Read wanga LUKA 8 Bible Online

LUKA 8 - wanga bible

LUKA 8

¹Olunyumakhwo, Yesu yachenda mumatookho nende mubikwenyi nayaalanga Amakhuwa Amalayi aka Obwami bwa Nyasaye. Abechibe ekhumi nababili nabo nibatsia ninaye.

²Kata abakhasi bandi, abali nibarusibwamwo ebishieno nibahonibwa obulwale, abalangwa mbu, Mariamu (owelira mbu, Magadalene) owali nayinibwemwo ebishieno musafu,

³nende Yoana, omukhasi wa Kuza, owali omunyapara wa Herode, nende Susana, nende abandi abanji abekhoonyelanga emiandu chiabwe abeene okhukhoonya Yesu nende abeechibe.

⁴Ne lwomukanda omukhongo kwekhung'asia halala mana abandu okhurula mumataala kahukhane nibatsiililila okhwitsa khu Yesu, Yesu yababoolela muluchelo ari,

⁵“Omumiitsi weimwo yarula natsia okhumiitsa imwoye. Ne olwa yali namiitsanga, ndala yakwa khunjila niyisenachilwa hasi nabandu, mana amanyonyi kokhwikulu niketsa nikachibootsa.

⁶Eyindi yakwa khwiloba liokhulwanda ne olwa yamela, yaniala lwangu, shichila liloba liabula obunyifu obuchihela.

⁷Imwo yindi yakwa hakari mumahwa, ne amahwa ako nikakhula halala ninayo ne nikachitiiya.

⁸Nayo yimwo yindi yakwa mwiloba lilayi, niyikhula niyama ebiamo buli ndala ebihela eshikhumi.” . Kho Yesu namalilisia naboola ari, “Ouli namarwi kokhuhulila, ahulile!”

⁹Ne olwa abeechi ba Yesu bamureeba eshisina shioluchelo olwo,

¹⁰yabakalusia naboola ari, “Inywe mwahebwa obuchesi bwokhumanyilisia amabiso aka Obwami bwa Nyasaye, nebutswa abandi boosi baboolelungwa butswa mutsinjelo kho mbu, bahenjenje ne nibalalola tawe, bahulilenje ne nibalamanyilisia tawe.

¹¹“Shino nishio eshisina shioluchelo olwo. Imwo, nilio likhuwa lia Nyasaye.

¹²Eyakwa khunjila, nibo bahulilanga likhuwa, nebutswa Setani yetsa nayinia likhuwa elo mumioyo chiabwe kho mbu, baleshe okhusuubila nibahonibwa.

¹³Nayo eyakwa khulwanda, nibo abahulilanga likhuwa, nibalifuchilila nobusaangaali, nebutswa shibaralila ta, basuubila butswa khulweshise shituutu, ne olwa amateemo ketsa, bakosia obusuubili bwabwe.

¹⁴Imwo eyakwa mumahwa, nibo abahulilanga likhuwa lia Nyasaye, nebutswa okhuhenda, obuyinda nende okhuheela obulamu bweshialo, biikalila ebiamo biabwe okhwenga.

¹⁵Nayo eyakwa khwiloba lilayi, nibo abahulilanga likhuwa, nibalihandakhwo nemioyo emilayi khandi emihulili, ne nibesumilisia okhuula olwa baama ebiamo.

¹⁶“Abulaho ouhafinjia itaha mana achifunishila mushimwelo noho achira mulwalo mweshitali tawe. Habula achirenjekhanga khushichibi shiayo kho mbu, olwa abandu benjila munzu, balole obulafu bwayo.

¹⁷“Shiosi shiosi eshiebisa shiakhabisulwe, kata eshifunishilwa shiosi shiakhafunulilwe nishirebwa habulafu.

¹⁸Khulweshio, mube meeso olwa muhulila, shichila omundu yesi yesi oulikhwo nebindu, alameetwa ebindi, naye yesi yesi oubula ninabio, kata bitiiti ebiapaaranga mbu ali ninabio alanuulwa.”

