Read wanga LUKA 9 Bible Online

LUKA 9 - wanga bible

LUKA 9

¹Yesu yalanga abeechi ekhumi nababili abo halala, ne nabahelesia obunyali nende amaani okhulonda ebishieno nende okhuhonia obulwale.

²Nabaruma okhuyaala aka Obwami bwa Nyasaye nende okhuhonia abalwale.

³Ne nababoolela ari, “Mulabukulekhwo eshindu shiosi shiosi khuluchendo lwenywe ta, kata indabushi, kata iloloti eyomusumi, kata eshiokhulia, kata amapesa, kata tsingubo tsindi tawe.

⁴Mana munzu yosi yosi eya mwinjisibwamwo, mumenyemwo okhuula olwa murula mwitookho elo.

⁵Ne habundu hosi hosi aha balamwinjisia ta, olwa murula mwitookho elo, mubungulule olufu olwokhubilenje bienywe shinga obusiomi khubo.”

⁶Abeechi nibarula nibabira mutsisoma, nibayaala Injiili nende okhuhonia abandu buli habundu.

⁷Olwa Herode omuruchi wa Galilaya yahulila amakhuwa koosi akali nikekholekhanga, yanyakhana mumwoyokwe, shichila abandu bandi bali nibaboolanga mbu Yohana omubatiisi alamuushe.

⁸Ne abandi baboolanga mbu, Eliya aloleeshe, nabo abandi mbu, nimulala khubalakusi bakhale alamuushe.

⁹Herode naboola ari, “Ndalaka mbu Yohana asinzwe, ne niwiina uno khandi owembulilanga amakhuwa ako khuye?” Mana nateema, nakhabilisia mbu alole Yesu.

¹⁰Abarume bakalukha nibaboolela Yesu koosi aka bali nibakholile. Mana Yesu nababukula natsia ninabo bonyene Betsisaida.

¹¹Nebutswa olwa emikanda chiabandu chiamanya, chiamulondakhwo. Yesu yabenjisia, nababoolela aka Obwami bwa Nyasaye, nahonia abali nobuha bwokhuhonibwa.

¹²Olwa eliuba liachaaka okhuyeela, abeechibe ekhumi nababili abo betsa nibamuboolela bari, “Seebula abandu batsie mumataala nende mutsisoma tsirondokhane, banyooleyo eshiokhulia nende ahokhwiyalisia, okhubela khuli mushitsiimi.”

¹³Nebutswa Yesu yababoolela ari, “Inywe abeene mubahelesie ebiokhulia”. Nabo nibamukalusia bari, “Eshiakhuli butswa ninashio, nemikaate chirano nende tsinyeni tsibili. Wenya khutsie khukulile abandu bano boosi eshiokhulia?”

¹⁴Baliho ahambi abasaatsa ebikhumila biraano (5,000). Yesu naboolela abeechibe ari, “Yikhasie abandu mumikanda chiabandu amakhumi karano karano.”

¹⁵Ne abeechi nibamalile okhukhola bario,

¹⁶Yesu yabukula emikaate chirano echio nende tsinyeni tsibili etsio, nahenga mwikulu, nakhupila Nyasaye orio, nachisonyola, nachihelesia abeechibe okhukabila abandu.

¹⁷Mana boosi nibalia ne nibekura. Kho abeechi nibatobelesia ebitonye biatong'a, nibiitsula ebimwelo ekhumi nabibili.

¹⁸Inyanga yindi Yesu yali nasaayanga yenyene, ne abeechibe nibetsa khuye. Ne nabareeba ari, “Abandu baboolanga mbu nisie wina?”

¹⁹Nibakalusia nibaboola bari, “Abandi baboolanga mbu, niwe Yohana Omubatiisi. Abandi baboolanga mbu, niwe Eliya, nabo abandi baboolanga mbu, oli mulala khubalakusi abali bakhale.”

²⁰Naye Yesu nabareeba ari, “Nenyu muboolanga mbu nisie wina?” Kho Petero nakalusia naboola ari, “Niwe Kristo wa Nyasaye.”

