Read wanga LUKA 20 Bible Online

LUKA 20 - wanga bible

LUKA 20

¹Inyanga yindi olwa Yesu yali niyechesinjia Injiili muhekalu, abakhulundu babesaaliisi nende abeechesia bamalako halala nende abakofu betsa,

²nibamuboolela bari, “Khuboolelekhwo, nibunyali shiina obuchilanga nokhola amakhuwa kano? Owakhuhelesia obunyali buno niwiina?”

³Yesu nabakalusia ari, “Bulano leshe nasi emureebe lireebo, mboolelekhwo,

⁴Obubatiisi bwa Yohana bwarula hena? Bwarula khu Nyasaye noho mubandu?”

⁵Nabo nibachaaka okhuyingana abeene khu beene bari, “Khuboole shiina? Nikhuboola mbu, ‘bwarula khu Nyasaye’, alakhureeba ari, ‘Ne mbushiina nimulamusuubila Yohana tsana oyo?’

⁶Ne nikhuba nikhuboola khuri, ‘bwarula mubandu,’ abandu boosi balakhulasa namachina shichila bamanya mbu, Yohana yali omulakusi.”

⁷Kho nibakalusia bari, “Shikhumanyile ewabwarula tawe.”

⁸Naye Yesu nababoolela ari, “Kata siesi shimuboolela mbu nobunyali shiina obuchilanga nikhola amakhuwa kano tawe.”

⁹Mana Yesu naboolela abandu oluchelo luno ari, “Omundu undi yaraka emitsabibu mumukunda, mana nahosia omukunda okwo abalimi, naye natsia mushialo shindi namenyayo tsinyanga tsinyinji.

¹⁰Olwa tsinyanga tsiola etsiokhunoka emitsabibu yaruma omukholiwe khubalimi abo mbu bamuhelesie eshitonyeshie eshielichesa lietsitsabibu. Nebutswa abalimi abo banywekha omukholiwe oyo nibamuloonda amakhono amakhaya.

¹¹Kho naruma khandi omukholi undi, nebutswa abalimi abo bamunywekha nibamukholela akeshifimbwa murwe mana khandi nibamuloonda amakhono amakhaya.

¹²Naruma omukholi owakhataru, yesi khandi nibamusalisia nibamuloonda.

¹³Omwami mwene mukunda kwemitsabibu naboola ari, ‘Nekhole shiina? Ndalaruma omwana wanje omuheelwa; haundi omwene uno balamuhelesia oluyali!’

¹⁴Ne olwa abalimi abo bamulola, baboolelana abeene khubeene bari, ‘Uno niye omwene obulaame bwomukunda kuno, kho chende khumwire mana emianduchie chilaba echiefwe!’

¹⁵Kho nibamurusia mumukunda kwemitsabibu, nibamwira.” Yesu nareeba ari, “Kho bulano omwami omwene mukunda alakhola arie abalimi abo?

¹⁶“Aletsa okhusasia abalimi abo nende okhuhelesia abandu bandi omukunda okwo.” Ne olwa abandu bahulilakhwo ako baboola bari, “Shikalekholekha kario tawe!”

¹⁷Mana Yesu nabahenga nabareeba ari, “Kho eshisina shia Amahandiko kano mbu, ‘Lichina liabombashi baloba, likholile olwanzilo lwomuse’ nishiina?

¹⁸Buli omundu oukwa khwichina elo, alafinikhamwo ebitonye, naye owa lichina elo likwila, alatubushila elala.”

¹⁹Olwa abeechesia bamalako nende abakhulundu babesaaliisi bamanyilisia mbu, oluchelo olwo lwali olwokhubafukula, bateema okhumutiila eshise shiene eshio, nebutswa baria abandu.

²⁰Kho nibakhaaba shinga olwa banyala okhumureka. Nibamurumila abandu, abekhola okhuba abalunjishi, khulwa okhumunonelesia mu aka aboola. Kho bamuhambe, nibamuhaana khubobunyali nende aboburuchi bwomukafuna omuroma.

²¹Abanonelesi abo nibaboolela Yesu bari, “Omwechesia, khumanyile mbu akoboolanga nede okhwechesia nakahabwene. Khandi khumanyile mbu, shioyekhanga olubeka lulala ta, habula wechesinjia akokhwenya okhwa Nyasaye khu abandube mubwatoto.

²²Kho khuboolelekhwo; nahabwene okhurunga obushuru khumuruchi owa Roma?”

