Read wanga LUKA 24 Bible Online

LUKA 24 - wanga bible

LUKA 24

¹Mumabwibwi khunyanga ya Jumapili, abakhasi abo batsia khung'ani, nibachinjile amafura keshing'ari aka bali nibakaasiye.

²Nibanyoola lichina nilimalile okhuselenjesibwa okhurula khung'ani.

³Kho nibenjilamwo, nebutswa shibanyoolamwo omubili okwa Omwami Yesu tawe.

⁴Basinjilaho nibahuchisibwa nende aka bali nibaluutsi, ne nibetsukhana abasaatsa babili nibasinjiileho ninabo, nibefwalile ebifwalo ebing'inang'inu.

⁵Mana nibaria muno nibenamia obweni bwabwe hasi. Abasaatsa abo nibabareeba bari, “Mbushiina mukhaabanga omulamu mubafu?

⁶Shiali hano ta, amalile okhulamusibwa. Mwitsulila shinga olwa yamuboolela nashili Galilaya ari,

⁷‘Omwana womundu okhuula ahaanwe mumakhono kabandu abonooni okhubambwa khumusalaba, ne olunyuma lwetsinyanga tsitaru, alamusibwe.’ ”

⁸Nabo nibetsulila toto aka yali niyaboola,

⁹kho nibarula hang'ani yaho, nibatsia nibaboolela abeechi abo ekhumi namulala nende abandi boosi, amakhuwa ako koosi.

¹⁰Abakhasi abo bali Mariamu Magadalene, Yoana nende Mariamu nyinamwana Yakobo nende abakhasi bandi abali halala ninabo, nibatsia nibaboolela abarume amakhuwa ako.

¹¹Ne amakhuwa ako kalolekha khubarume shinga amakhaya butswa, nibalabasuubila tawe.

¹²Nebutswa Petero yarula tsimbilo natsia khung'ani. Niyenama nahengamwo, nalola isanda yeikitani yonyene. Mana narula nakalukha ingowe nahukanga akali nikekholeshe.[11]

¹³Ne khunyanga yene eyo abalondi ba Yesu babili bali nibatsitsanga mwitaala lia Emau, oluchendo luhela tsikilomita ekhumi nandala okhurula Yerusalemu.

¹⁴Ne bali nibaboolanga khumakhuwa akali nikekholeshe ako.

¹⁵Mana olwa bali nibashiboolanga, Yesu mwene yolaho, ne nachenda ninabo.

¹⁶Bamulola, nebutswa shibamanyilisia mbu niye tawe.

¹⁷Naye nabareeba ari, “Nimakhuwa shiina akamuboolanga nimuchenda?” Nabo nibasinjila nibabeleele muno.

¹⁸Mulala khubo owalangwa mbu, Kiliopa nakalusia namureeba ari, “Niwe omucheni wenyene mu Yerusalemu oulamanyile amakhuwa akayekholeshe mutsinyanga tsindiiti tsibirile tsino ta?”

¹⁹Naye nareeba ari, “Nimakhuwa shiina?” Nibakalusia bari, “Amakhuwa akayekholeshe khu Yesu wa Nazareti. Yali omulakusi khandi yali nobunyali mubikholebie nende mukhwechesiakhwe imbeli wa Nyasaye nende abandu boosi.

²⁰Ne abesaaliisi abakhulundu bamuhaana mushiina mbu, akhalachilwe okhufwa mana nabaambwa khumusalaba.

²¹Nefu khwabeele nikhusuubilanga mbu, niye owakhahoniye Isiraeli. Ne bulano neinyanga yakhataru okhurula amakhuwa ako nikekholekha.

²²Balala khubakhasi abokhumukanda kwefwe bakhuhuchisiye olwa bahuunile khung'ani mumabwibwi,

²³ne nibalanyoola omubilikwe tawe. Bakaluushe nibaboola mbu, baluutsi abamalaika mwilolelo abababooleele mbu, ashiliho mwoyo.

²⁴Nabo abandi khubomukanda kwefwe batsiile khung'ani nibanyoola nikali shinga olwa abakhasi abo bababooleele, ne omwene shibamuluutsi tawe.”

²⁵Mana Yesu nababoolela ari, “Inywe muli abayingwa murie? Muli abemioyo emisiro, echiakhaya okhusuubila koosi akabalakusi baboola!

