Read wanga LUKA 19 Bible Online

LUKA 19 - wanga bible

LUKA 19

¹Yesu yenjila mwitookho lia Yeriko, ne yali nabirangamwo.

²Ne yalimwo omusaatsa undi owalangwa mbu Zakayo, owali omukhongo wabasololi bobushuru khandi omuyinda.

³Ne yateema okhulola mbu Yesu niye wina, nebutswa shiyanyalilwa ta, shichila yali omwimbichiti khandi omukanda kwali omukhongo.

⁴Kho yelukha tsimbilo natsia imbeli wabandu, naniina khumukhuyu kho mbu alole Yesu, owali niyetselanga khunjila eyo.

⁵Ne olwa Yesu yoola habundu yaho, yahenga ikulu, namuboolela ari, “Zakayo, yikha hasi bwangu okhuba ekhoyile okhwinjila munzumwo inyanga yino.”

⁶Mana Zakayo niyekha bwangu niyenjisia Yesu munzu, yamwinjisia nomwikhoyo omukhongo muno.

⁷Ne olwa abandu boosi balola bario beyiniakana nibaboola bari, “Omundu uno achenihe munzu yomundu omwonooni!”

⁸Mana Zakayo nasinjila, naboolela omwami ari, “Omwami, ndalakabila abatakha inusu yemiandu chianje, ne nimba nindanuulakhwo omundu eshindu shiosi shiosi ndalamukalusilia eshindu eshio akhandi khane.”

⁹Naye Yesu namuboolela ari, “Inyanga yino obuhonia bwitsile munzu muno, okhuba uno yesi nowolwibulo lwa Aburahamu.

¹⁰Omwana womundu yetsa okhukhaaba nende okhuhonia abo abakora injila.”

¹¹Ne olwa abandu bali nibarecheresinjia amakhuwa ako, Yesu yababoolela oluchelo lundi. Yali nali ahambi okhuula Yerusalemu, kho abandu nibapaara mbu obwami bwa Nyasaye buli ahambi okhuula.

¹²Kho nababoolela ari, “Omundu undi yatsia mushialo shiehale okhwemekhwa okhuba omuruchi, ne nibakhamwemekha achelele ingo.

¹³Ne nashili okhutsia yalanga abakholibe ekhumi nabahelesia buli shiamulala yimina[9] ndala nababoolela ari, ‘Mukholele obukhala tsimina tsino okhuula olwa ndakhachelele.’

¹⁴Ne abandu boluyialwe bali nibamusila, kho nibaruma abarumwa munyumawe, nibaboola bari, ‘Shikhwenya omundu uno abe omuruchi wefwe tawe.’

¹⁵“Ne olwa yachelela namalile okhwemekhwa okhuba omuruchi, yalaka mbu abakholi aba yali niyahelesia amapesa tsana abo balaangwe lwangu bamumanyie eshia bali nibanyoolile mubukhala bwabwe.

¹⁶Owambeli niyetsa naboola ari, ‘Omwami ndanyoolile inganga tsimina tsindi ekhumi okhurula khu eyawambelesia.’

¹⁷Omwami namuboolela ari, ‘wakholile obulayi, oli omukholi omulayi! Shichila wabele omusuubilwa mumakhuwa amatiiti, ndalakhwemekha okhuba omuruchi khumatookho ekhumi.’

¹⁸Owakhabili niyetsa naboola ari, ‘Omwami ndanyoolile inganga tsimina tsindi tsirano okhurula khu eyawambelesia.’

¹⁹Omwami namuboolela ari, ‘Olaruka amatookho karano.’

²⁰Omukholi undi niyetsa naboola ari, ‘Omwami bukula iminayo njieyino, ndachiboha mushitambaya nechifisa.

²¹Ndakhuria, shichila oli omundu omululu. Iwe obukulanga ebilaali ebibio ta, khandi okhuchesanga ebia walaaraka tawe.’

²²Omwami namuboolela ari, ‘Iwe omukholi omumayanu! Ndalakhukhalachila eshiina okhulondana namakhuwako omwene! Wamanya mbu, isie endi omundu omululu, embukulanga ebilaali ebianje ta, khandi enjesanga ebia ndalaraaka tawe.

²³Kho eshiachila nolayila amapesa kanje mwibishilo elibulana nishiina? Mana ndakhanyoolile inganga olwa enjelela!’

