinji!

⁸“Emuboolela toto mbu, buli mundu ounziyama isie habulafu, Omwana womundu yesi khandi yakhamwiyame ario imbeli wabamalaika ba Nyasaye.

⁹Nebutswa omundu yesi yesi ounzikaana habulafu, Omwana womundu yesi khandi yakhamwikaane ario imbeli wabamalaika ba Nyasaye.

¹⁰“Omundu yesi yesi ouboola likhuwa nafukula Omwana womundu, alaleshelwa, nebutswa yesi yesi ounyeka Roho Omutakatifu, shialaleshelwa tawe.

¹¹“Ne olwa bamureera inywe mutsisinagogi okhuyaasibwa nabami nende abobunyali, mulahenda mbu, namukalusie murie, kata mbu namukalusie shiina tawe.

¹²Okhuba Roho Omutakatifu alamwechesia habwene nahabwene aka mukhoyile okhuboola.”

¹³Mana mulala khubomukanda naboolela Yesu ari, “Omwechesia, laka omusiani wefwe mbu, yangabilekhwo khubulaame bwa papa wefwe yakhuleshela.”

¹⁴Yesu namukalusia naboola ari, “Omwitsa, niwiina owakhola isie okhuba omukhalachi weshiina noho owokhumukabulia inywe babili emiandu chienywe?”

¹⁵Khandi nameeta okhubaboolela boosi babili ari, “Mube meeso nimwilinda abeene, muleshenje okhulangushila ebindu. Shichila obulamu bwatoto bwomundu, shibuli mumiandu chiali ninachio eminji tawe.”

¹⁶Mana Yesu nababoolela oluchelo luno ari, “Yaliho omuyinda undi owemikundachie chiama ebiamo ebinji muno.

¹⁷Mana nachaaka okhukanakania mumwoyokwe ari, ‘Embula wembiikha ebichese bianje bino biosi tawe. Nekhole endie?’

¹⁸Khandi niyekalusia omwene ari, ‘Ndalakhola endi namwa. Ndalakwisia ebiachi bianje, mana engaasie ebindi ebikhongo, ne mubwene omwo ndalabiikhamwo ebichese bianje biosi nende emiandu chianje.

¹⁹Mana ndaleyitsoomia omwene nimboola endi, lola, endi oweikhabi, bulano endi nemiandu chiosi echiokhwikhoonyela khulwemiyika eminji. Lekha ehulushe nenywa nende okhutsaatsahala!’

²⁰Nebutswa Nyasaye yamuboolela ari, ‘Omuyingwa iwe! Eshilo eshiolwaleelo luno, obulamubwo bulabukulwa. Kho ebindu biawibiishiile ebio biosi nabibe ebia wiina?’ ”

²¹Mana Yesu namalilisia okhuboola ari, “Nolwa kali kario khubebiishilanga abeene obuyinda, nebutswa shibali abayinda imbeli wa Nyasaye tawe.”

²²Kho Yesu naboolela abeechibe ari, “Khulweshio emuboolela inywe mbu, shimulahendele akobulamu bwenywe mbu, ebiokhulia noho akomubili kwenywe mbu, tsingubo tsiokhwifwala tawe.

²³Obulamu bushila ebiokhulia, nakwo omubili kushila ebifwalo.

²⁴Mulolelekhwo khumakhokho, shikarakanga noho okhuchesa ta. Shikalikhwo nelibiishilo noho eshiachi ta, nebutswa Nyasaye niye oukaliisinjia! Inywe muli abolukoosi muno okhushila amanyonyi!

²⁵Ne niwiina khwinywe, ounyala okhwimeetakhwo tsinyanga tsiobulamubwe khulwa okhuhenda omwoyo?

²⁶Inywe nimuba nimulanyala okhukholakhwo kata litiiti shinga elo ta, kho nishiina eshichila nimuhendela akandi koosi?

²⁷Mulolelekhwo khumataanye komubulimo shinga olwa kakhulanga. Shikanyakhananga nikakhola emilimo ta. Kata shikekaasilinjiakhwo ebifwalo tawe. Nebutswa emuboolela mbu, kata omuruchi Solomoni, mubuyindabwe bwosi shiyafwalakhwo tsingubo etsiobukondo obulayi shinga obwebimuli ebio tawe.

²⁸Nebutswa nikaba mbu, Nyasaye niye oufwalanga obunyasi bwomubulimo ebifwalo biabwo, obuliho butswa leelo luno, ne mukamba busukunwa mumulilo. Shianyala okhumufwala inywe obulayi muno okhushilakhwo yaho, kata olwa muli abobusuubili obutuutu murio noho!

²⁹“Kho inywe shimulanyakhanakhwo mumioyo chienywe, nimuhendela eshia namulie kata eshia namunywe tawe.

³⁰Okhuba abandu bamahanga kandi kokhushialo khuno boosi, bakhaabanga ebindu bino biosi. Naye senywe amanyile mbu, mukhoyile okhuba nebindu ebio.

³¹Nebutswa inywe muhendele butswa aka Obwami bwa Nyasaye, ne ebindu bindi biosi, mulahebwa.

³²“Shimularie ta, inywe abelituuli lianje litiiti, okhuba Senywe achamile okhumuhelesia Obwami.

³³Mukusie ebia muli ninabio biosi mana mukabile abatakha amapesa ako. Mwikasilie abeene emifuko echilakofulanga ta, khandi mwibiishile libiikho mwikulu ewa lilanyala okhuhwa ta, khandi ewa omwifi yesi yesi alanyala okhuula kata amatsilili okhwonoonia tawe.