¹⁹Mana nyinamwana Yesu nende abaana babwe Yesu nibetsa, nebutswa shibanyalilwa okhuula ewa Yesu yali tawe, khulwa omukanda omukhongo kwabandu.

²⁰Mana Yesu naboolelwa ari, “Mamawo nende abaana benywe basinjiile elwanyi, ne bekoombanga okhukhulola.”

²¹Naye Yesu nakalusia naboola ari, “Abo abahulilanga likhuwa lia Nyasaye ne nibalikhola, nibo mama wanje nende abaana befwe.”

²²Inyanga yindi Yesu yenjila muliaro halala nende abeechibe ne nababoolela ari, “Chenda khwambushe khutsie injelekha weinyanza.” Mana nibachaaka oluchendo okhutsia.

²³Ne olwa bali nibatsitsanga, Yesu yachaaka okhukona tsindoolo. Ne omuyeka kweimbumbuyeka nikuchaaka okhuhutsa khunyanza, nalio eliaro nilichaaka okhwitsulamwo amaatsi, mana nibaba mumatinyu.

²⁴Abeechi nibatsia nibabuusia Yesu nibamuboolela bari, “Omwami, Omwami! Khufwitsanga!” Mana Yesu nabuukha nahalabila omuyeka okwo nende amarunda kamaatsi ako, nabio nibihoonjeela, mana omulenjeelo nikubaho.

²⁵Mana Yesu nabareeba ari, “Obusuubili bwenywe buli hena?” Nabo nibaria, nibahuka, nibareebana bari, “Kho niwiina uno, ouhalabilanga butswa kata omuyeka nende amarunda kamaatsi, ne nebimuhulila?”

²⁶Yesu nende abeechibe niboola mushialo shia Gerasi, eshihengaane nende Galilaya, injelekha weinyanza.

²⁷Ne olwa Yesu yali niyakhekha khuluchinga, yabukaana nende omundu undi okhurula mwitookho, owalimwo ebishieno. Ne khulwa oluhoono olurambi omundu oyo shiyafwalangakhwo tsingubo ta, khandi shiyamenyanga munzu tawe. Nebutswa yamenyanga mubilindwa.

²⁸Olwa yalola Yesu, yalila obutinyu, nakwa mumakuluke niyayula naboola ari, “Yesu Omwana wa Nyasaye Omukhongo Muno! Wenyanga shiina khwisie? Ekhusaaya mbu nochama, olasaalisia ta!”

²⁹Yaboola ario shichila Yesu yali nalachile eshishieno eshio okhurula muye. Ne akhandi akhanji nishiamutiilanga, kata niyabohungwa amakhono nende bilenje neminyololo nende ebitiili, yakhalakanga mana yelukhasibwa nende eshishieno eshio okhutsia mushitsiimi.

³⁰Yesu namureeba ari, “Eliiralio niwe wiina?” Naye nakalusia ari, “Eliira lianje nisie Legioni,” shichila ebishieno ebinji biali nibienjila muye.

³¹Ebishieno ebio nibisaaya Yesu mbu, alabilaka okhwinjila mubuko tawe.

³²Lituuli likhongo lietsimbitsi liali ahambi aho, niliayanga khushikulu. Kho ebishieno ebio nibimusaaya mbu afuchilile binjile mutsio, mana nabifuchilila ario.

³³Ebishieno nibirula mumundu oyo mana nibinjila mutsimbitsi etsio. Lituuli lietsimbitsi elo nilikholomokha tsimbilo okhurula khulukoba nilikwa munyanza nilifwilamwo.

³⁴Olwa abaayi betsimbitsi etsio balola akali nikekholeshe, belukha, nibatswania amakhuwa ako mwitookho liosi nende mulukongo olwo.

³⁵Abandu nibarula nibatsia okhulola akali nikekholeshe, ne olwa boola ewa Yesu yali, banyoola omundu owebishieno biali nibirulilemwo niyekhaale ahambi nende Yesu nafwalile tsingubo amapaaroke nikali habwene, mana boosi nibaria.

