Read wanga LUKA 14 Bible Online

LUKA 14 - wanga bible

LUKA 14

¹Khunyanga yindi eya Isabato, Yesu yenjila munzu yomukhulundu owa Abafarisayo okhulia ebiokhulia, ne abandu baliho bamuhenjelesia muno.

²Ne omundu yaliho owali niyafimba ebilenje nende amakhono.

³Yesu nareeba abechesia bamalako nende Abafarisayo ari, “Kali habwene mumalako okhuhonia khunyanya eya Isabato noho tawe?”

⁴Nebutswa baholela butswa tsi. Yesu natiila khumundu oyo, namuhonia ne namuseebula.

⁵Mana Yesu nababoolela ari, “Niwiina khwinywe owakhaba nende Omwanawe[6] noho iheyiye niyikwile mwiyabo liamatsi khunyanga eya Isabato, owakhalekha okhuchikhwesa wachirusiamwo habwene nahabwene khunyanga eyo?”

⁶Nebutswa shibamukalusia eshindu khumakhuwa ako ta.

⁷Yesu yalola shinga balala khubacheni bali nibeyahulilanga obwikhalo obukhulundu, kho nababoolela oluchelo luno ari,

⁸“Omundu yesi nakhulanga mwisabo lieshiselelo, olekhala mubwikhalo obukhulundu tawe. Haundi oundi oukhushila iwe muluyali yakhaba yesi nalanjilwe,

⁹ne oumulaanjile mwesi oyo, yetsa khwiwe nakhuboolela ari, ‘helesia uno obwikhalo buno.’ Mana olafimbwa omurwe lwokalusibwa mubwikhalo obwa hasi.

¹⁰Habula nolanjilwe mubucheni, tsia wikhale mubwikhalo bwa hasi, kho mbu oukhulanjile oyo olwa yetsa, anyala okhukhuboolela ari, ‘Omwitsa wanje, yikhalakhwo hekulu hano,’ ne orio olaba noluyali imbeli wabacheni boosi aba oba niwikhale ninabo.

¹¹Okhuba omundu yesi owichinguula omwene, alatutuyibwa. Ne yesi owitutuyia omwene alachinguulwa.”

¹²Mana Yesu khandi naboolela owali namulanjile ari, “Olwa okaasia lisabo, libe liomushiteere hakari noho liomungolobe, olalanga abetsabo, kata abaana benywe, kata abekhobo kata abamenyanibo abayinda ta, shichila haundi boosi bakhakhulanga olundi, kho mana onyoole omurungo khukawabakholela.

¹³Nebutswa lwokaasia lisabo, olanje abamanani, abalema, abetsindieku nende ababofu;

¹⁴nawe olanyoola ikhabi, shichila bo shibanyala okhukhurunga shiosi ta. Nyasaye alikhurunga iwe khunyanga yabandu abalunjishi balilamusibwa okhurula mubafu.”

¹⁵Olwa mulala khu abali nibaliitsanga ninaye khumeesa yahulilakhwo amakhuwa ako, yaboolela Yesu ari, “Noweikhabi oulilia ebiokhulia mubwami bwa Nyasaye!”

¹⁶Naye naboolela omundu oyo ari, “Yaliho omundu owakaasia lisabo likhongo, mana nalanga abandu abanji.

¹⁷Olwa eshise shielisabo shiola, yaruma omukholiwe okhuboolela abandu abali nibalanjilwe ari, ‘Mwitse, okhuba buli shindu shiirechekhwe!’

¹⁸Nebutswa buli mulala khubo yachaaka okhuhaana eshifune eshichila aleshe okhwitsa mwisabo elo. Owambeli naboolela omukholi oyo ari, ‘Ndakulile omukunda, ne okhuula enzie ekulambuule, ekhusaaya nochama ofuchilile endeshe okhuba mushiselelo.’

¹⁹Ne oundi naboola ari, ‘Ndakulile tsing'ombe tsiokhulima khumachoki karano, kho enzitsanga okhutsiteema, ekhusaaya nochama ofuchilile endeshe okhuba mushiselelo.’

²⁰Naye oundi naboola ari, ‘Ndateshiye omukhasi, khulweshio shinyala okhwitsa tawe.’

²¹Kho omukholi oyo nakalukha naboolela omwamiwe amakhuwa ako koosi. Mana omwami oyo nasinyikha muno naboolela omukholiwe ari, ‘Rula bwangu otsie khumihanda nende khutsinjila tsiomwitookho, oreere hano abamanani, abalema, ababofu nende abetsindieku.’

²²Omukholi oyo namuboolela ari, ‘Omwami akolachilisiye koosi kamalile okhukholwa, ne obwiyangu bushiliho!’

²³Kho Omwami naboolela omukholi oyo ari, ‘Rula otsie khandi khumihanda emikhongo nende khutsinjila tsinyelele, onichilisie abandu betse benjile, inzu yanje yitsule.

²⁴Okhuba emuboolela mwesi mbu, abulaho khubalangwa abo oulaliakhwo lisabo lianje tawe!’ ”

²⁵Bulano emikanda emikhongo chiabandu chiali nichilondananga nende Yesu, naye nashukhana, nababoolela ari,

²⁶“Omundu yesi naba niyetsa khwisie, shianyala okhuba omwechi wanje, naba nalaheela isie okhushila shinga olwa yaheela samwana nende nyinamwana tawe Khandi okhushila shinga olwa yaheela omukhasiwe nende abaanabe, abaana babwe abasiani nende abakhaana kata okhushila shinga olwa yeheela ye omwene tawe.

²⁷Ouletuukha omusalabakwe omwene niyanondakhwo ta, shianyala okhuba omwechi wanje tawe.

²⁸Kho niwiina khwinywe niyakhenya okhumbakha omunaara, oularanjilila okhwikhala nabala obukusi bwokhumbakha omunaara okwo, okhulola naba nali namapesa akahela okhumala omulimo okwo noho ta?

²⁹Nalakhola ario ta, haundi anyala okhumbakha omuse ne nakhaywa okhumala omunaara okwo, mana boosi abamulola balamutseshelela nibaboola bari,

³⁰‘Omundu uno yachaaka okhumbakha ne bulano shianyala okhumala omulimo tsana ta!’

³¹Kata nomuruchi shiina owakharula nabandu ebikhumila ekhumi (10,000) okhulwana nende omuruchi undi owitsa okhumuseera nali nabandu ebikhumila amakhumi kabili (20,000). Okhuula aranjilile okhwikhala ayililisie naba nanyala okhulwana nende owitsa okhumuseera oyo noho ta.

³²Nalanyala ta, alaruma oburume nareebanga omuruchi washie oyo nashili ehale mbu, bakasie omulembe.”

³³Kho Yesu namalila naboola ari, “Kho kali kario, mbu abulaho khwinywe ounyala okhuba omwechi wanje nalalekha ebindu biosi ebia ali ninabio tawe.

³⁴“Omunyu nomulayi, nebutswa nikuba nikutsinziba, shionyala okhukukalusilia eshinosi shiakwo tawe.

³⁵Shikukasila kata liloba noho imbolela tawe, abandu bakusukunanga elwanyi. Kho oyo ouli namarwi kokhuhulila lekha aulile!”