Read wanga LUKA 4 Bible Online

LUKA 4 - wanga bible

LUKA 4

¹Yesu yachelela okhurula mumwalo kwa Yorodani niyetsulwemwo Roho Omutakatifu, ne niyemililwa nende Roho watsana oyo okhutsia mushitsiimi,

²ewa Setani yamuteema tsinyanga amakhumi kane. Ne shiyaliakhwo eshiokhulia shiosi shiosi mutsinyanga etsio tsiosi tawe. Kho olwa tsinyanga etsio tsiali nitsihwele, inzala yamuluma.

³Setani namuboolela ari, “Noba noli Omwana wa Nyasaye, laka lichina lino mbu liikhole omukaate.”

⁴Nebutswa Yesu namukalusia ari, “Kahandikwa mbu, omundu shialabetsanga mwoyo khulwa omukaate kwonyene tawe.”

⁵Mana Setani namuyila khushikulu, ne mubwangu namumanyisia amahanga koosi akokhushialo.

⁶Ne namuboolela ari, “Ndalakhuhelesia obunyali khumahanga kano koosi nende obuyinda buno bwosi, shichila bwamala okhuhaanwa mumakhono kanje, ne enyala okhukabilakhwo yesi yesi owenzenya.

⁷Kho noba niwakhanzinamila, amahanga kano koosi kalaba akoko.”

⁸Yesu namukalusia naboola ari, “Amahandiko kaboolanga kari, ‘Omwinamilenje OMWAMI Nyasayewo nomukhalabanila ye yenyene!’ ”

⁹Mana Setani namwimilila okhutsia Yerusalemu, ne namura khubutenje obweihekalu, namuboolela ari, “Noba noli Omwana wa Nyasaye, ruuma okhurula hano okwe hasi,

¹⁰okhuba Amahandiko kaboolanga kari, ‘Nyasaye alalachilisia abamalaikabe okhukhulinda obulayi.’

¹¹Khandi kaboolanga kari, ‘Abamalaika abo balakhuchinga obulayi mumakhono kabwe kho mbu, oleshe okhwisichirala eshilenjeshio khwichina.’ ”

¹²Nebutswa Yesu yamukalusia naboola ari, “Amahandiko kaboolanga kari, ‘Shiolamuteema OMWAMI Nyasayewo tawe.’ ”

¹³Ne olwa Setani yali namalile okhuteema Yesu munjila tsiosi, yamulekhakhwo khulweshise shitiiti.

¹⁴Mana Yesu nakalukha Galilaya, ne obunyali bwa Roho Omutakatifu bwali muye. Mana ifumaye niyitswana mutsingongo tsiosi tsiebweneyo.

¹⁵Kho niyechesia mutsisinagogi tsiabwe, mana abandu boosi nibamwitsoomia.

¹⁶Mana Yesu niyola Nazareti, ewa yali niyakhulila, ne khunyanga eya Isabato, yatsia musinagogi shinga olwa yakholanga buli lwosi, ne nasinjila okhusooma Amahandiko.

¹⁷Mana nibamuhelesia eshitabu eshikanye shiomulakusi Isaya. Nashibambula, ne nanyoola aha kahandikwa kari;

¹⁸“Roho owa OMWAMI Nyasaye ali mwisie, shichila yanzahuule isie okhuyaalila abamanani Amakhuwa Amalayi. Yarumile okhuyaala akobulekhuulwi bwababohe, okhutimbusia tsimoni tsiababofu nende okhulekhuula abasandibungwa.

¹⁹Khandi yarumile okhurumbula mbu, eshise eshia OMWAMI Nyasaye okhuhonia abandube shiulile.”

²⁰Mana Yesu nafumba eshitabu eshio, nakalusilia omukhalabani womusinagogi ne niyekhala. Abandu abali musinagogi omwo boosi nibamurangaala.

²¹Naye nababoolela ari, “Amahandiko ka muhuliile nikasomwa ako, leelo kosiibwe habwene.”

²²Boosi nibamwitsoomia khandi nibahuchisibwa namakhuwa amalayi kayaboola. Ne nibareeba bari, “Wuno shiali niye omwana wa Yosefu?”

²³Naye nababoolela ari, “Emanyile toto mbu, mwakhambooleele oluchelo luno muri, ‘Omusilishi, wihonie omwene.’ Khandi mwakhambooleele muri, ‘Khukholelekhwo mwitaala mwefwe muno akakhwahulila mbu, okholanga Kaperinaumu.’