³⁶Ne abo abali nibaluutsi amakhuwa ako, benoosia abandu shinga lwomundu owali nebishieno oyo yahonibwa.

³⁷Mana abandu boosi abeshialo shia Gerasi nibaboolela Yesu mbu arule atsie, okhuba bali noburi obunji. Kho Yesu niyenjila muliaro narulayo natsia.

³⁸Ne Omundu owebishieno biarulamwo oyo nasaaya Yesu ari, “Lekha enzie ninawe.” Nebutswa Yesu yamukaya naboola ari,

³⁹“Kalukha ingowo oboole obuloli khuka Nyasaye akhukholeele.” Mana omundu oyo narula natsia mwitookho mwosi natswania aka Yesu yali namukholeele.

⁴⁰Olwa Yesu yakalukha injelekha undi weinyanza, abandu bamwinjisia, shichila boosi bali nibamulindanga.

⁴¹Ne omundu oulangwa mbu Yairo yetsa. Yali omwimilisi omukhongo womusinagogi, ne nakwa hasi mumakulu ka Yesu namusaaya mbu yetse munzuye,

⁴²shichila omukhaanawe omutelwa, owemiyika ekhumi nachibili, yali nanyiranga. Ne olwa yali natsitsanga, abandu bamwibumbakhwo okhurula mutsimbeka tsiosi.

⁴³Ne mubo yalimwo omukhasi owali niyerulutsanga khulwa oluhoono lwemiyika ekhumi nachibili, niyamala emianduchie chiosi. Ne shiyaliho owanyalilwa okhumuhonia tawe.

⁴⁴Yetsela enamukongo wa Yesu, natiila khuluhanda lweingubo ya Yesu, ne habwena nahabwene okhwirulutsakhwe nikhuhwa.

⁴⁵Yesu nareeba mbu, “Niwiina oundililekhwo?” Buli mundu niyekaana naye Petero naboola ari, “Omwami, abandu bakhubotokhaane bakhwitisinjiakhwo.”

⁴⁶Ne Yesu naboola ari, “Omundu yandililekhwo, shichila embuliile obunyali bwanje bwokhuhonia niburulamwo.”

⁴⁷Ne lwomukhasi oyo yalola mbu shianyala okhwibisa ta, yetsa natechelanga, nakwa mumakulu ka Yesu, naboola imbeli wabandu boosi amakhuwa akali nikachilile namutiilakhwo nende shinga olwa yali nahoniibwe habwene nahabwene.

⁴⁸Yesu namuboolela ari, “Omukhaana wanje obusuubilibwo bukhuhoniye, otsie mumulembe.”

⁴⁹Olwa Yesu yali nashiboolanga amakhuwa ako, omurumwa yetsa okhurula enanzu wa Yairo naboolela Yairo ari, “Omwanawo afwile, olamunyasia omwechesia tawe.”

⁵⁰Nebutswa Yesu yakahulila, ne naboolela Yairo ari, “Shiolaria ta, suubila butswa, omwana alahona.”

⁵¹Ne olwa yenjila munzu, shiyafuchilila omundu yesi okhwinjila ninaye ta, habula Petero, Yohana, Yakobo, nende samwana omukhaana halala nende nyinamwana bonyene.

⁵²Boosi abaliho bali nibekhuulanga nibalila amasika khulwa omwana oyo. Yesu nababoolela ari, “Shimulekhuula tawe, omwana shiafwile ta, akonanga butswa tsindoolo.”

⁵³Nabo nibamutseshelela okhuba bamanya mbu afwile.

⁵⁴Mana Yesu namutiila omukhono naboola ari, “Omwana, buukha!”

⁵⁵Omwana oyo nalamukha, ne nabuukha lwangu, mana Yesu nabalaka mbu, bamuhelesie eshiokhulia alie.

⁵⁶Abebusibe nibahuka, naye Yesu nabakaania mbu, shibalaboolelakhwo omundu yesi yesi akali nikekholeeshe tawe.