Read wanga LUKA 15 Bible Online

LUKA 15 - wanga bible

LUKA 15

¹Inyanga yindi, abasololi bobushuru nende abonooni abanji betsa okhurecheresia Yesu niyechesia.

²Mana Abafarisayo nende abeechesia ba Malako nibachaaka okhubuuluula nibaboola bari, “Omundu uno yenjisinjia abonooni nende okhulia ninabo.”

³Kho Yesu nababoolela oluchelo luno ari;

⁴“Nimundu shiina khwinywe owakhaba namakondi eshikhumi shilala, ne elala khuko nilikora, ne nalalekha amakhumi shienda na shienda ako mushitsiimi, watsia okhukhaaba eliba nilikorire okhuula olwa alinyoola?

⁵Ne olwa aba nalinyoolile alichinga khumabeka nasangalile.

⁶Mana olwa yola inango, alaanga abetsabe nende abamenyanibe halala nababoolela ari, ‘Mwikhoye ninasi, okhuba enyoolile likondi lianje elibele nilikorire!’

⁷Emuboolela mbu, nolwa khulibaho okhwikhoya mwikulu khulwa omwonooni mulala owikalukhasia, okhushila abandu amakhumi shienda na shienda abapaara mbu bo nabalunjishi kho shibakhoyile okhwikalukhasia ta.” .

⁸“Kata nimukhasi shiina ouba nali nende amang'ondo ekhumi, ne nakosia elala khuko, oulahafia itaha mana yeeye munzu nakhaaba obulayi okhuula olwa anyoola ling'ondo elo?

⁹Niyakhalinyoola alalanga abetsabe nende abamenyanibe halala, nababoolela ari, ‘Mwikhoye ninasi, okhuba enyoolile ling'ondo liembeele nengosiye!’

¹⁰Emuboolela mbu, nolwa abamalaika ba Nyasaye balekhoya muno bario khulwa omwonooni mulala owikalukhasia.”

¹¹Yesu natsiililila okhuboola ari, “Yaliho omundu owali nende abaanabe abasiani babili.

¹²Omushe naboolela samwana ari, ‘Papa, wumbelesie omukabo kwanje kwokhumianduchio bulano.’ Mana samwana nakabula emianduchie khu basianibe babili.

¹³Olunyuma lwetsinyanga tsindiiti omusiani omushe oyo, nakusia emianduchie chiosi mana narula hango nende amapesa ako, natsia mushibala eshiehale nasasia amapesake khulwa okhwilaasia ebweneyo.

¹⁴Ne olwa yali nahwelelwe buli shindu, inzala yikhongo yamala niyibaho mushialo eshio, mana nachaaka okhutamba, inzala niyimuluma.

¹⁵Kho yatsia okhukholela omundu undi weshialo eshio emilimo, naye namuruma mubwayilobwe okhwaya tsimbitsi.

¹⁶Kho yekomba okhulia khubiokhulia bietsimbitsi etsio tsialitsanga, okhuba omundu yesi yesi shiyamuhelesiakhwo eshiokhulia tawe.

¹⁷Ne mukhumalilikha olwa yalaba tsimoni yaboola ari, ‘Abakholi bapapa boosi bali nende ebiokhulia biabalitsanga nibekura khandi balekha ebindi, nasi inzala niyinzirira hano.’

¹⁸Ndalarula enzie khu papa wanje emuboolele endi, ‘Papa, ndonoonela Nyasaye khandi nekhwonoonela iwe.

¹⁹Kata shiekhoyile okhulangwa omwanawo khandi ta; wumbukule butswa shinga mulala khubakholibo.’

²⁰Kho narula okhukalukha khu samwana. Ne olwa yali nashili ehale, samwana yamulola, namulolela tsimbabasi, natsia tsimbilo, namufumbelela namutsunzuuna.

²¹Omusiani oyo namuboolela ari, ‘Papa, ndonoonela Nyasaye khandi nikhwonoonela iwe, shiekhoyile kata okhulangwa omwanawo khandi tawe.’[7]

²²Nebutswa samwana yaboolela abakholibe ari, ‘Reere bwangu ikanzu indayi mumufwale, khandi mumufwale ingaka khulwalalwe nende ebilaaro.

²³Mana mureere eshimoosi shianera musinze, khulie nikhwikhoya.

²⁴Okhuba omwana wanje uno yali nafwile, ne bulano ulamuushe, yali niyakora ne bulano wunyooleshe.’ Mana nibachaaka okhwikhoya.

²⁵“Ne omusianiwe omukhulundu yali nali mumukunda. Ne olwa yali nachelelanga nali ahambi nende inzuye, yahulila abandu nibemba tsinyimbo nibekhoya.

²⁶Kho nalanga mulala khubakholi namureeba ari, ‘Nishiina eshitsiilililanga hano?’

²⁷Omukholi oyo namukalusia ari, ‘Omusiani wenywe acheleele ingo, kho papawo asinzile eshimoosi shianera, shichila mbu acheleele mumulembe khandi nali mwoyo.’

²⁸Omusiani wabwe omukhulundu nasinyikha naloba okhwinjila munzu. Samwana niyetsa namusaaya yenjilemwo.

²⁹Nebutswa yakalusia samwana ari, ‘Lola emiyika chino chiosi, ndakhukhalabaniile shinga omukhalabani, ne eshili okhufukulakhwo amalakoko tawe. Nishiina eshia wambelesiakhwo? Shiwayambelesia kata eshimeme shieimbusi mbu ndikhoye nende abetsa banje tawe!

³⁰Nebutswa lwomwanawo, owasasia emianduchio nende abatamba uno acheleele, omwiriile eshimoosi shianera!’

³¹Samwana namukalusia naboola ari, ‘Mwana wanje, iwe obetsanga ninasi hano buli lwosi, ne biosi ebiendi ninabio nebibio.

³²Nebutswa khukhoyile okhwikhoya nende okhusaangaala, shichila omusiani wenywe uno ali shinga owali niyafwa, ne bulano alamuushe, yali niyakora ne bulano anyooleeshe.’ ”