Read wanga LUKA 2 Bible Online

LUKA 2 - wanga bible

LUKA 2

¹Mutsinyanga etsio, omuruchi Agusito wa Roma yahaana lilako naboola mbu, abandu boosi abali hasi woburuchi bwa Roma babalwe.

²Khuno khwali okhubalwa khwambeli, okhwakholwa olwa Kurenio yali omukafuna wa Siria.

³Mana abandu boosi nibatsia okhuhandichisibwa khulwa okhubalwa, buli shiamulala mwitookho lia yebulwamwo.

⁴Mana Yosefu yesi narula mwitaala lia Nazareti elili mu Galilaya, natsia mwitookho lia Daudi, elia Betselehemu elili mu Yuda, okhuba Yosefu yali womulwibulo lwa Daudi.

⁵Yosefu yatsia okhwihandichisia halala nende Mariamu omukhasiwe, owa yali niyenyanga okhuteshia. Ne Mariamu yali nali inda.

⁶Ne olwa bali nibali Betselehemu, inyanga ya Mariamu okhwibula niyula.

⁷Niyebula omwana omusiani omwikulanda, ne namukanyila mungubo tsiomwana omutoro, namwalisia mulwelo, okhuba obwiyangu shibwalikhwoho munzu yabacheni tawe.

⁸Ne mulukongo olwo balimwo abaayi abekhalanga mushiayo eshilo shiosi nibalindanga emiruko chiabwe.

⁹Mana omumalaika owa OMWAMI Nyasaye nabaloleshela, ne oluyali olwa OMWAMI Nyasaye nilubaashila tsimbeka tsiosi. Nabo nibaria muno.

¹⁰Nebutswa omumalaika oyo nababoolela, ari, “Shimularia ta! Okhuba lole, emuleereere amakhuwa amalayi akokhwikhoya akalareera omwikhoyo omukhongo khubandu boosi.

¹¹Shichila leelo luno mwitookho lia Daudi, mwibuliilwe omuhonia wenywe, niye Kristo Omwami.

¹²Eshilolelo eshilamumanyia amakhuwa kano njieshino mbu, mulanyoola omwana omutoro nakanyiilwe mungubo tsiabaana abatoro, ne niyalisiibwe mulwelo.”

¹³Mana nibetsukhana butswa omukanda omukhongo okwabamalaika bomwikulu nikuli halala nende omumalaika oyo, nibetsoominjia Nyasaye nibaboola bari,

¹⁴“Oluyali lube khu Nyasaye ikulu mwikulu, nakwo omulembe kube khushialo, mubandu abamuchamisinjia.”

¹⁵Ne olwa abamalaika abo barulaho nibakalukha mwikulu, abaayi abo baboolelana abeene khubeene bari, “Chende khutsie Betselehemu, khulole amakhuwa kekholeeshe kano, aka Omwami akhumanyiye.”

¹⁶Mana nibatsia bwangu, ne nibanyoola Mariamu nende Yosefu nende omwana owali niyalisiibwe mulwelo.

¹⁷Ne olwa abaayi bali nibaluutsi omwana oyo, baboolela Mariamu nende Yosefu amakhuwa koosi aka omumalaika oyo yali naboolile khumwana oyo.

¹⁸Boosi abahulilakhwo amakhuwa kabaayi abo bahuka muno.

¹⁹Nebutswa Mariamu yatsiililila okhuyililisia amakhuwa ako koosi mumwoyokwe.

²⁰Abaayi nabo nibakalukha ewabwe nibembanga nibetsoomia Nyasaye, khulwa koosi aka bali nibahuliile khandi nibaluutsi, shichila kali butswa shinga lwomumalaika oyo yali nababooleele. .

²¹Ne olunyuma lwetsinyanga munane, lwomwana tsana oyo yali nashebilwe, yakulikhwa eliira mbu, Yesu, eliira eliomumalaika yali niyamukulikha Mariamu nashili kata okhuhela inda.

²²Ne tsinyanga tsiola etsia Yosefu nende Mariamu okhukhola omulukha kwokhusiiywa khwabwe, shinga olwa lilako lia Musa liali. Kho nibabukula omwana Yesu nibatsia Yerusalemu, nibamuhaana imbeli owa OMWAMI Nyasaye,

²³shinga olwa kahandikwa mumalako aka OMWAMI Nyasaye mbu, “Buli eshikulanda eshisaatsa okhuula shihaanilwe OMWAMI Nyasaye.”

²⁴Khandi bali nibatsiile okhukhola omusango shinga olwa amalako aka OMWAMI Nyasaye kaboola mbu, amahusi kabili noho amakuuku amaraaka kabili.

²⁵Mutsinyanga etsio, yaliho omundu owalangwa mbu, Simoni, owali niyamenya Yerusalemu. Yali omundu omulunjishi khandi owahelesinjia Nyasaye oluyali, ne yali nalindililanga okhuhonibwa khwa Isiraeli, ne Roho Omutakatifu yali muye.

