Read wanga LUKA 22 Bible Online

LUKA 22 - wanga bible

LUKA 22

¹Kho tsinyanga tsielisabo liomukaate okubulamwo limela, elilangwa mbu Pasaka tsiali nitsili ahambi okhuula.

²Nabo abakhulundu babesaaliisi nende abechesia bamalako bali nibatutanga shinga olwa bakheera Yesu mabiswi; shichila bali nibariire abandu.

³Mana Setani niyenjila mu Yuda oulangwa Isikarioti, owali mulala khubechi ekhumi nababili.

⁴Kho Yuda narula natsia naboola nende abakhulundu babesaaliisi nende abemilisi babalindi bomuhekalu shinga olwa anyala okhukhoba Yesu khubo.

⁵Mana nibasaangaala muno, ne nibafuchilila okhumuhelesia amapesa.

⁶Naye Yuda nafuchilila akabamuboolela mana nachaaka okhukhaaba obwiyangu bwokhuhaana Yesu mumakhono kabwe, abandu nibalamanyile tawe.

⁷Kho inyanga yoola eyelisabo liomukaate okubulamwo limela, olwa ebimeme biasinzungwa khulwa eshiokhulia eshia Pasaka.

⁸Naye Yesu naruma Petero nende Yohana nababoolela ari, “Tsie mukhurecheshele eshiokhulia eshia Pasaka khulie.”

⁹Nabo nibamureeba bari, “Nihena aha wenya mbu khukasilie eshiokhulia eshia Pasaka eshio?”

¹⁰Nababoolela ari, “Olwa muba nimwinjilanga mwitookho, mulakaana nende omusaatsa nachinjile isiongo yamatsi khumurwekwe. Mumulondekhwo mana mwinjile ninaye munzu mwayenjila.

¹¹Mana muboolele omusaatsa mwenenzu muri; ‘Omwechesia areeba mbu, eshikoro eshia alalilamwo eshiokhulia shia Pasaka halala nende abeechibe shili hena?’

¹²Naye alamumanyia eshikoro eshikhongo shieikulu eshikaasbwe obulayi, ne mushikoro eshio nimwo omwa mularechekha buli shindu.”

¹³Nibarula nibatsia nibanyoola butswa shinga olwa yali nababooleele. Mana nibarechekha eshiokhulia eshia Pasaka.

¹⁴Ne olwa isa yola, Yesu yekhala halala nabarumebe okhulia eshiokhulia.

¹⁵Mana nababoolela ari, “Ndayekombilenje muno okhulia ninenywe eshiokhulia shia Pasaka shino nishili okhusandibwa!

¹⁶Okhuba emuboolela mbu, shindakhashiliekhwo khandi ta, okhuula olwa shiliba nishikholilwe okhuba eshilamba mubwami bwa Nyasaye.”

¹⁷Mana Yesu nabukula eshikombe nishitsulemwo idivai, nakhupila Nyasaye orio, naboola ari, “Bukule mukabane inywe mwesi.

¹⁸Okhuba emuboolela mbu, okhurula luno, shindakhanywekhwo idivai khandi ta, okhuula olwa Obwami bwa Nyasaye buliitsa.”

¹⁹Mana khandi nabukula omukaate, nakhupila Nyasaye orio, nakusonyola, nabahelesia naboola ari, “Kuno nomubili kwanje, okuhaanwa khulwenywe. Kholenje murio khulwa okhunzitsulila.”

²⁰Munjila ndala eyo, nabahelesia eshikombe nishitsulemwo idivai olunyuma lwokhulia naboola ari, “Eshikombe shino neindakano ya Nyasaye imbiakha, eyaralisibwa mumabanga kanje akasundulwa khulwa inywe.

²¹“Nebutswa lole! Owitsa okhukhoba ali hano khulitsanga ninaye eshiokhulia.

²²Omwana womundu toto alafwa shinga olwa Nyasaye yamala yaloosia, nebutswa ali mumasila omundu oumukhoba oyo!”

²³Kho nibachaaka okhureebana abeene khubeene bari, “Niwiina khwifwe oulamukhoba.”

²⁴Kho Abeechi nibachaaka okhuyingana abeene khubeene nibareebana mbu, niwiina khubo, omukhongo okhushila abandi boosi.

