Read wanga LUKA 18 Bible Online

LUKA 18 - wanga bible

LUKA 18

¹Mana Yesu naboolela abeechibe oluchelo, khulwa okhubechesia mbu bakhoyile okhusaayanga tsinyanga tsiosi obulafwa omwoyo tawe.

²Naboola ari, “Yaliho omukhalachi undi weshiina mwitookho lindi, oulahelesinjia Nyasaye oluyali kata okhuteeba abandu ta.

³Khandi mwitookho tsana elo yalimwo omukhasi omulekhwa owetsanga khumukhalachi weshiina oyo namulilila ari, ‘Ukhalachile eshiina habwene hakari wanje nende owakhuyalananga ninaye!’

⁴Khulwa oluhoono olurambi, omukhalachi weshiina oyo yaloba okhumukhoonya, nebutswa olunyumakhwo, napaara mumwoyokwe ari, ‘Kata nindalahelesinjia Nyasaye oluyali kata okhuteeba abandu ta,

⁵ndalakhalachila omukhasi omulekhwa uno eshiinashie habwene shichila yaanyasinjia, ne nindalakhola endio ta, alatsiililila okhwitsa mana yanjonyie!’ ”

⁶Mana Omwami naboola ari; “Hulile aka omuyaasi omushiamu oyo yaboola.

⁷Kho Nyasaye shialakhalachila abalobolebe abamuhaabilanga eshiteere nende eshilo eshiina shiahabwene, okhubakhoonya?

⁸Emuboolela mbu alabakhalachila eshiina shiabwe bwangu. Ne kata kario, olwa Omwana womundu alitsa alinyoola abandu nibali nobusuubili toto?”

⁹Yesu khandi naboolela abandu abelolanga abeene okhuba abalunjishi, ne nibachaaya abandu bandi boosi oluchelo luno

¹⁰ari, “Abasaatsa babili batsia muhekalu okhusaaya, mulala khubo yali Omufarisayo, ne oundi yali omusololi wobushuru.

¹¹Omufarisayo yasinjila nasaaya mumwoyokwe omwene ari, ‘Nyasaye, ekhupila orio muno shichila isie shiendi shinga abandu bandi; abanuuli, abashiamu, abaheyi kata shinga omusololi wobushuru uno tawe.

¹²Ndiyimanga eshiokhulia khulwa okhusaaya khabili mwichuma, ehaananga eshitonye shielikhumi khubiosi ebienyoolanga.’

¹³Nebutswa omusololi wobushuru oyo yasinjila ehale, kata shiyachinguula tsimonitsie mwikulu ta; nebutswa yekhupa khushilifushie naboola ari, ‘Nyasaye, umbele tsimbabasi, isie omwonooni!’

¹⁴Emuboolela mbu, omusololi wobushuru oyo yatsia ingowe ebionoonobie nibileshelwe, nebutswa Omufarisayo oyo tawe, okhuba buli omundu owiyemekha omwene alatutuyibwa, naye owitutuyia omwene alemekhwa.”

¹⁵Abandu bandi bareerera Yesu abaana abatiiti mbu abarekhwo amakhono. Ne olwa abeechibe balola babahalabila.

¹⁶Nebutswa Yesu yalanga abaana abo mbu betse khuye naboola ari, “Leshe abaana abatiiti betse khwise, mulabekalila ta, shichila obwami bwa Nyasaye, nobwa abo abali shinga bano.

¹⁷Emuboolela toto mbu, omundu yesi oulafuchilila obwami bwa Nyasaye shinga omwana omutiiti, shialinjilakhwo mwikulu kata nahatuutu tawe.”

¹⁸Omwimilisi undi omuyahudi yareeba Yesu ari, “Omwechesia omulayi, nishiina eshia ekhoyile okhukhola kho ndinjile mubulamu bweinziayo?”

¹⁹Yesu namureeba ari, “Eshichila niwunanga omulayi nishiina? Abulaho ouli omulayi ta, habula Nyasaye yenyene.