³⁴Shichila ahobuyindabwo buli, niho aha omwoyokwo kubetsanga buli lwosi.

³⁵“Mwikhale nimwirecheeshe khulwa liosi liosi elirulila, mwibohele tsingubo tsienywe mubishienje, natsio tsitaha tsienywe tsitsiililile okhwakha.

³⁶Mube shinga abakhalabani abalindililanga omwami wabwe okhuchelela okhurula mwisabo lieshiselelo, kho mbu, olwa yetsa nakhong'onda, bamwikulileho omuliango habwene nahabwene.

³⁷Nabeikhabi abakhalabani, aba Omwami wabwe yetsa nanyoola nibali meeso! Emuboolela toto mbu, aleboha omushipi mushishienje, nabekhasia hasi khulwa okhubakhalabanila.

³⁸Ne kata naba nachelela mushilo hakari noho eshialo nibutsia okhushia, mana anyoole abakhalabani abo nibali meeso, balaba abeikhabi muno.

³⁹Nebutswa mumanye mbu, omwenenzu niyakhamanyile isaa yene yomwifi yetselakhwo, shiyakhaleshile omwifi oyo okhufunaka inzu niyenjilamwo okhwiba tawe.

⁴⁰Kho mwesi khandi okhuula mwirecheshe, shichila Omwana womundu yakhetse khusaa eya mulapaarakhwo mbu, anyala okhwitsilakhwo tawe.”

⁴¹Petero nareeba ari, “Omwami, oluchelo luno luchoomile khwifwe fwenyene noho khubandu boosi?”

⁴²Omwami nakalusia naboola ari, “Kho omusinjilili omwisiikwa khandi omuchesi niwiina? Niye oyo owa omwamiwe yemekha okhuba omusinjilili wabeinzuye mbu, abakabilenje omukabo kwabwe kwebiokhulia mubise ebikhoyeele.

⁴³Noweikhabi omukhalabani owomwamiwe achelela nangowe, namunyoola nakholanga ario.

⁴⁴Emuboolela toto mbu, omwamiwe oyo alamwemekha okhusinjilila emianduchie chiosi.

⁴⁵Nebutswa omukhalabani oyo niyakhaboola mumwoyokwe ari, ‘Omwami wanje ashiindile okhuchelela,’ ne achaaka okhukhupa abakhalabani beshisaatsa nende abeshikhasi abo, ne nalia, nanywa nameela,

⁴⁶omwamiwe oyo alachelala khunyanga nende khusaa yomukhalabani oyo alapaarakhwo mbu, anyala okhwitsilakhwo ta. Omwami oyo alahelesia omukhalabani oyo eshinyasio eshikhongo halala nende abalali abesiikwa tawe.

⁴⁷Naye omukhalabani oumanyile akomwamiwe yenya mbu akhole, ne nalerechekha omwene okhukakhola ta, alaheebwa eshinyasio eshilulu muno.

⁴⁸Nebutswa omukhalabani oulamanyile akomwamiwe yenya mbu akhole ta, ne nakhola eshindu eshichila anyoole eshinyasio, alaheebwa eshinyasio shitiiti butswa. Ouhebwa ebinji alabanzwa ebinji, naye ouhebwa ebinji muno alabanzwa ebinji muno khandi.”

⁴⁹Mana Yeusu naboola ari, “Isie ndetsa okhubwana omulilo khushialo, ne ndikombanga mbu kwaba nikwakhanga.

⁵⁰Endi nende obubatiisibwi bwobusandibwi obwekhoyile okhubatiisibwamwo, ne buuhendinjia muno, okhuula olwa bulaba nibuusiibwe!

⁵¹Mupaaranga mbu, isie ndetsa okhureera omulembe mushialo? Tawe, shindayetsa okhureera omulembe mushialo ta habula obukabukhani.

⁵²Okhuba okhurula bulano, abomunzu ndala barano balakabukhana, bataru balafukula bibili, nabo babili nibafukula bataru.

⁵³Basamwana abaana balafukula abaana babwe, nabo abaana balafukula abasabwe. Ne banyinamwana abaana balafukula abaana babwe abakhaana, nabo abaana abakhaana balafukula banyinabwe. Abanyakhufiala beshikhasi balafukula abakhasi babaana babwe, nabo abakhasi babana balafukula abanyakhufiala beshikhasi.”

⁵⁴Khandi Yesu naboolela abemikanda ari, “Olwa mulolanga lileesi nilirula Mumbo, ne muboola muri, ‘Ifula yitsanga,’ mana toto yikwa.

⁵⁵Ne khandi olwa mulolanga omuyeka nikuhutsa okhurula Emulambo, ne muboola muri, ‘Eshimiyu shitsanga,’ mana toto shihutsa.

⁵⁶Inywe abekaati, mumanyile okhwibaala aketsa okhwikholekha khulwa okhuhenga mwikulu nende khushialo, ne eshichila nimulamanyilisiakhwo aketsinyanga tsino nishiina?

⁵⁷“Ne eshichila inywe abeene nimulekhalachila okhukhola akali aka habwene ta nishina.

⁵⁸Olwa otsia imbeli womukhalachi weshiina nende oukhwinjilila itookho, teema shinga lwonyala mufuchilisanie ninaye, mukaasie omulembe nimushili okhuula mushiina. Ne nolakhola orio ta, alakhuyila khumukhalachi weshiina naye omukhalachi weshiina oyo alakhuhaana mumakhono komusikari, naye omusikari alakhura mumbohe.

⁵⁹Ekhuboolela mbu, shiolirulamwo ta, okhuula olwa wakhabe nomalile okhurunga amapesa koosi akawakhalachilwa okhurunga.”