²⁴Mana naboolela abo abali nibasinjiileho ari, ‘Bukule imina yiyie eyo, muhelesie oyo ouli nende tsimina likhumi!’

²⁵Nabo nibamuboolela bari, ‘Omwami, lwakhali netsimina ekhumi!’

²⁶Omwami nabakalusia ari, ‘Emuboolela mbu, buli mundu ouli nende ebindu alahelesibwa ebindi ebinji, naye oubula eshindu, kata shitiiti eshiali ninashio alanuulwa.

²⁷Ne bulano khumakhuwa akabasuku banje abo, abalachama mbu embe omuruchi wabwe ta, bareere hano, mubeere imbeli wanje.’ ”

²⁸Olwa Yesu yali namalile okhuboola amakhuwa ako, yatsia nabaranjilila okhwinjila Yerusalemu.

²⁹Ne olwa yoola ahambi nende Betsifage nende Betsania, nali hashikulu eshia Miseituni, yaruma abeechibe babili baranjilile okhutsia imbeli nababoolela ari,

³⁰“Tsie mwitaala lili imbeli wenywe, ne olwa mulaba nimushinjilangamwo, mulanyoola eshimoosi shiesishili nishiboyilwe, shiomundu yesi yesi ashili okhuninakhwo tawe. Mushibolole mwitse ninashio hano.

³¹Ne omundu yesi naba namureeba ari, ‘Mushibololanga mbushiina?’ Kho mumuboolele muri, ‘Omwami ashienya.’ ”

³²Nabo abarume abo nibatsia, nibanyoola nikali butswa shinga olwa Yesu yali nababooleele.

³³Ne olwa bali nibabololanga eshimoosi eshio, abeeneshio nibareeba bari, “Mushibololanga mbushiina?”

³⁴Nabo nibakalusia bari, “Omwami ashienya.”

³⁵Mana nibashireerera Yesu. Kho nibara ebifwalo biabwe khushimoosi eshio, ne nibaniiniakhwo Yesu.

³⁶Ne olwa yali natsitsanga, baala ebifwalo biabwe khunjila.

³⁷Ne olwa yali nali ahambi okhuula Yerusalemu, nali khushikholomokho shieshikulu shia Miseituni, abechibe abanji bachaaka okhwikhoya, ne nibetsoomia Nyasaye nomwoyo omukhongo khulwa ebikhole biamakana ebia bali nibaluutsi, nibaboola bari,

³⁸“Noweikhabi omuruchi owitsa muliira elia Omwami! Omulembe mwikulu nalwo oluyali khu Nyasaye!” .

³⁹Mana abandi khu Abafarisayo abali mumukanda okwo nibaboolela Yesu bari, “Omwechesia, laka abeechibo baholeele tsi!”

⁴⁰Naye Yesu nabakalusia ari, “Emuboolela mbu, bano nibaholeela, amachina akeene kalachaaka okhwayula.”

⁴¹Olwa Yesu yatsia ahambi nelitookho, ne nalilola, yalila amasika,

⁴²naboola ari, “Niwakhamanyile inyanga yino amakhuwa kakwanile okhureera omulembe! Nebutswa bulano shionyala okhukalola tawe!

⁴³Okhuba tsinyanga tsitsanga tsiabasukubo bakhakhubotokhane nibakhwikalila tsimbeka tsiosi nende lisisi.

⁴⁴Balikhusasia iwe halala nende abandu abaliba mwisisi omwo; shibalilekhakhwo mwiwe lichina kata elala ta; shichila shiwamanyilisia indukho eya Nyasaye eyokhukhununula tawe!”

⁴⁵Mana Yesu niyenjila muhekalu nachaaka okhurusia abali nibakulasilinjiamwo ebindu,

⁴⁶nababoolela ari, “Kahandikwa mumahandiko mbu, Nyasaye yaboola mbu, ‘Ihekalu yanje yakhalangwe mbu inzu yamasaayo.’ Nebutswa inywe muchikholile okhuba imbinga yabanuuli.”

⁴⁷Buli inyanga Yesu yechesinjia muhekalu. Ne abakhulundu babesaaliisi nende abeechesia bamalako nende abemilisi babandu bakhaaba shinga olwa bakhamwira,

⁴⁸nebutswa shibanyoola shinga olwa bakhamwiira ta, shichila abandu boosi bali nibarecheresinjia okhwechesiakhwe, nibalenya okhuchweya okhuhulila likhuwa kata elala tawe.