Read wanga LUKA 16 Bible Online

LUKA 16 - wanga bible

LUKA 16

¹Yesu yaboolela abeechibe ari, “Yaliho omundu undi omuyinda, owali nomusinjilili wemianduchie. Omuyinda oyo naboolela omusinjililiwe oyo mbu, omusinjililiwe oyo asasinjia butswa emianduchie.

²Kho namulanga namureeba ari, ‘Nimakhuwa shiina akembulilanga khwiwe kano? Obasie buli shindu shinga lwosinjililanga emiandu chianje shichila shiolatsiililila okhuba omusinjilili wachio khandi tawe.’

³Mana omusinjilili oyo nakanakania mumwoyokwe ari, ‘Omwami wanje atsia okhundeshesia emilimo. Nekhole shiina? Shiendi namaani akokhulima ta, khandi ndalafimbwa omurwe okhusaba.

⁴Bulano emanyile eshia enzia okhukhola, kho mbu olwa emilimo chianje chiobusinjilili chiba nichihwele, ndalaba nende abetsa abokhunzinjisia mutsinzu tsiabwe.’

⁵“Kho nalanga abandu abali namakofi akomwamiwe, mulala shia mulala, nareeba owambeli ari, ‘Likofi elia omwami wanje akhubanzanga lihela lirie?’

⁶Naye nakalusia ari, ‘Amatepe eshikhumi shilala akamafura kemiseituni.’ Omusinjilili oyo namuboolela ari, ‘Bukula ibarwayo yelikofi, ohandiche bwangu ori, amatepe amakhumi karano.’

⁷Khandi nareeba oundi ari, ‘Nawe oli nelikofi lihela shiina?’ Naye namukalusia ari, ‘Amatepe eshikhumi shilala akeingano.’ Omusinjilili oyo namuboolela ari, ‘Bukula ibarwayo yelikofi, ohandiche amatepe amakhumi munane.’

⁸“Omwami niyetsoomia omusinjilili omushiamu oyo, khulwa obuchesichesibwe, okhuba abandu bomushialo muno nabachesichesi muno mukhukhola amakhuwa kabwe okhushila abandu abobulafu.”

⁹Mana Yesu natsiililila okhuboola ari, “Emuboolela mbu, mwikhonyele obuyinda bweshialo okhwinyoolela abetsa kho mbu olwa buliba nibuhwele mulinjisibwa mubulamu bweinziayo.

¹⁰Omundu yesi yesi omwisiikwa mubindu ebitiiti, alaba omwisiikwa mubikhongo, ne yesi yesi ouli omushiamu mubindu ebitiiti alaba omushiamu mubindu ebikhongo.

¹¹Kho, nimulaba abesiikwa mubuyinda bwomushialo shino ta, mwakhaba murie abesiikwa mubuyinda bwatoto?

¹²Ne nimuba nimulaabeele abesiikwa khubindu biomundu undi, kho oulamuhelesia ebienywe biene niwiina?

¹³“Abulaho omukhalabani ounyala okhukhalabanila abami babili tawe, okhuba alasila mulala ne naheela oundi, noho alaba omuhulili khumulala ne nalechelesia oundi. Shionyala okhukhalabanila Nyasaye khandi okhalabanile emiandu tawe.”

¹⁴Olwa Abafarisayo bahulila ako koosi, batseshelela Yesu, shichila bali nibaheela amapesa muno.

¹⁵Yesu nababoolela ari, “Inywe mwikholanga abalunjishi mumoni tsiabandu, nebutswa Nyasaye amanyile emioyo chienywe. Okhuba ebihelesibwa oluyali mubandu nebikhaya mumoni tsia Nyasaye.

¹⁶“Amalako aka Musa nende akabalakusi bahandika kaliho okhuula mutsinyanga tsia Yohana Omubatiisi; okhurula olwene olwo, Amakhuwa Amalayi aka Obwami bwa Nyasaye kayaalungwa, ne buli mundu ateemanga okhwinjila mubwami obwo namaani.

¹⁷“Ne nobwangu likulu nende eshialo okhurulaho okhushila akhanyukuta khalala khamalako okhuyinibwaho.

¹⁸“Omusaatsa yesi yesi oulekhana nomukhasiwe nateshia omukhasi undi aba naheyanga. Naye omusaatsa outeshia omukhasi owalekhana nomusaatsawe aba naheyanga.

¹⁹“Yaliho omusaatsa undi omuyinda owefwalanga tsingubo tsiobukusi muno khandi niyamenya obulamu bwokhwisangasia buli nyanga.

²⁰Ne omusaatsa undi omutakha yaliho oweliira mbu, Lazaro, owali namakonzo khumubilikwe kwosi, owareerungwa niyalisibwa hamuliango homuyinda oyo,

²¹kho mbu aliekhwo khu ebiabungulukhanga okhurula khumeesa yomuyinda oyo. Tsimbwa tsietsanga nitsikhomba amakonzoke.

²²Omutakha oyo yafwa, ne omwoyokwe nikuchiingwa nende abamalaika nikuyilwa okhuba nende Aburahamu mwikulu. Omuyinda oyo yesi yafwa, ne nayabilwa.

²³Ne nali emakombe nanyasibungwa muno, yahenga ikulu ne nalola Aburahamu nende Lazaro nibali halala ehale.

²⁴Omuyinda oyo nalanjilisia ari, ‘Papa Aburahamu, umbeele tsimbabasi, mana orume Lazaro okhwina obutsunzu bwolwalalwe mumaatsi anyisiekhwo butswa olulimi lwanje, shichila esalilanga muno mumulilo kuno!’

²⁵“Naye Aburahamu nakalusia ari, ‘Witsulile mwana wanje mbu, iwe mutsinyanga tsiobulamubwo wanyoolanga amalayiko, naye Lazaro yanyoola amabi koosi. Ne bulano yekhoyanga hano nawe otsunungwa.

²⁶Okhumeeta khwako, hakari wefwe ninawe liliho libanda eliarebwaho mbu abenya okhwambukha okhurula hano okhwitsa ewamuli bakhaywe, khandi mbu, omundu yesi yesi shialambukhakhwo okhurula ewa muli okhwitsa ewa khuli yino tawe.’

²⁷Omuyinda oyo namuboolela ari, ‘Ekhusaaya papa Aburahamu mbu, orume Lazaro ingo wefwe

²⁸okhuba endi nende abaana befwe barano, kho mbu, atsie abachetsiyie baleshe okhwitsa habundu hobutsunwi hano tawe.’

²⁹“Aburahamu namukalusia ari, ‘Abaana benywe bali nende Amahandiko aka Musa nende abalakusi abokhubachetsiyia, bakhoyile okhuhulila aka Amahandiko ako kaboolanga.’

³⁰Naye omuyinda oyo naboola ari, ‘Papa Aburahamu, ako konyene shikahelile tawe! Nebutswa omundu niyakhabuukha okhurula mubafu nabatsiila, balekalukhasia.’

³¹Nebutswa Aburahamu namuboolela ari, ‘Nibaba nibalahulilanga aka Amahandiko aka Musa nende abalakusi ta, kho kata omundu naba nalamukha okhurula mubafu shibalasuubila tawe.’ ”