Read wanga LUKA 21 Bible Online

LUKA 21 - wanga bible

LUKA 21

¹Yesu yahenga nalola abayinda nibaretsanga ebihaanwa biabwe mwisanduku elia muhekalu,

²khandi nalola omukhasi omulekhwa khandi omumanani naretsangamwo amang'ondo kabili.

³Mana naboola ari, “Emuboolela toto mbu, omukhasi omulekhwa khandi omumanani uno areelemwo amanji okhushila abandi boosi.

⁴Okhuba abandi boosi bahaanile khubitong'anga khubuyinda bwabwe; nebutswa ye, mubumananibwe, ahaanile koosi akabele ninako, niko konyene akayeletilekhwo mubulamubwe bwosi.”

⁵Abandi khubeechi bali nibaboolanga khu keihekalu, shinga olwa yali niyang'oonwa nende amachina kobukusi nende khukebihaanwa ebiahaanungwa khu Nyasaye. Yesu naboola ari,

⁶“Mulolanga ihekalu yino, tsinyanga tsitsanga olwa kata lichina elala shililitong'akhwo khulindi tawe, buli lichina liakhasasibwe.”

⁷Kho nibamureeba bari, “Omwechesia amakhuwa kano kalikholekha liina? Ne nishilolelo shiina eshilibaho olwa kaliba nikali ahambi okhwikholekha?”

⁸Yesu naboola ari, “Mube meeso, omundu aleshe okhumukosia. Okhuba abandu abanji bakhetse muliira lianje nibaboola bari, ‘Isie nisie Kristo!’ Khandi mbu, ‘Ebise biulile!’ Mulabalondakhwo ta.

⁹Olwa mulahulila akamahe nende indiri, mularie ta, okhuba ako kakhoyile karanjilile okhwikholekha, nebutswa eshihesi shishiletsa lwangu tawe.”

¹⁰Mana nameeta okhuboola ari, “Okhuba lihanga lilalwana nende lihanga lindi, nabwo oburuchi bulaseera oburuchi bundi.

¹¹Ne khulabaho okhurenga okhukhongo khweshialo, inzala nende olumbe buli habundu. Khandi indiri eyokhurisia nende ebilolelo biamakana okhurula mwikulu.

¹²Ne ako koosi nikashili okhwikholekha, mulatiilwa nende okhusandibwa; balamuyila mutsisinagogi okhumuyaasia nende okhumura mumbohe; balamureera imbeli wabaruchi nende abaami khulwa eliira lianje.

¹³Kho nilwo olwa muliba nimunyoolile obwiyangu obulayi bwokhuyaala Injiili yanje.

¹⁴Nebutswa nimushili okhutsia imbeli weshiina okhuyaasibwa, mulahende omwoyo nimuyililisia shinga olwa mutsia okhukalusia amareebo mushina tawe,

¹⁵shichila ndalamuhelesia amakhuwa nende amachesi akokhuboola, kho mbu kata abafukuli benywe shibalanyala okhukaana noho okhufukula amakhuwa ako tawe.

¹⁶Khandi mulakhobwa nabebusi benywe nende abaana benywe, abekho benywe nende abetsa benywe, kata abandi khwinywe muleerwa.

¹⁷Abandu boosi balamusila inywe khulwa isie.

¹⁸Kata kario mulalindwa obulayi, kho mbu kata liswi elala shililakorakhwo okhurula khumirwe chienywe tawe.

¹⁹Nebutswa mulafwa emioyo ta, okhuba mulihonia obulamu bwenywe khulwa okhwisimilisia khwenywe.

²⁰“Ne olwa mulilola litookho lia Yerusalemu nilibotokhanwe nende abelihe, nolwa mulimanya mbu lili ahambi okhusasibwa.

²¹Kho abali Yudea belushile mubikulu, nabo abali hakari mwitookho barulemwo, kata abali elwanyi welitookho baleshe okhwinjila mukari,

²²okhuba etsio tsiliba ‘Tsinyanga tsieshinyaasio,’ kho mbu akahandikwa koosi kahesibwe.

²³Kaliba akamasila khubakhasi abaliba nibali tsinda nende abaliba nibanuninjia abaana. Okhuba amasila amakhongo kalibaho khushialo khandi eshinyasio shia Nyasaye shiliitsa khubandu abo.

²⁴Abandi baliirwa nolukanga, nabo abandi baliyilwa mubuhambe mumahanga kandi; nalio litookho lia Yerusalemu lilisenachilwa nende abandu abamahanga, okhuula olwa ebise ebia abamahanga ako okhuruka biliba nibihwele.”

²⁵“Khulibaho nebilolelo biamakana, ebililolekha khuliuba, khumwesi nende khutsing'ining'ini. Ne abokhushialo boosi balitiilwa noburi nibahenda omwoyo khulwa okhuhoola khweinyanza nende amarunda kayo amakhongo.

²⁶Abandu balifwa emioyo khulwa oburi nibalindilila aketsa okhwikholekha khushialo shiosi, okhuba ebilonje biamaani biomwikulu bilitechesibwa nibirusibwa mubwikhalo bwabio.

²⁷Ne nilwo olwa balilola Omwana womundu niyetsanga mwileesi nobunyali nende oluyali olukhongo.

²⁸Ne olwa amakhuwa kano kalichaaka okhwikholekha, mulihenga ikulu nimuchinguula emirwe chienywe, shichila obununulwi bwenywe buliba nibuli ahambi.”

²⁹Mana Yesu nababoolela oluchelo luno ari, “Lolele khumukhuyu nende emisaala chindi chiosi;

³⁰olwa mulolanga nichisebukha, mumanyanga abeene mbu tsinyanga tsieshiubwe tsili ahambi.

³¹Kho olwa mulilola amakhuwa ako nikachachile okhwikholekha mulimanya mbu, obwami bwa Nyasaye buli ahambi okhwitsa.

³²“Emuboolela toto mbu, olwibulo luno shilulihwaho ta, okhuula olwa kano koosi kaliba nikamalile okhuusibwa.

³³Likulu nende eshialo bilihwaho nebutswa amakhuwa kanje shikalihwaho tawe.

³⁴“Ne mube meeso! Muleyinjisia mubulangu, obumeesi nende okhuhendela akobulamu bweshialo shino tawe! Nebutswa mulitsukhana inyanga eyo niyulile.

³⁵Shichila yilitsa shinga omubero khuboosi abamenyanga khushialo.

³⁶Kho mubetsenje meeso buli shise, nimusaaya mbu mube namaani akokhuhula nende okhwihonokosia okhurula mumakhuwa kano koosi nende akokhusinjila imbeli ewa Omwana womundu.”

³⁷Kho mutsinyanga etsio, Yesu yechesinjia muhekalu mushiteere, ne mushilo yatsitsanga mushikulu eshia Miseituni.

³⁸Ne mumabwibwi abandu boosi bahunanga muhekalu okhutsia okhumurecheresia.