²³Nebutswa Yesu yalola obubatsa bwabwe mana nababoolela ari,

²⁴“Manyiekhwo lipesa; obukondo buno nende eliira lilikhwo lino nebia wina?” Nibakalusia bari, “Nebia Omuruchi owa Eburoma.”

²⁵Kho Yesu naboola ari, “Nikali kario ebindu biomuruchi owa Abaroma mumurunjenje; nabio ebia Nyasaye mumurunjenje Nyasaye.”

²⁶Nabo nibakhaywa okhutiilakhwo likhuwa liosi mukhuboolakhwe okhwo mana nibaholeela butswa nibachenyanga khwikalusio lilie elo.

²⁷Mana abandi khuba Sadukayo, ababoolanga mbu abandu shibalilamukha okhurula mubafu ta, betsa khu Yesu nibamureeba bari,

²⁸“Omwechesia, Musa yakhuhandichila lilako mbu, ‘Omundu nafwa, ne nalekha omukhasi ne nalalekhakhwo omwana ta, omusiani wabwe okhuula akalusie omukhasi omulekhwa oyo, yebulile omusiani wabwe oyo abaana.’

²⁹Kho baliho abasiani musafu abomunzu ndala; omukhulundu yateshia omukhasi, ne nafwa nashili okhunyoolakhwo abaana.

³⁰Mana owakhabili nakalusia omukhasi omulekhwa oyo,

³¹khandi owakhataru ario. Kekholekha kario khuboosi musafu, boosi bafwitsanga nibashili okhunyoolakhwo omwana nomukhasi oyo.

³²Mukhumalilikha, omulekhwa oyo yesi nafwa.

³³Bulano khunyanga eya abafu balibuukha nibalamukha okhurula mukhufwa, omukhasi oyo aliba owawina khumusafu abo? Shichila abasiani abo boosi bateshia omukhasi oyo.”

³⁴Yesu nabakalusia ari, “Abasaatsa nende abakhasi bolwibulo luno bateshinjia nende okhuteshibwa,

³⁵nebutswa abasaatsa nende abakhasi abanyoolekha nibakwanile okhulamusibwa okhurula mubafu mana bamenye mutsinyanga tsiolunyuma, shibaliteshia noho okhuteshibwa tawe.

³⁶Bakhabe shinga abamalaika abalanyala okhufwa tawe. Nabo baliba abaana ba Nyasaye, shichila balamusibwe okhurula mukhufwa.

³⁷Kata Musa akhumanyinjia habulafu mbu, abafu balilamusibwa. Mutsinyali tsieshitsakha shiakha omulilo, Musa yaboola khu Omwami ari, ‘Niye Nyasaye wa Aburahamu, khandi niye Nyasaye wa Isaka, khandi Nyasaye wa Yakobo.’

³⁸Kho niye Nyasaye owa abalimwoyo, shiali Nyasaye wabafu tawe; shichila khuye boosi balimwoyo.”

³⁹Abandi khubechesia bamalako nibamukalusia bari, “Omwechesia oboolile obulayi!”

⁴⁰Okhuba shibatsaalikha okhumureeba lireebo lindi liosi liosi khandi tawe.

⁴¹Kho Yesu nabareeba ari, “Kho baboolanga barie mbu, Kristo aliba omwana wa Daudi?

⁴²Okhuba Daudi omwene yaboola mushitabushie shietsitsabuli ari, ‘OMWAMI Nyasaye yaboolela Omwami wanje ari, yikhala khumukhono kwanje omusaatsa,

⁴³okhuula olwa era abasukubo hasi wamakuluko babe shinga eshifumbishio.’

⁴⁴Daudi omwene yamulanga ‘Omwami’, kho Kristo yakhaba arie Omwana wa Daudi?”

⁴⁵Ne olwa abandu boosi bali nibamurechelesinjia, Yesu yaboolela abeechibe ari,

⁴⁶“Mube meeso khubechesia bamalako abachamanga okhuchenda nibefwalile tsikanzu tsirambi, nende okhushiesibwa noluyali mubiiro; bachama okhwikhala khubifumbi bieimbeli mutsisinagogi nende okhwela habundu aholuyali mumasabo.

⁴⁷Abasandinjia abakhasi abalekhwa nende okhubanuula ebindu, nibekaatia khulwa okhusaaya amasaayo amarambi! Abo balihelesibwa eshinyasio eshikhongo okhushila!”