Read wanga LUKA 7 Bible Online

LUKA 7 - wanga bible

LUKA 7

¹Olwa Yesu yali namalile okhuboolela abandu amakhuwa ako koosi, yatsia Kaperinaumu.

²Ebweneyo, Omusesia Omuroma yaliyo owali nomukhalabaniwe owa yali niyaheela muno. Ne omukhalabani oyo yali nalwala nali ahambi okhufwa.

³Olwa omusesia oyo yahulila yifuma ya Yesu, yaruma abakhulundu ba Abayahudi okhumusaaya mbu, yetse ahonie omukhalabaniwe oyo.

⁴Ne olwa boola ewa Yesu yali, bamusaaya muno nibaboola bari, “Omundu uno akhoyeele obukhoonyibwo,

⁵okhuba yaheela abandu befwe khandi yakhumbashila ifwe Isinagogi.”

⁶Mana Yesu natsia ninabo. Ne olwa yali nali ahambi okhuula, omusesia oyo yaruma abetsabe bandi okhumuboolela mbu, “Omwami, shiolanyakhana ta. Isie shiendi oukhoyile iwe okhwinjila munzu mwanje tawe.

⁷Kata isie omwene shiekhoyile okhwitsa khwiwe tawe. Nebutswa boolakhwo butswa likhuwa, ne omukhalabani wanje alahona.

⁸Okhuba isie, siesi endi omundu owarebwa hasi woburuchi, ne siesi endi nende abelihe abali hasi wanje. Emboolelanga mulala endi, ‘Tsia,’ ne atsia. Khandi emboolela oundi endi, ‘Yitsa,’ ne yetsa. Ne nemboolela omukhabani wanje endi, ‘Khola lino,’ naye alikhola.”

⁹Olwa Yesu yahulila amakhuwa ako yahuka muno, nashiukhana naboolela abomukanda okwali nikumulondangakhwo ari, “Emuboolela mbu, eshili okhulolakhwo omundu owobusuubili shinga buno, kata mu Isiraeli mwosi tawe.”

¹⁰Ne abali nibarumilwe abo, olwa bachelela munzu yomusesia oyo, banyoola omukhalabaniwe nahonile.

¹¹Olunyumakhwo, Yesu yatsia mwitookho elilangwa mbu, Naini. Ne abeechibe halala nende omukanda omukhongo batsia ninaye.

¹²Ne olwa yoola butswa mushilibwa shielitookho elo, abandu barulamwo nibachinjile omulambo. Omulambo okwo kwali kwomusiani omutelwa, owa nyina yali omulekhwa. Ne abandu abanji abomwitookho elo bali nibali nomukhasi oyo.

¹³Olwa Omwami yamulola yamulolela tsimbabasi, ne namuboolela ari, “Shiolekhuula ta.”

¹⁴Mana nasita ahambi natiila khwisanduku liomulambo, ne abali nibalichinjile nibasinjila. Yesu naboola ari, “Omusiani! Ekhulaka mbu, obuushe.”

¹⁵Mana omufu oyo nalamukha niyekhala, ne nachaaka okhuboola. Mana Yesu namuhaana khunyina.

¹⁶Boosi nibatiilwa noburi obunji, nibetsoomia Nyasaye nibaboola bari, “Omulakusi omukhongo yebuushile mwifwe!” Khandi bari, “Nyasaye yetsile okhuhonia abandube!”

¹⁷Ifuma eyo niyitswana mu Yudea mwosi nende mubialo birondokhaneho biosi.

¹⁸Abeechi ba Yohana nibaboolela Yohana amakhuwa ako koosi. Mana Yohana nalanga babili abokhubechibe,

¹⁹nabaruma khu Omwami mbu, bamureebe bari, “Iwe niwe omwenoyo ouletsa noho khulindilile oundi?”

²⁰Olwa Abeechi babili abo boola khu Yesu bamuboolela bari, “Yohana Omubatiisi akhurumile khwiwe mbu khukhureebe khuri, ‘Iwe niwe omweneyo ouletsa, noho khulindilile oundi?’ ”

²¹Mushise shiene eshio Yesu yahonia abandu abanji abali nobulwale nende olumbe, nende ebishieno, ne abanji abali ababofu, yabahonia nibachaaka okhulola khandi.

²²Mana nakalusia abarumwa ba Yohana abo nababoolela ari, “Kalushe muboolele Yohana akamuluutsi nende akamuhuliile mbu, ababofu banyalilungwa okhulola, abetsindieku bachendanga, abobuchele basiiyungwa, abekala amarwi bahulilanga, abafu balamusibungwa, ne abamanani bayaalilungwa Amakhuwa Amalayi.

²³Noweikhabi omundu oulalikhwo nende okhukanakania khwisie tawe!”

²⁴Olwa abarumwa ba Yohana bali nibenyooshe, Yesu yachaaka okhuboolela abemikanda khuka Yohana ari, “Nishiina eshia mwatsia mushitsiimi okhulola? Mwatsia okhulola olusi olureesibwa nomuyeka noho?

²⁵Nishiina eshia mwatsia okhulola? Mwatsia okhulola omundu owifwalile tsingubo tsiobukusi? Lole, abandu abefwalanga bario nibamenya shinga abayinda, babetsanga mutsinzu tsiabaruchi!