²⁶Shikali nikamukhoyeele Kristo watsana oyo okhusandibwa ario mana yenjile muluyalilwe?”

²⁷Mana Yesu nachaaka okhubenoosia akaboolwa khuye mu Amahandiko okhuchaachila khukali mu Amahandiko ka Musa nende mu akabalakusi boosi.

²⁸Ne olwa bali niboolanga ahambi mwitaala liabali nibatsiitsangamwo, Yesu yakhola shinga outsiililila imbeli.

²⁹Nabo nibamusaaya, nibaboola bari “Yikhala hano ninefwe, shichila bulano bwakhela ne khandi eshiilima shiliho.” Naye niyenjilamwo mbu yekhale ninabo.

³⁰Olwa yekhala okhulia ninabo, yabukula omukaate, nakusabila ikhabi ne nakusonyola nabahelesia.

³¹Mana tsimoni tsiabwe nitsiamuukha, nibamumanyilisia, naye nabakhamakhwo.

³²Nibaboola bari, “Emioyo chiefwe shichibeelenje shinga echiakha omulilo, olwa aboolilenje ninefwe nikhuli khunjila nakhwinoosinjia aka Mahandiko?”

³³Mana nibarula habwene nahabwene nibakalukha Yerusalemu, nibanyoola abeechi abo ekhumi namulala nibakhung'anile halala nende abandi.

³⁴Abeechi abo bali nibaboolanga bari, “Omwami alamuushe toto. Alolesheele Simoni!”

³⁵Babili abo nabo nibababoolela amakhuwa kali nikekholeeshe khunjila khandi shinga olwa bo bamumanyilisiye niyakhasonyola omukaate.

³⁶Ne olwa babili abo bali nibashiboolanga amakhuwa ako, Yesu mwene nasinjila hakari mubo nababoolela ari, “Omulembe kube ninenywe.”

³⁷Nabo nibaliibwa ling'ang'a, oburi nibubatiila, nibapaara mbu balolanga eshishieno.

³⁸Nebutswa Yesu nababoolela ari, “Mbushiina nimunyakhananga? Mbushiina mukanakaninjia mumioyo chienywe?

³⁹Lole amakhono kanje nende ebilenje bianje, mana mumanye mbu nisie. Ndilekhwo mulole, shichila eshishieno shishilikhwo nende omubili namakumba shinga olwa mulolanga nindi tawe.”

⁴⁰Olwa yamala okhuboola ario, yabamanyia amakhonoke nebilenjebie.

⁴¹Olwa bali nibashili okhusuubila khulwa okhwikhoya khwabwe okhunji khandi nibahukanga, yabareeba ari, “Mulikhwo neshiokhulia?”

⁴²Nibamuhelesia eshitonye shieinyeeni isiche.

⁴³Naye nachibukula nalia nibalolanga.

⁴⁴Mana nababoolela ari, “Kano niko amakhuwa kene aka ndamuboolela, olwa ndali nishili ninenywe. Amakhuwa koosi akahandikwa mumalako ka Musa nende akabalakusi bahandika nende akali mutsitsabuli okhuula koosibwe.”

⁴⁵Mana nayaamuusia tsimoni tsiabwe nabo nibamanyilisia eshisina shia Amahandiko.

⁴⁶Ne nababoolela khandi ari, “Kahandikwa mbu, Kristo watsana akhoyile okhunyakhana, mana khunyanga yakhataru alamusibwe okhurula mubafu.

⁴⁷Khandi mbu, muliiralie amakhuwa kobwikalukhasi nende obuleshelwi bwobwonooni okhuula kayaalilwe amahanga koosi, okhuchaachila Yerusalemu.

⁴⁸Nenyu muboolele abandu boosi buli habundu akamuluutsi.

⁴⁹Nasi omwene ndalamurumila eshia Papa yasuubisia. Nebutswa mwikhale mwitookho lia Yerusalemu okhuula olwa muhebwa obunyali okhurula mwikulu.”

⁵⁰Mana nabemilila okhurula mwitookho elo okhuula Betsania, ne nachinguula amakhonoke nabasabila boosi ikhabi.

⁵¹Ne olwa yali nashibasabilanga ikhabi ario, yabukulwa nayilwa mwikulu.

⁵²Nabo nibamwinamila, ne nibakalukha Yerusalemu nibekhoyanga muno.

⁵³Mana nibatsiililila okhuba muhekalu nibetsoominjia Nyasaye.