Read wanga LUKA 5 Bible Online

LUKA 5 - wanga bible

LUKA 5

¹Inyanga yindi, olwa Yesu yali nasinjiile khuluchinga lweinyanza ya Genesareti, omukanda omukhongo kwabandu kwali nikumubotokhaane nibarechelesinjia likhuwa lia Nyasaye.

²Yesu yalola amaaro kabili nikasinjisiibwe khuluchinga lweinyanza. Ne abanaabi betsinyeni beene bali nibali khulukuku niboosinjia tsikhanda tsiabwe.

³Mana Yesu niyenjila muliaro elala khuko, eliali lia Simoni, ne namuboolela mbu, alisitiekhwo munyanza hatiiti okhurula khuluchinga. Kho Yesu niyekhala muliaro elo, ne niyechesia abemikanda abo.

⁴Ne olwa yamala okhwechesia, yaboolela Simoni ari, “Sitiakhwo eliaro elo mulusiba mana iwe nende abashio mufuubemwo tsikhanda tsienywe kho mbu, mutiile tsinyeni.”

⁵Naye Simoni namukalusia ari, “Omwami, khunyakhaane eshilo shiosi, nikhulanyoolakhwo eshindu shiosi shiosi tawe! Ne okhuba mbu oboolile orio, ndalafuuba tsikhanda mulusiba.”

⁶Ne olwa bali nibafuubile tsikhanda etsio mumaatsi, batiila tsinyeni tsinyinji nitsiba ahambi okhurandula tsikhanda etsio.

⁷Kho nibalanga abashiabwe abali muliaro lindi mbu, betse babakhoonye. Nabo nibetsa nibetsusia tsinyeni mumaaro kabwe koosi ne nikaba ahambi okhwiyinikha. .

⁸Ne olwa Simoni Petero yalolakhwo akali nikekholeeshe, yasikama imbeli wa Yesu bwangu, ne namuboolela ari, “Omwami, ndekha embe, okhuba isie endi omwonooni!”

⁹Yaboola ario shichila ye nende abashie aba yali ninabo bahuka muno, okhuba bali nibatiilile tsinyeni tsinyinji muno.

¹⁰Kata Yakobo nende Yohana abaana ba Zebedayo, abanaabanga tsinyeni halala nende Simoni, boosi bahuka muno. Mana Yesu naboolela Simoni ari, “Shiolaria ta, shichila okhuchaaka inyanga yino, olaba omunaabi wabandu.”

¹¹Ne olwa bali nibareere amaaro kabwe khuluchinga, balekha buli shindu, nibalonda khu Yesu.

¹²Olwa Yesu yali nali mwitaala lindi, omundu wobuchele bwali nibwamala omubili kwosi yetsa. Ne olwa yalola Yesu, yamwinamila namusaaya ari, “Omwami, noba nochama, onyala okhusiiya!”

¹³Mana Yesu nanyiila omukhonokwe, ne namutiilakhwo, naboola ari, “Enjamile mbu osiiyishe!” Habwene nahabwene obuchele obwo nibumurulakhwo.

¹⁴Yesu namukaania ari, “Shiolaboolelakhwo omundu yesi yesi amakhuwa kano ta, habula otsie khumwisaaliisi akhuhenjelesie obulayi; ne khulwokhumanyia abandu boosi mbu ohonibwe, ohaane eshihaanwa shia Musa yalaka.”

¹⁵Nebutswa amakhuwa ka Yesu kameeta okhutswanibwa hosi hosi, nachio emikanda chiabandu emikhongo nichikhung'ana okhumurecheresia nende okhuhonibwa obuteshele bwabwe.

¹⁶Naye narula yenyene, natsia mushitsiimi hamabiswi okhusaaya.

¹⁷Khunyanga yindi, Yesu yali niyechesinjia abandu, ne Abafarisayo bandi nende abechesia bamalako bali nibekhaaleho, abali nibarulile mubuli litaala mulukongo lwa Galilaya, mu Yudea nende mu Yerusalemu. Ne Yesu yali nobunyali okhurula khu OMWAMI Nyasaye, obwokhuhonia abalwale.

¹⁸Mana abandu bandi nibetsa nibachinjile owafwokoya oyo khushitali, nibateema okhumwinjisia munzu mwa Yesu yali kho mbu, bamure imbeliwe.