²⁶Kho nishiina eshia mwatsia okhulola? Mwatsia okhulola omulakusi noho? Emuboolela toto mbu, owamwatsia okhulola ashila omulakusi muno.

²⁷Okhuba Yohana niye omwenoyo owa Amahandiko kaboola mbu, Nyasaye yaboola ari, ‘Ndalaruma omurume wanje aranjilile okhutsia imbeliwo khulwokhukaasia injilayo.’

²⁸Emuboolela mbu, abulaho omundu namundu khubandu bano, ouli omukhongo okhushila Yohana tawe. Nebutswa ouli omutiiti muno Mubwami bwa Nyasaye nomukhongo muno okhushila ye.”

²⁹Olwa obandu boosi nende abasololi bobushuru bahulila amakhuwa ako, betsoomia obulunjishi bwa Nyasaye muno, ne nibo aba Yohana yali nabatiisiiye.

³⁰Habula Abafarisayo nende abechesia bamalako baloba akokhwenya khwa Nyasaye, akali nikabakhoyeele, mana nibaloba mbu Yohana shiababatiisia tawe.

³¹Mana Yesu natsiililila okhuboola ari, “Nenjelaasie abandu abolwibulo luno nende shiina? Bali shinga shiina?

³²Bali shinga abaana abekhaale mushiiro khandi abalangananga nibaboolelana bari, ‘Khumukhupiile tsinyimbo tsielilele, nimulashina ta! Khwikhuulile nimulalila amasika ta!’

³³Yohana Omubatiisi yetsa nahonga inzala, khandi nalanywakhwo idivai ta, ne nimuboola muri, ‘Ali neshishieno!’

³⁴Bulano Omwana womundu yetsile, ne nalia khandi nanywa, ne muboola muri, ‘Lolekhwo omundu uno! Nomulangu khandi nomumesi. Nomwitsa wabasololi bobushuru khandi omwitsa wabonooni!’

³⁵Kata kario obuchesi bwa Nyasaye bumanyikhanga shinga olwa buli obwatieli khu abo ababufuchililanga.”

³⁶Omufarisayo undi yalanga Yesu okhulia ninaye. Mana Yesu natsia munzuye niyekhala niyerechekha okhulia eshiokhulia.

³⁷Ne lola, omukhasi yali mwitaala elo omwonooni. Olwa yahulila mbu, Yesu yali nalitsanga munzu eya Omufarisayo oyo, yabukula amafura keshing'ari niketsuule mushimuka,

³⁸ne nasinjila emukongo wa Yesu, habilenjebie, nalilanga amasika; mana nachaaka okhunyisia ebilenje bia Yesu namasikake, nabieya neliswilie, nabitsunzuuna, ne nabitsushilila amafura keshing'ari ako.

³⁹Ne olwa Omufarisayo owali nalanjile Yesu oyo yalola ario, yaboola mumwoyokwe ari, “Omundu uno niyakhabeele mbu toto nomulakusi, yakhamanyile shinga lwomukhasi oumutiilangakhwo uno ali, okhuba omukhasi uno nomwonooni.”

⁴⁰Mana Yesu namukalusia naboola ari, “Simoni, liliho likhuwa elienzenya okhukhuboolela.” Simoni namukalusia ari, “Omwechesia, mboolela.”

⁴¹Yesu naboola ari, “Baliho abandu babili nelikofi liomundu ouhosinjia amapesa. Mulala yali nelikofi lia tsidinari ebikhumi biraano (500), naye oundi yali nelikofi elia tsidinari amakhumi karano (50).

⁴²Ne olwa bali nibakhayilwe okhurunga, yabaleshela boosi babili. Kho khubabili abo, noulena owa mwene mapesa alaheela muno okhushilakhwo oundi?”

⁴³Simoni nakalusia naboola ari, “Isie embara mbu, oyo owaleshelwa likofi likhongo.” Yesu namuboolela ari, “Oli habwene.”

⁴⁴Mana Yesu nashiukhana nahenga ewa omukhasi oyo yali, ne naboolela Simoni ari, “Ololanga omukhasi uno? Enzinjiile munzuyo, ne shiumbelesiyekhwo amaatsi kokhwosia ebilenje bianje ta, nebutswa ye yanzosiye ebilenje bianje namasikake, khandi nabieya neliswilie.

⁴⁵Shiunzinjisiiye niunzunzuuna ta, nebutswa ye ashitsiilililanga okhutsunzuuna ebilenje bianje okhurula olwa enzinjile munzu muno.

⁴⁶Shiunzushiliilekhwo amafura khurumwe kwanje ta, nebutswa ye yambashile amafura khubilenje bianje.

⁴⁷Khulweshio emuboolela mbu, alesheelwe obwonoonibwe obunji, okhuba alolesiye obuheeli obunji. Nebutswa oulesheelwe ebwonooni butiiti, alolesiye butswa obuheeli butiiti.”

⁴⁸Mana Yesu naboolela omukhasi oyo ari, “Olesheelwe obwonoonibwo.”

⁴⁹Mana aba yali ninabo khumeesa nibachaaka okhureebana abeene khu beene bari; “Uno nimundu shiina ouleshelanga kata abandu obwonooni?”

⁵⁰Naye Yesu naboolela omukhasi oyo ari, “Obusuubilibwo bukhuhoniye, tsia nomulembe.”