²⁰Omanyile amalako mbu; Shiolaheyanga ta; shioleranga omundu ta; shioleeba ta; shiolachikha ta; ohelesinjia papawo nende mamawo oluyali.”

²¹Omuyinda oyo namukalusia ari, “Okhurula mubwana bwanje ndatiila amalako ako koosi.”

²²Ne olwa Yesu yahulila ario, yamuboolela ari, “Oshileemilekhwo eshindu shilala eshiokhukhola. Tsia okusie ebindu biosi ebia oli ninabio, mana okabile abamanani amapesa konyoolamwo. Ne olaba nelibiishilo mwikulu; mana witse unondekhwo.”

²³Ne lwomundu oyo yahulila amakhuwa ako, yabeelela muno shichila yali omuyinda muno.

²⁴Yesu yalola omuyinda oyo nabeleele mana naboola ari, “Nobutinyu muno abayinda okhwinjila mubwami bwa Nyasaye!

²⁵Nobwangu ingamia okhubira munduhu yeisindani, okhushila omundu omuyinda okhwinjila mubwami bwa Nyasaye.”

²⁶Nabo abahulilakhwo amakhuwa ako nibareeba bari, “Kho ounyala okhuhonibwa niwiina?”

²⁷Mana Yesu nakalusia ari, “Akalanyalikha khubandu ta, kanyalikha khu Nyasaye.”

²⁸Mana Petero naboola ari, “Lola! Ifwe khwalekha tsingo tsiefwe nikhukhulondakhwo.”

²⁹Yesu naboola ari, “Emuboolela toto mbu; omundu yesi oulekha inzu, noho omukhasi noho abaana babwe noho abebusi noho abaana khulwa obwami bwa Nyasaye,

³⁰alanyoola ebindi ebishila ebio mutsinyanga tsino nende obulamu bwobumeli mutsinyanga tsitsanga.”

³¹Yesu yabukula abeechibe ekhumi nababili nabasitia elubeka bonyene, mana nababoolela ari, “Recheresie! Khutsitsanga Yerusalemu ewa buli likhuwa liosi liabalakusi bahandika khumwana womundu liloosibwa.

³²Okhuba alahaanwa mumakhono aka Abamahanga, alanyookhosibwa, nanyekwa, nanyilikhwakhwo amare.

³³Balamunywekha tsikhoba, nibamwira; ne khunyanga yakhataru alalamukha okhurula mubafu.”

³⁴Nebutswa abeechi shibamanyilisia eshisina shiamakhuwa ako koosi tawe. Eshisina shiako shiabebisila mana nibalamanya aka Yesu yaboolangakhwo tawe.

³⁵Olwa Yesu yali nali ahambi okhuula Yeriko, omusaatsa undi omubofu yali niyekhaale khundulo weyinjila nasabasabanga amapesa.

³⁶Ne olwa yahulila omukanda nikubiranga yareeba ari “Eshikholekhanga nishiina?”

³⁷Nibamuboolela bari, “Yesu owa Nazareti niye oubiranga.”

³⁸Mana nalaanjilisia nomwoyo omukhongo ari; “Yesu! Omwana wa Daudi! Wumbeele tsimbabasi!”

³⁹Mana abandu abali nibemiile imbeli nibamuhalabila nibamuboolela mbu aholeele tsi, nebutswa yameeta butswa okhulanjilisia obutinyu ari, “Omwana wa Daudi! Wumbeele tsimbabasi!”

⁴⁰Kho Yesu nasinjila nalaka mbu bareere omubofu oyo khuye; ne lwomubofu oyo yoola ahambi, Yesu yamureeba ari,

⁴¹“Eshia wenya mbu ekhukholele nishiina?” Naye nakalusia ari, “Omwami, ndenyanga enyalilwe okhulola khandi.”

⁴²Mana Yesu namuboolela ari, “Lola! Obusuubilibwo bukhuhoniye.”

⁴³Ne habwene nahabwene nachaaka okhulola, naloonda khu Yesu niyetsoominjia Nyasaye. Olwa abomukanda balola amakhuwa ako, boosi betsoomia Nyasaye.