Read wanga LUKA 17 Bible Online

LUKA 17 - wanga bible

LUKA 17

¹Yesu naboolela abeechibe ari, “Ebiisichirasio ebichila abandu bonoone bilabaho, nebutswa ali mushilaamo shiobubi, omundu ouchila nibiikholekha!

²Bwakhaba obulayi okuchina okukhongo nikwakhaboyilwe mwikosilie, ne nasukunwa munyanza, okhushila mbu, achile mulala khubatuutu bano yonoone.

³Kho mwilinde abeene, omwana wenywe nakhwonoonela omuhalabile, ne naba niyekalukhasia, omuleshele.

⁴Ne naba nakhwonoonela okhuula musafu khunyanga ndala, ne nakhukalukhakhwo buli shise naboolanga ari, ‘Ndeshela.’ Okhoyile okhumuleshela.”

⁵Abarume abo nibaboolela Omwami bari, “Khola obusuubili bwefwe bwimeete.”

⁶Omwami nabakalusia ari, “Nimwakhabeele nobusuubili butiiti shinga olufwa lwomutarakwe, mwakhabeele abanyala okhuboolela omukhuyu kuno muri ‘Siulikha otsie wirache munyanza,’ nakwo nikumuhulila.”

⁷“Mulala khwinywe niyakhaba nomukholiwe nalimanga khumbako yetsing'ombe noho niyayanga amakondi, olwa achelela narula khumilimo, wakhamuboolela mbu atsie bwangu alie eshiokhuliashie?

⁸Tawe! Nebutswa alamuboolela ari, ‘Ngasilia eshiokhulia shianje, fwala tsingubotsio, wukhalabanile okhuula olwa emala okhulia nende okhunywa; ne olunyuma nawe olalia eshiokhuliashio.’

⁹Shiakhupilakhwo omukholiwe oyo orio ta, shichila akholile aka yalakwa okhukhola.

¹⁰Kho mwesi khandi, olwa muba nimukholile aka mwalakwa okhukhola mukhoyile okhuboola muri, ‘Shikhuli abakholi bakhoyile ta, nebutswa khukholile butswa aka khukwanile okhukhola.’ ”

¹¹Olwa Yesu yali nali khuluchendo lwokhutsia Yerusalemu, yabira hakari wa Samaria nende Galilaya.

¹²Ne olwa yali niyenjilanga mulusoma lundi, yabukaana nende abandu ekhumi abobuchele, ne nibasinjila ehale khuye.

¹³Mana nibalanjilisia bari, “Yesu, Omwami, okhubeele tsimbabasi!”

¹⁴Olwa Yesu yabalola yababoolela ari, “Tsie mwimanyie khubesaaliisi.” Ne olwa bali nibatsiitsanga, nibasiiyikha boosi.

¹⁵Kho mulala khubo, olwa yalola mbu wusiyiishile, yachelela, namwitsoominjia Nyasaye nomwoyo omukhongo.

¹⁶Yasikama hasi hamakulu ka Yesu namukhupila orio muno. Omundu oyo yali omusamaria.

¹⁷Mana Yesu naboola ari, “Shiehoniye abandu ekhumi? Abandi shienda bakhali hena?

¹⁸Eshichilile omurende uno yenyene nakalukha okhukhupila Nyasaye orio muno nishiina?”

¹⁹Mana Yesu namuboolela ari, “Buukha otsie, obusuubilibwo bukhuhoniye.”

²⁰Abafarisayo bandi bareeba Yesu bari, “Obwami bwa Nyasaye bulitsa liina?” Naye nabakalusia ari, “Obwami bwa Nyasaye shibulitsa nende ebilolelo ebilolekha tawe.

²¹Abulaho owakhaboole ari, ‘Lole, mbwobuno hano,’ noho ari, ‘Mbwobo yaho,’ tawe, shichila Obwami bwa Nyasaye buli mwinywe.”

²²Mana naboolela abeechibe ari, “Tsinyanga tsitsanga olwa mwakhekombe mbu mulolekhwo ndala khutsinyanga etsia Omwana womundu, nebutswa shimwakhachilole tawe.

²³Ne abandu bakhabeho abakhamuboolele bari, ‘Lole, Omwana womundu ngwoyo!’ Noho mbu, ‘Ngwouno hano!’ Nebutswa shimularula nimubalondakhwo tawe.

²⁴Okhuba shinga lwoluhenu luhenukhanga khushialo shiosi, ne nilumwesukha khushialo okhurula khulubeka lulala lweshialo okhuula khulubeka lundi, nolwa kakhabe kario khunyanga eya Omwana womundu alichelela.

²⁵Nebutswa okhuula anyakhane khandi abandu bolwibulo luno bamwikane.

²⁶Shinga olwa kali mutsinyanga tsia Noa, nolwa kaliba kario mutsinyanga etsia Omwana womundu alikalukha.

²⁷Mutsinyanga etsio, abandu batsiililila okhulia nende okhunywa, nabo abasaatsa nende abakhasi batsiililila okhuteshiania okhuula olwa Noa yenjila musafina. Mana omuyembo kweifula nikwitsa nikubamulula boosi pe.

²⁸Khandi kakhabe shinga olwa kekholekha mutsinyanga tsia Loti. Abandu batsiililila okhulia nende okhunywa nibakula ebindu nende okhukusia, nibaraka nende okhumbakha.

²⁹Nebutswa inyanga ya Loti yarula mwitookho lia Sodomu, omulilo kwarubukha okhurula mwikulu shinga ifula, nikubamulula boosi pe.

³⁰Nolwa kakhabe kario khunyanga eya Omwana womundu alikalushilakhwo.

³¹“Khunyanga eyo, omundu yesi yesi owakhabe nali khushilama shieinzuye shialenjilakhwo munzuye okhurusiamwo emianduchie tawe. Kata owakhabe nali mumukunda yesi khandi, shialakalukhakhwo inyuma tawe.

³²Yitsulile akekholekha khumukhasi wa Loti!

³³Omundu outeema okhuhonia obulamubwe alabukosia, naye oukosia obulamubwe alabuhonia.

³⁴Emuboolela toto mbu, mushilo shiene eshio abandu babili bakhabe nibeyalisiye halala, ne mulala yakhabukulwe, naye oundi yakhalekhwe.

³⁵Abakhasi babili baliba nibasietsanga khuluchina halala; mulala yakhabukulwe, naye oundi yakhalekhwe.” [

³⁶Abasaatsa babili baliba nibakholanga emilimo mumukunda; mulala yakhabukulwe naye oundi yakhalekhwe.][8]

³⁷Kho Abeechi nibamureeba bari, “Omwami, ako kaliba hena?” Yesu nabakalusia ari, “Aha omulambo kuli, niho aha tsingosia tsikhung'anilanga.”