²¹Mana Yesu nabakaania mbu, balaboolelakhwo omundu yesi amakhuwa ako tawe.

²²Khandi nababoolela ari, “Omwana womundu okhuula anyakhane muno, alobwe nabesaaliisi abakhulundu nende abechesia bamalako, yerwe, ne olunyuma lwetsinyanga tsitaru alamusibwe.”

²³Mana naboolela abandu boosi ari, “Omundu yesi yesi niyenya okhuba omulondi wanje, okhuula yekaane omwene, mana yetuushe omusalabakwe bulinyanga niyanondakhwo.

²⁴Okhuba owenya okhuhonia obulamubwe alabukosia, ne oubukosia khulwanje, alabuhonia.

²⁵Okhuba kamukasila shiina omundu niyakhenyoolela eshialo shiosi, ne nakosia obulamu bubwe bwosi?

²⁶Omundu naba nafimbwa omurwe khulwa isie nende amechesio kanje, kho Omwana womundu naye yesi alamufimbilwa omurwe, olwa yetsa muluyalilwe nende olwa Samwana nende olwa abamalaika abatakatifu.

²⁷Emuboolela toto mbu, baliho abandi hano shibalifwa ta, okhuula olwa balinyalilwa okhulola Obwami bwa Nyasaye.”

²⁸Mana olunyuma lwetsinyanga munane naboolilenje amakhuwa ako, Yesu yabukula Petero, Yohana nende Yakobo natsia ninabo mushikulu okhusaaya.

²⁹Ne olwa yali nasaayanga, mumonimwe mwakalukhana obukondo, tsingubotsie nitsikwa tsindafu tswe.

³⁰Ne lola, abasaatsa babili bali nibaboolanga ninaye. Bali Musa nende Eliya,

³¹abalolekha muluyali nibaboolanga nende Yesu khukokhufwakhwe, okhwa yali nali hambi okhuhesia nali Yerusalemu.

³²Petero nende aba yali ninabo bali mundoolo, ne olwa basimukukha, balola Oluyali lwa Yesu nende abasaatsa babili nibasinjiile ninaye.

³³Ne olwa abasaatsa babili abo bali nibalekhananga nende Yesu, Petero yaboolela Yesu ari, “Omwami, nobulayi mbu khuli hano. Chende khumbashe amatili kataru, elala elilio, elindi elia Musa, nelindi elia Eliya,” (Shiyali namanyile eshia yali naboolanga tawe).

³⁴Olwa Petero yali nashiboolanga ario, lileesi lietsa nilibafuunikha. Mana abeechi abo nibaria muno olwa lileesi elo liabafuunikha.

³⁵Omwoyo nikurula mwileesi elo nikuboola kuri, “Uno niye Omwana wanje omuheelwa, mumuhulilenje!”

³⁶Ne lwomwoyo okwo kwamala okhuboola, Yesu yalolekha nali yenyene. Abeechi abo baholeela namakhuwa ako, shibaboolelakhwo omundu yesi yesi mutsinyanga etsio aka bali nibaluutsi tawe.

³⁷Inyanga yalondakhwo olwa Yesu nende abeechi bataru abo bali nibakholomooshe okhurula khushikulu, omukanda kwabandu omukhongo kwamubukaanila.

³⁸Omundu mulala khubomukanda abo yalanjilisia naboola ari, “Omwechesia! Ekhusaaya mbu, ohenjekhwo omwana wanje omusiani uno, okhuba nomutelwa.

³⁹Eshishieno shimutiilanga mana yayula, nishimukalakasia, okhuula olwa lifilo lirula mumunwakwe. Shimusaalisinjia muno, nishilamulekha bwangu tawe.

⁴⁰Esaayile abeechibo okhushirusia, nebutswa bakhayilwe.”

⁴¹Yesu nakalusia ari, “Inywe olwibulo olubula obusuubili khandi olumayanu luno! Noluhono shiina olwa ndalabetsanga ninenywe nemwifwilanga? Reera omwanawo hano.”

