Read wanga LUKA 23 Bible Online

LUKA 23 - wanga bible

LUKA 23

¹Mana abandu boosi nibayila Yesu imbeli wa Pilato.

²Nibachaaka okhumwinjilila itookho nibaboola bari, “Khwanyoolile omundu uno nakoyasinjia abandu befwe nabakaninjia mbu balarunga obushuru bwomuruchi wa Roma tawe. Khandi naboolanga mbu, ye niye Kristo, Omuruchi.”

³Naye Pilato nareeba Yesu ari, “Niwe omuruchi wa Abayahudi noho?” Yesu nakalusia ari, “Niwe ouboolile.”

⁴Mana Pilato naboolela abakhulundu abesaaliisi nende abemikanda ari, “Shiendoola omundu uno nali neshikha shiosi shiosi eshichila akhalachilwe eshiina tawe.”

⁵Nabo nibatsiililila okhumulunyia bari, “Mukhwechesiakhwe, ayakululanga abandu okhuchaaka indiri mu Yudea mwosi. Yachaachila Galilaya, ne bulano witsile hano.”

⁶Ne olwa Pilato yahulila ario, yareeba ari, “Omundu uno nomugalilaya noho?”

⁷Ne olwa yamanya mbu Yesu yali owomuburuchi bwa Herode, yamuhaana khu Herode, owali nali yesi mu Yerusalemu munyanga etsio.

⁸Olwa Herode yalola Yesu, yatsaatsahala muno, shichila yali niyahulila ifuma ya Yesu oluhoono olurambi. Ne yekombanga okhumulolakhwo shichila yali nanaayanga mbu, Yesu amukholelekhwo eshilolelo shiamakana.

⁹Kho Herode nachaaka okhumureba amareebo amanji, nebutswa Yesu shiyamukalusiakhwo likhuwa liosi liosi tawe.

¹⁰Kho abakhulundu babesaaliisi nende abeechesia bamalako nibasinjila nibaboola amakhuwa amabi muno khu Yesu.

¹¹Mana Herode halala nabelihebe nibatseshelela Yesu, khandi nibamukholela akalakwanile tawe. Nibamufwala ikanzu ying'inang'ina, mana nibamukalusia ewa Pilato.

¹²Mana khunyanga eyo, Herode nende Pilato nibekhola abeetsa, nebutswa ako nikashili okhwikholekha balinji abasuku.

¹³Kho Pilato nakhung'asia halala abakhulundu babesaaliisi nende abaruchi nende abandu boosi,

¹⁴nababoolela ari, “Mureelire omundu uno ewanje nimuboola mbu akosinjia abandu. Nasi enonelesiye amakhuwake, ne shinyolilekhwo eshikha shiosi mumundu uno khumakhuwa aka mumwinjililekhwo itookho tawe.

¹⁵Kata Herode yesi shiamunyoolile neshika ta, niko akachilile namukalusia khwifwe. Ne lole, libulaho likhuwa liosi liosi elia yakholile elichila akhalachilwe okhufwa tawe.

¹⁶Khulweshio ndalalaka abelihe banje bamunyweshe mana emulekhuule.” [

¹⁷Buli olwa lisabo lia Pasaka liolanga, Pilato yabalekhulilanga omubohe mulala owabachama mbu abololwe.]

¹⁸Nebutswa omukanda kwosi halala nibaboola nomwoyo omukhongo bari, “Omundu uno yeerwe! Okhulekhuulile Baraba!”

¹⁹(Baraba yali niyabohwa khulwa obwiiri, khandi yali niyarela induli mwitookho).

²⁰Pilato yenya okhulekhuula Yesu kho nareeba omukanda khandi.

²¹Nebutswa nibayiiba nibakalusia bari, “Mubambe! Mubambe!”

²²Pilato naboola ninabo olwakhataru ari, “Ne nilibi shiina liakholile? Shinyoolanga muye eshikha shiosi shiosi eshichila yerwe ta! Ndalalaka abelihe banje bamunyweshe mana emulekhuule!”

²³Nabo nibatsililila butswa okhuyiiba obutinyu mbu, okhuula Yesu abambwe, ne mukhumalilikha okhuyochela khwabwe okhwo khwamala nikhuhula.

²⁴Kho Pilato nakhalachila Yesu eshiina shiokhufwa shinga olwa bali nibenyile.

²⁵Namala nalekhuula omundu watsana owali niyabohwa khulwa induli nende obwiiri, ne nahaana Yesu khubo mbu bamukholele shinga olwa benya.

²⁶Abelihe babukula Yesu nibarula ninaye, ne olwa bali nibatsitsanga, banyoola omusaatsa undi oulangwa mbu Simoni, owokhurula Kirene, owali niyenjilanga mwitookho. Bamutiila nibamutukha omusalaba kwa Yesu nibamulunyia okhukuchinga nalonda khu Yesu.

²⁷Omukanda omukhongo kwabandu kwamulondakhwo, ne balala khubo bali abakhasi abali nibekhulanga nibamulilila.

²⁸Ne Yesu yashiukhana nababoolela ari, “Inywe abakhasi ba Yerusalemu! Mulandilile isie ta, nebutswa mwililile inywe abeene nende abaana benywe.