²⁴Emuboolela toto embu, ‘Abulaho omulakusi oufuchililungwa mwihanga lia yebulwamwo tawe.’

²⁵“Nebutswa emuboolela toto mbu, abakhasi abalekhwa abanji baliho mutsinyanga tsia Eliya, olwa eshimiyu shialiho khulwemiyika chitaru neyinusu, mana inzala niyibaho ikhongo mushialo shiosi.

²⁶Ne Eliya shiyarumwakhwo khumundu undi yesi yesi mu Isiraeli ta, habula khumukhasi omulekhwa, owali niyamenya Zarefatsi mushialo shia Sidoni.

²⁷Khandi bali nibaliho abobuchele abanji abamenya mu Isiraeli, mutsinyanga tsiomulakusi Elisha, ne shialikhwoho awahonibwa obuchele ta, habula Namani womushialo shia Siria.”

²⁸Mana boosi abali musinagogi olwa bahulilakhwo amakhuwa ako, batiilwa noburuma.

²⁹Nibasinjila nibakhwesa Yesu nibamurusia mwitaala elo, nibamuyila hashikholomokho khubutenje bweshikulu shielitaala liabwe liali niliombakhwakhwo. Benya okhumusindikha mbu akwe mafumama mwibanda,

³⁰nebutswa yabirila hakari mubo natsia butsia.

³¹Mana Yesu nakholomokha niyoola Kaperinaumu, litaala lia Galilaya, ewa yechesia abandu khunyanga eya Isabato.

³²Abandu boosi nibahuka muno khukhwechesiakhwe, shichila yechesia nobunyali.

³³Ne musinagogi omwo yalimwo omundu owebishieno biali muye, ne omundu oyo nayiiba nomwoyo omukhongo naboola ari,

³⁴“Eshiokhwenyangakhwo nishiina, iwe Yesu omunazareti? Witsile hano okhukhwiira ifwe noho? Ekhumanyile, okhuba oli omurumwa omutakatifu wa Nyasaye!”

³⁵Naye Yesu nahalabila eshishieno eshio nashiboolela ari, “Holeela tsi! Khandi rula mumundu uno!” Eshishieno eshio nishikwisia omundu oyo hasi imbeli wabwe, ne nishimurulamwo nishilamusaalisiakhwo tawe.

³⁶Abandu boosi nibang'ang'aala nibareebana abeene khubeene bari, “Kano nimakhuwa shiina? Okhuba omundu uno, mubunyali nende amaani alakanga ebishieno, nabio nibirula nibitsia!”

³⁷Mana amakhuwa ka Yesu nikatswana mutsingongo etsio tsiosi.

³⁸Kho Yesu narula musinagogi, ne niyenjila munzu ya Simoni. Naye nyakhufialanyene Simoni yali nalwala omurengo, ne nibaboolela Yesu akomulwale oyo.

³⁹Yesu natsia nasinjila aha yali nakonile ne nalaka omurengo okwo mbu kumurulemwo. Omurengo nikumurulamwo ne habwene nahabwene nabuukha, nachaaka okhubakhalabanila khumeesa.

⁴⁰Khubwile eliuba nilishili okhuyeela, boosi abali nabalwale bobulwale bwahukhane babareera, naye Yesu nabarakhwo emikhonochie, nabahonia boosi pe.

⁴¹Khandi ebishieno biarula mubandu abanji nibiyiiba biri, “Iwe niwe Omwana wa Nyasaye!” Yesu nahalabila ebishieno ebio khandi nalabifuchililakhwo okhuboola ta, shichila biamanya mbu niye Kristo.

⁴²Ne olwa bwashia, Yesu yarula natsia mushitsiimi habundu aha abandu babula ne nabayo yenyene. Abandu nibachaaka okhumukhaaba, ne olwa bamunyoola nibateema okhumwikalila mbu aleshe okhutsia.

⁴³Nebutswa nababoolela ari, “Ekhoyile khandi okhuyaala Amakhuwa Amalayi kobwami bwa Nyasaye mumataala kandi, shichila niko aka Nyasaye yaruma okhukhola.”

⁴⁴Kho nayaala mutsisinagogi tsiomulukongo lwa Galilaya tsiosi.