²⁶Ne Roho oyo yamusuubisia mbu, shiyakhafwekhwo nashili okhulola Kristo, owa OMWAMI Nyasaye yali niyasuubisia tawe.

²⁷Simoni niyemililwe nende Roho, yenjila muhekalu. Ne olwa abebusi bomwana Yesu bamureera muhekalu okhumukholela shinga olwa amalako kenyanga,

²⁸Simoni yabukula omwana mumakhonoke, namwitsoomia Nyasaye naboola ari,

²⁹“Bulano, OMWAMI Nyasaye, wusiye indakanoyo, kho lekha isie omukhalabaniwo efwe mumulembe.

³⁰Okhuba isie omwene emalile okhulola obuhoniabwo,

³¹obwa warechekha mbu buloleshe khubandu boosi.

³²Khandi obwa wakhola okhuba obulafu obwokhufwimbula injilayo khubamahanga, nende obwokhureera oluyali khubandubo ba Isiraeli.”

³³Ne samwana omwana nende nyina omwana bahuchisibwa muno khulwa amakhuwa ka Simoni yaboola khumwana oyo.

³⁴Simoni nabasabila ikhabi naboolela Mariamu nyinamwana Yesu ari, “Omwana uno aloboolwe nende Nyasaye khulwa okhusasibwa nende okhuhonibwa khwabandu abanji mu Isiraeli. Alaba eshilolelo eshirula khu Nyasaye, eshia abandu abanji balifukula,

³⁵khandi eshiokhubisula amabiso kamayililisio kabwe. Nawe wakhabe neshibeela eshikhongo mumwoyokwo eshiakhakhusaalisie shinga oufimiirwe nolukanga olumemu.”

³⁶Ne yaliho omulakusi omukhasi oweliira mbu, Ana, omwenoyo yali omukhaana wa Fanueli, owomuluyia lwa Asheri. Yali omushiele muno, khandi yali niyamenya nomusaatsawe emiyika musafu okhurula nateeshibwa.

³⁷Khandi yamenya nali omulekhwa khulwemiyika amakhumi munane nachine. Nebutswa emiyika echio chiosi, yamenyanga butswa muhekalu. Yenamilanga OMWAMI Nyasaye eshilo neshiteere, nahonga inzala nende okhusaaya.

³⁸Ebise bienebio, yakhupila Nyasaye orio, ne naboola khukomwana oyo khuboosi abali nibalindililanga Nyasaye okhununula Yerusalemu.

³⁹Ne olwa Yosefu nende Mariamu bali nibamalile okhukhola akamalako aka OMWAMI Nyasaye yalaka, bakalukha Galilaya mwitaala liabwe lia Nazareti.

⁴⁰Mana omwana oyo nakhula khandi naba owamaani, khandi niyetsulamwo obuchesi naye Nyasaye namuhelesia ikhabi.

⁴¹Ne buli khumuyika abebusi ba Yesu batsitsanga Yerusalemu khulwa lisabo lia Pasaka.

⁴²Ne olwa Yesu yali niyolile emiyika ekhumi nachibili, abebusibe batsia ninaye khulwa lisabo elo, shinga olwa bakholanga buli lwosi.

⁴³Mana olwa lisabo liahwa, bachaaka okhukalukha nango wabwe, ne omuraaka Yesu natong'a Yerusalemu abebusibe nibalamanyile tawe.

⁴⁴Bapaara mbu ali mumukanda, kho nibachenda oluchendo lweshiteere eshilamba, ne nibachaaka okhumukhaaba mubekho nende mubetsa babwe.

⁴⁵Nebutswa shibamunyoola ta, kho nibakalukha Yerusalemu okhumukhaabayo.

⁴⁶Khunyanga yakhataru, bamunyoola nali muhekalu niyekhaale nende abeechesia ba Abayahudi, nahulilanga akababoola naye nabareebanga amareebo.

⁴⁷Ne boosi abamuhulila bahuchisibwa nende obuchesibwe khandi nende amakalusioke.

⁴⁸Ne olwa abebusibe bamulola bahuka, mana nyinamwana namuboolela ari, “Mwana wanje, mbushiina nokhukhola orio? Papawo ninasi khukhukhaabilenje nikhuhenda omwoyo muno.”

⁴⁹Naye nabakalusia naboola ari, “Muukhaabilenje mbushiina. Shimumanyilekhwo mbu ekhoyile okhuba munzu ya Papa wanje tawe?”

⁵⁰Nabo nibalamanyilisia eshisina shiamakhuwa aka yababoolela ako tawe.

⁵¹Mana natsia ninabo, nibakalukha Nazareti, naye naba omuhulili khubo, naye nyinamwana natsiililila okhuyililisia amakhuwa ako koosi mumwoyokwe.

⁵²Mana Yesu natsiililila okhukhula mumubili nende mumachesi, ne naba noluyali imbeli wa Nyasaye nende abandu boosi.