²⁹Okhuba lole tsinyanga tsitsanga olwa abandu baliboola mbu, ‘Nabeikhabi abakhasi abakumba nende abo abalayebulakhwo abaana nibanuniakhwo tawe!’

³⁰Ebise ebio, abandu baliboolela tsingulu bari, ‘Khukwile!’ Khandi khu bikulu bari, ‘Khufwiimbe!’

³¹Okhuba nibaba nibakhola kano omusaala nikushili omubisi, nakaleena akabalakhola omusaala nikwakhoma?”

³²Khandi abandu bandi babili abali nibafunache amalako bosi bayilwa mbu batsie berwe halala nende Yesu.

³³Ne olwa boola habundu halangwa mbu, “Eshihanganga,” abelihe Abaroma babambilaho Yesu nende abali nibafunache amalako abo, mulala khumukhono musaatsa kwa Yesu, naye oundi khumukhonokwe mukhasi.

³⁴Yesu naboola ari, “Papa, obaleshele, shichila shibamanyile eshiabakholanga tawe.” . Mana abelihe Abaroma abo nibakhupa ikha khulwa okhukabana ebifwalobie.

³⁵Abandu basinjilaho nibahenganga, nebutswa abemilisi aba Abayahudi bamunyokhoosia nibaboola bari, “Yahonia abandi, kho lekha yehonie omwene naba nali ye Kristo wa Nyasaye, owa yalobola!”

³⁶Abelihe bosi nibamunyokhoosia ne nibamuhelesia idivai eyiranyile,

³⁷nibaboola bari, “Noba noli omuruchi wa Abayahudi, wihonie omwene!”

³⁸Khandi hekuluwe bahandiko amakhuwa mbu, “Uno niye Yesu Omuruchi wa Abayahudi.”

³⁹Ne mulala khubali nibafunache amalako abo, owabambwa nende Yesu, yanyeka Yesu naboola ari, “Shioli niwe Kristo watsana? Wihonie omwene khandi okhuhonie ifwe.”

⁴⁰Nebutswa oundi oyo yamuhalabila naboola ari, “Shiohelesiakhwo Nyasaye oluyali ta, ne okhalachiilwe eshiina shilala ninaye?

⁴¹Ifwe khukhoyile okhukhalachilwa eshiina, okhuba khunyoolanga omurungo khulwa ebikhole biefwe ebibi, nebutswa omundu uno shiakholilekhwo libi liosi liosi tawe.”

⁴²Mana naboolela Yesu ari, “Unzitsulile lwolitsa noli Omuruchi.”

⁴³Yesu namuboolela ari, “Ekhuboolela toto mbu, leelo luno olaba ninasi mu Paradiso.”

⁴⁴Ne yali ahambi isaa yakhasasaba eshiteere, olwa eshialo shiosi shieliima okhuula khusaa yashienda.

⁴⁵Ne ingubo eyashinganga muhekalu niyirandukhamwo ebitonye bibili.

⁴⁶Naye Yesu nayiiba nomwoyo omukhongo naboola ari, “Papa! Ehaana omwoyo kwanje mumakhonoko!” Ne olwa yali niyakhaboola ario, yakwisia omwoyo nafwa.

⁴⁷Ne lwomwimilisi wabelihe yalola akali nikekholeeshe, yetsoomia Nyasaye naboola ari, “Omundu uno toto abeele omulunjishi!”

⁴⁸Ne abomukanda abali nibakhung'anileho, olwa balola akekholekha, boosi bakalukha ingo nibekhupanga butswa khubilifu nibabeleele.

⁴⁹Boosi abali nibamumanya Yesu halala nende abakhasi okhurula Galilaya abali nibamulondangakhwo, basinjila ehalekhwo nibalola amakhuwa ako.

⁵⁰Ne omundu undi yaliho owalangwa mbu, Yosefu, owomwitookho lia Arimatsaya liomulukongo lwa Yudea. Yali omundu omulayi khandi omulunjishi owali nalindililanga okhwitsa okhwa Obwami bwa Nyasaye.

⁵¹Yali mulala khubeshiina eshia Abayahudi, nebutswa shiyafuchilisania ninabo khubukhalachi bwabwe nende akabakhola ako tawe.

⁵²Omundu oyo natsia khu Pilato namusaba omubili kwa Yesu.

⁵³Mana nakurusia khumusalaba, nakufimbakhwo isanda yeikitani, ne nakuyabila mung'ani, eyali niyayabwa mulwanda, yomundu yesi yali nashili okhuyabilwamwo tawe.

⁵⁴Yali inyanga yokhwirechekha khulwa inyanga eya Isabato, eyali niyili ahambi okhuchaaka.

⁵⁵Abakhasi abali nibalondile khu Yesu okhurula Galilaya balonda khu Yosefu nibalola ing'ani nende shinga lwomubili kwa Yesu kwarebwamwo.

⁵⁶Nibakalukha nibakaasia emisaala chieshing'ari nende amafura kokhubakha omubilikwe. Ne khunyanga eya Isabato bahuluukha, shinga olwa eshiima shiabwe shiali.