²⁵Mana Yesu nababoolela ari, “Abaruchi abarukanga abandu bamahanga babarukanga namaani, ne abaruchi abo belanganga mbu ‘Abeetsa babandu tsana abo.’

²⁶Nebutswa shikalaba kario mwinywe tawe, habula ouli omukhongo muno mwinywe, okhuula yekhole omutuutu okhushila boosi, naye ouli omwimilisi, okhuula yekhole omukhalabani.

²⁷Okhuba niwiina omukhongo okhushila oundi, oyo owikhala hasi okhulia eshiokhulia, noho oyo oumukhalabanila? Shiali oyo owikhala hasi okhulia? Nebutswa isie endi hakari mwinywe shinga oyo oukhalabananga.

²⁸“Inywe ninywe ababeele ninasi mukhuteemwa khwanje khwosi;

²⁹ne shinga olwa Papa yambelesia obunyali bwokhuruka, nolwa siesi khandi emuhelesia endio obunyali.

³⁰Mulalia nende okhunywa khumeesa yanje eya mubwami bwanje, khandi mulekhala khubifumbi bioburuchi khulwa okhuyaasia tsimbia ekhumi natsibili tsia Isiraeli.”

³¹Yesu naboola ari, Simoni, “Simoni! Recheresia, Setani yafuchililwe okhumuteema inywe mwesi, mbu yahukhasie abalayi okhurula khubabi, shinga lwomulimi asesanga ingano narusiamwo omukhutsi.

³²Nebutswa ekhusaayile iwe Simoni, mbu obusuubilibwo bulatitiha tawe. Ne lwoba nokaluushe khwisie, otinyilisie abashio.”

³³Naye Petero nakalusia ari, “Omwami, ndirecheshe okhutsia ninawe mumbohe kata okhuula khukhufwa ninawe!”

³⁴Mana Yesu namuboolela ari, “Ekhuboolela iwe Petero mbu, itaywa niyishili okhulakula eshilo shino, olaba niwakhanzikaana okhuula khataru mbu shiumanyile isie tawe.”

³⁵Mana Yesu nareeba abeechibe ari, “Olwa ndamuruma okhutsia nimulalikhwo neshibeeti kata eshisiiko noho ebilaaro ta, mwatambakhwo eshindu shiosi shiosi noho?” Nabo nibakalusia bari, “Shikhwatambakhwo eshindu shiosi shiosi tawe.”

³⁶Kho Yesu naboola ari, “Nebutswa bulano yesi yesi ouli neshibeeti noho eshisiko okhuula ashibukule. Ne yesi oubula olukanga okhuula akusie inguboye akule olukanga.

³⁷Okhuba emuboolela mbu, Amahandiko akaboolanga mbu, ‘Yabalilwa halala nabakhayi,’ okhuula koosibwe, shichila akahandikwa khwisie ako bulano koosibwa.”

³⁸Abeechi nibaboola bari, “Omwami! Lola, khuli hano netsinganga tsibili!” Naye nakalusia ari, “Kahelile!”

³⁹Mana narula mwitookho natsia khushikulu eshia Miseituni shinga olwa yali niyanala, nabo abeechibe nibatsia ninaye.

⁴⁰Ne olwa yoola ahatsana yaho nababoolela ari, “Musaaye mbu, muleshe okhwinjila mukhuteemwa.”

⁴¹Mana nabalekha natsia hambeli hatiiti shinga aha onyala okhulasa lichina. Nasikama hasi mana nasaaya.

⁴²Naboola ari, “Papa, noba nochama, wurusiekhwo eshikombe shiobutsunwi shino. Ne shikalaba akokhwenya khwanje ta, habula akokhwenyakhwo kahesibwe.” [

⁴³Mana omumalaika okhurula mwikulu namuloleshela namutsuubanga okhuma ikholo.[10]

⁴⁴Naye Yesu nanyakhananga ario, yameeta okhusaaya muno narula oluchesi, olwali shinga amaronyelesi kamatsaayi nikaronya hasi.]

⁴⁵Ne olwa yamala okhusaaya ario, yakalukha khubeechibe, nanyoola nibali mundoolo, okhuba bali nibachoonyile khulwa eshibeela.

⁴⁶Nabareeba ari, “Mbushiina nimukonanga tsindoolo? Buushe musaaye mbu muleshe okhwinjila mukhuteemwa.”