⁴²Ne lwomwana oyo yali nashiitsanga, eshishieno nishimukwisia hasi, nishimukalakasia muno. Mana Yesu nahalabila eshishieno eshio, ne nahonia omwana omusiani oyo, kho namukalusilia samwana.

⁴³Mana abandu boosi nibahuchisibwa muno khubunyali bwa Nyasaye. Abandu bali nibahukanga khu aka Yesu yali nakholanga koosi, ne naboolela abeechibe ari,

⁴⁴“Mulebilila akendi ahambi okhumuboolela ta! Omwana womundu alahaanwa mumakhono kabandu.”

⁴⁵Nebutswa abeechi shibamanyilisia eshisina shiamakhuwa ako tawe. Kabiswa khubo kho mbu, baleshe okhumayilisia, nabo nibaria okhumureeba eshisina shiamakhuwa ako.

⁴⁶Abeechi bachaaka okhuyingana abeene khu beene mbu ni wiina khubo omukhongo okhushila abandi.

⁴⁷Ne olwa Yesu yamanya aka bali nibaparanga, yabukula omwana omutiiti namusinjisia ahambi ninaye

⁴⁸ne nababoolela ari, “Omundu yesi yesi owinjisia omwana omutiiti uno muliira lianje, yanzinjisia isie. Ne ounzinjisia isie, amwinjisia oyo owaruma. Okhuba ouli omutiiti mwinywe mwesi niye omukhongo khuboosi.”

⁴⁹Yohana naboola ari, “Omwechesia khwalutsi omundu undi narusinjia ebishieno muliiralio, nikhumukaania shichila shiali womukanda kwefwe tawe.”

⁵⁰Nebutswa Yesu naboolela Yohana nabeechi bandi ari, “Mulamukaanie ta, okhuba oulamwikaana inywe ta, nowolubeka lwenywe.”

⁵¹Olwa ebise biali nibili ahambi okhuula ebia Yesu okhuyilwa mwikulu, yasumukha okhutsia Yerusalemu.

⁵²Kho naruma abarumwa imbeliwe, nibatsia nibenjila mulusoma olwa Abasamaria mbu, bamurecheshele habundu aha yeyalisia.

⁵³Nebutswa abandu abo shibafuchilila okhumwinjisia ta, shichila yali khunjila natsitsanga Yerusalemu.

⁵⁴Ne olwa abeechibe, Yakobo nende Yohana balola ako bamureeba bari, “Omwami, wenya khureebe Nyasaye arume omulilo okhurula mwikulu kubamulule?”[2]

⁵⁵Nebutswa Yesu yashiukhana nabahalabila.[3]

⁵⁶Mana Yesu nabeechibe nibatsia mulusoma lundi.

⁵⁷Olwa Yesu nabeechibe bali khunjila nibatsitsanga, omundu undi yaboolela Yesu ari, “Ndalakhulondakhwo hosi hosi aha otsia.”

⁵⁸Naye Yesu namuboolela ari, “Amabwe kali nende obwina bwako, nako amanyonyi kali nebitsu biako, nebutswa Omwana womundu abula habundu aha okhuhuluushila tawe.”

⁵⁹Mana Yesu naboolela oundi ari, “Nondakhwo.” Nebutswa omundu oyo yamuboolela ari, “Omwami, lekha enzie eyabile Papa wanje mbelio.”

⁶⁰Yesu namukalusia ari, “Lekha abafu bayabile abafu babwe abeene, nebutswa iwe, tsia oyaale aka Obwami bwa Nyasaye.”

⁶¹Ne Omundu undi naboola ari, “Omwami, ndalakhulondakhwo, nebutswa lekha enzie eseebule abeinzu yanje mbeli.”

⁶²Yesu namuboolela ari, “Yesi yesi outiilanga imbako yokhulima mana atsiililila okhuhenga inyuma, shiakwaniile Obwami bwa Nyasaye tawe.”