¹⁹Ne shichila mbu, abandu bali abanji, shibanyalilwa okhumwinjisia tawe. Kho nibamuyila ikulu khushilama shieinzu eyo, nibekula habundu nibamwishiliaho khushitalishie hakari kari wabandu, nibamureera imbeli wa Yesu.

²⁰Ne olwa Yesu yalola obusuubili obukhongo bwa bali ninabwo, yaboolela omulwale oyo ari, “Omwitsa wanje, olesheelwe obwonoonibwo.”

²¹Mana abechesia bamalako nende Abafarisayo abo nibachaaka okhukanakania nibaboola bari, “Nimundu shiina ounyekanga Nyasaye uno! Nyasaye yenyene niye ounyala okhuleshela abandu obwonooni!”

²²Yesu yamanya aka bali nibayililisinjia, ne nababoolela ari, “Muyililisinjia murio mbushiina?

²³Eliangu nelilena? Okhuboola mbu, ‘Olesheelwe obwonoonobwo,’ noho okhuboola mbu, ‘Buukha ochende?’

²⁴Ndalamumanyia shinga Omwana womundu ali nobunyali khushialo okhuleshela abandu obwonooni.” Kho naboolela owafwokoya oyo ari, “Ekhuboolela mbu, buukha wituushe eshitalishio mana otsie ingowo!”

²⁵Habwene nahabwene, omundu oyo yakololokha nabuukha bwangu imbeli wabwe boosi, niyetuukha eshitali eshia yali nakonilekhwo, ne natsia ingowe niyetsoominjia Nyasaye.

²⁶Boosi nibang'ang'aala! Nibatiilwa noburi, nibamwitsoomia Nyasaye nibaboola bari, “Inyanga yino khulutsi amakhuwa kokhuchenya!”

²⁷Olunyuma lwamakhuwa ako, Yesu yarulaho natsia, ne nalola omusololi wobushuru oweliira mbu, Lawi niyekhaale aha basololelanga obushuru. Yesu namuboolela ari, “Unondekhwo.”

²⁸Naye Lawi nasinjila nalekha ebindu biosi, ne namulondakhwo.

²⁹Mana Lawi nakaasilia Yesu lisabo likhongo munzumwe, ne abandi khubacheni belisabo elo, bali abomukanda omukhongo kwabasololi bobushuru nende abandu bandi.

³⁰Ne Abafarisayo bandi nende abechesia bamalako bandi abali abomukanda kwabwe nibeyiniakananila abeechi ba Yesu nibabareeba bari, “Mbushiina mulitsanga nimunywa nende abasololi bobushuru nende abonooni?”

³¹Naye Yesu nabakalusia ari, “Abandu abalamu shibakhabanga omusilishi ta, habula abalwale nibo abakhabanga omusilishi.

³²Shindayetsa okhulanga abalunjishi ta, habula ndetsa okhulanga abonooni.”

³³Abandu bandi baboolela Yesu bari, “Abeechi ba Yohana Omubatiisi nende Abafarisayo bahonganga inzala nibasaaya buli nyanga, nebutswa abeechibo balitsanga butswa nibanywa.”

³⁴Naye Yesu nabakalusia ari, “Abacheni beshiselelo shibanyala okhuhonga inzala, olwa mwene eshiselelo ashiliho ninabo tawe.

³⁵Nebutswa tsinyanga tsitsanga, olwa mwene shiselelo aliyinibwaho okhurula khubo, inyanga yaliyinibwaho eyo, nilwo olwa balihoonga inzala nibasaaya.”

³⁶Khandi Yesu nababoolela oluchelo luno ari, “Abulaho ourandulanga eshilaka okhurula khungubo imbia mbu, ashinabile khungubo ikhulu tawe. Okhuba nakhola ario, alaba naranduule ingubo imbia eyo, ne eshilaka sheingubo imbia shishinyala okhuleeng'aana neingubo ikhulu eyo tawe.

³⁷Kata shialiho outsukhanga idivai indoro mumifuko emikhulu chiamaseelo ta, okhuba idivai indoro eyo yinyala okhurulaka emifuko emikhulu echio, nichirandukha, nayo niyisasikha yosi pe.

³⁸Habula idivai indoro yikhoyile okhutsukhwa mumifuko chiamaseelo emiyia.

³⁹Kata abulaho owikombanga okhunywa idivai indoro namalile okhunywa eyilulile tawe, shichila alaboola ari, ‘Eyilulile yino niyo indayi.’ ”