⁴⁷Ne olwa Yesu yali nashiboolanga, omukanda omukhongo kwolaho nikwimililwe nende Yuda mulala wokhubechibe ekhumi nababili. Niyetsa ahambi nende Yesu mbu amufumbeelele.

⁴⁸Nebutswa Yesu yamureeba ari, “Yuda, okhoba Omwana womundu khubasukube khulwa okhumufumbeelela?”

⁴⁹Ne olwa abeechi abali nende Yesu balola bario, bareeba Yesu bari, “Omwami, khubareme netsinganga tsino noho?”

⁵⁰Mana mulala khubo nakhupa omukhalabani womwisaaliisi omukhongo nende okhurema eshirwishie shiomukhono musaatsa.

⁵¹Nebutswa Yesu yaboola ari, “Leshele habwenaho!” Natiila khushirwi shiomundu oyo mana namuhonia.

⁵²Kho Yesu nareeba abesaaliisi abakhulundu nende abemilisi babalindi bomuhekalu nende abakofu abali nibetsile okhumutiila ari, “Mwitsile netsinganga nende tsindabushi shinga abetsa okhutiila omunuuli?

⁵³Ndabelenje muhekalu buli nyanga ne shimwayandililekhwo ta. Nebutswa shino neshise shienywe shiokhukhola murio, lwobunyali bweshilima bushirukanga.”

⁵⁴Mana nibatiila Yesu nibamuyila munzu yomwisaaliisi omukhongo; naye Petero yali nabalondangakhwo inyuma ehalekhwo.

⁵⁵Omulilo kwali nikubwanilwe mulwanyi hakari, ne Petero niyetsoka mubandu abaliho niyoora omulilo halala ninabo.

⁵⁶Ne mulala khubakholi beshikhaana yamulola niyekhaale hamulilo yaho, ne namuhenjelesia obulayi mana naboola ari, “Omundu uno yesi abeele nende Yesu!”

⁵⁷Nebutswa Petero yekaana naboola ari, “Iwe, isie kata shiemumanyile ta!”

⁵⁸Olunyumakhwo omusaatsa undi nalola Petero namuboolela ari, “Iwe wesi oli mulala khubo!” Nebutswa Petero nakalusia ari, “Iwe, isie tawe.”

⁵⁹Ne olunyuma olwa isa ndala, omusaatsa undi naralisia amakhuwa ako naboola ari, “Toto mwene omusaatsa uno yabelenje nende Yesu, okhuba yesi khandi nomugalilaya!”

⁶⁰Naye Petero nakalusia ari, “Iwe, shiemanyile akoboolanga tawe!” Ne habwene nahabwene Petero nashiboola, itaywa niyilakula.

⁶¹Mana Omwami nashiukhana, nahenga Petero. Kho Petero niyetsulila mbu, Omwami yali namuboolele ari, “Itaywa niyishili okhulakula eshilo shiolwa leelo, olaba niwunzikaanile okhuula khataru mbu shihumanyile tawe.”

⁶²Mana Petero narula elwanyi nalila obululu.

⁶³Abandu abali nibamutilile Yesu bamunyokhoosia khandi nibamunywekha.

⁶⁴Bamufwimba mumoni neshitambaya nibamureeba bari, “Rumbulakhwo, oukhunyweshile niwiina?”

⁶⁵Khandi nibamunyeka amanyeko kandi amanji.

⁶⁶Ne olwa bwashia, abakofu ba Abayahudi, abesaaliisi abakhulundu nende abeechesia bamalako bakhung'ana halala, mana Yesu nareerwa imbeli weshiina shiabwe.

⁶⁷Nibamureeba bari, “Khuboolelekhwo, niwe Kristo?” Nabakalusia ari “kata nimba nimuboolela shimulasuubila tawe;

⁶⁸Kata nimureeba inywe lireebo, shimulangalusia tawe.

⁶⁹Ne okhurula olwa leelo Omwana womundu alekhala khumukhono musaatsa okwa Nyasaye, omunyali webindu biosi.”

⁷⁰Kho boosi nibaboola bari, “Kho niwe Omwana wa Nyasaye noho?” Yesu nabakalusia ari, “ninywe abamalile okhuboola murio.”

⁷¹Mana nibaboola bari, “Shikhukhaaba obuloli bundi khandi tawe! Ifwe abeene khuhulile omwene nakarumbula nomunwakwe.”