Read wanga OKHUKALUSHILA MUMALAKO KA MUSA 1 Bible Online

OKHUKALUSHILA MUMALAKO KA MUSA 1 - wanga bible

OKHUKALUSHILA MUMALAKO KA MUSA 1

¹Eshitabu shino shili namakhuwa aka Musa yaboolela abandu ba Isiraeli boosi olwa bali nibali elubeka lwebukwe lwomwalo kwa Yorodani mushitsiimi. Bali nibali mwibanda lia Yorodani ahambi nende Sufu, hakari welitookho lia Parani nende amatookho ka Tofeli, Labani, Hezerotsi nende Dizahabu.

²Noluchendo lwetsinyanga ekhumi na ndala okhurula khushikulu shia Sinai okhuula Kadeshibarinea nolondile khunjila yokhushikulu shia Edomu.

³Ne khunyanga yambeli yomwesi kwelikhumi nalulala mumuyika kwa makhumi kane, olunyuma lwokhurula Misiri, Musa yaboolela abandu ba Isiraeli amakhuwa koosi aka OMWAMI Nyasaye yali namulachilisiye okhubaboolela.

⁴Musa yababoolela amakhuwa kano olunyuma lwokhuhula omuruchi Sihoni owa Abamori, owarukanga eshialo shia Heshiboni, nende omuruchi Ogu owa Bashani, owarukanga eshialo shia Ashitarotsi nende Edireyi.

⁵Olwa bali nibashili injelekha womwalo kwa Yorodani mushialo shia Moabu, Musa yachaaka okhwinoosia Amalako nende amalachilisio aka OMWAMI Nyasaye naboola ari,

⁶“OMWAMI Nyasaye wefwe yakhuboolela nikhuli khushikulu shia Sinai ari, ‘Mwakhamenya khushikulu shino oluhoono luhela,

⁷Sumushe mutsiililile noluchendo lwenywe, mutsie mushialo shiebikulu shia Abamori, nende khubamenyani babwe boosi ba Araba, abomushialo shiomubikulu nende abomumabanda. Mutsie Negebu nimulonda khunjila yokhunyanza okhuula mushialo shiabandu ba Kanani, mubire ebikulu bia Lebanoni mutsie okhuula khumwalo omukhongo kwa Yufurate.

⁸Eshialo eshio shiosi eshia isie OMWAMI Nyasaye ndasuubisia okhuhelesia abakuuka benywe, Aburahamu, Isaka, Yakobo nende abolwibulo lwabwe lwosi, emuhelesiye, tsiemwo mushibukule shibe eshienywe.’ ”

⁹Musa naboolela abandu ari, “Nikhushili khushikulu shia Sinai eshio ndamuboolela mbu, ‘Sienyene bulano shinyala okhumwimilila tawe,’

¹⁰OMWAMI Nyasaye wenywe umalile okhumwinjiyia, ne bulano muli abanji shinga tsing'ining'ini tsiomwikulu.

¹¹OMWAMI Nyasaye wabakuuka benywe akhoya yamukhola okhumetekha akhandi eshikhumila okhushila shinga olwa muli bulano. Khandi akhoya yamuhelesia ikhabi shinga olwa yamusuubisia!

¹²Ne sienyene ndakhanyala endie okhwitukha obusiro bwokhuyaala nende okhukhalaka amakhuwa kenywe?

¹³Yaahule abasaatsa abachesi, abobumanyilisi khandi abamanyile amakhuwa obulayi, okhurula mubuli oluyia, nasi ndalabemekha okhuba abalindi benywe.

¹⁴Nenywe nimungalusia muri; ‘Amakhuwa koboolile namalayi khulakakhola!’

¹⁵Kho nembukula abasaatsa bobuchesi nende obumanyilisi abamwahula okhurula mubuli luyia abo nibemekha okhumulinda. Balala nibasinjilila abandu abikhumila (1,000) nabandi ebikhumi (100) abandi nibasinjilila abandu amakhumi karano, nabandi ekhumi. Khandi ndaahula abakhongo bandi okhurula mutsimbia tsienywe tsiosi.

¹⁶“Olwene olwo ndachelela Abayaasi abo nibaboolela endi, ‘Muhulilisinjie obuyingani hakari wabandu benywe, ne mukhalachenje habwene amakhuwa hakari womundu nende owashie womuluyialwe noho kata nali omurende owamenya mwinywe.

¹⁷Mulakhola ebiela olwa muba nimuyasinjia abandu ta, habula muyaasinjie abandu boosi nashilala, babe abatutu noho abakhongo. Mulariekhwo omundu yesi yesi ta, shichila obukhalachi bwenywe burulanga khu Nyasaye. Ne amakhuwa nikabaho amatinyu akamukhaya okhukhalaka mukareere khwisie, nasi ndalakakhalaka.’

¹⁸Khandi ndamuchelela olwene olwo amakhuwa kandi koosi akamukhoyile okhukhola.

¹⁹“Khwamala nikhukhola shinga olwa OMWAMI Nyasaye wefwe yali nakhubooleele, khwarula khushikulu shia Sinai nikhutsia nikhubirila mushitsiimi eshikhongo khandi eshiokhurisia eshio nikhuli khuluchendo lwokhutsia mushialo shiebikulu shia Abamori. Ne olwa khwola Kadeshibarinea,

²⁰ndamuboolela endi, ‘Mwakhoola mushialo shiebikulu shia Abamori eshia OMWAMI Nyasaye wefwe akhuhelesinjia.

²¹OMWAMI Nyasaye wabakuuka befwe, ushilekhuulile mumakhono kefwe, tsie mushibukule shinga olwa yamuboolela, mularie noho kata okhuhenda omwoyo tawe.’

²²“Mana mwesi nimuunzitsakhwo nimumboolela muri, ‘Chenda khurume abasaatsa bakhuranjilile, batsie bakhulambuulile eshialo eshio, mana bachelele bakhuboolele injila indayi yokhutikulushilakhwo khandi bakhuboolele amatookho kalimwo nakambia shiina.’

²³“Likhuwa elo liandoleshela okhuba lilayi, nembukula abasaatsa ekhumi nababili, omusaatsa mulala mulala okhurula mubuli oluyia.

²⁴Batsia mushialo shiebikulu eshio nibashilambuula okhuula mwibanda lia Eshikoli.

²⁵Babukulakhwo ebiamo bieshialo eshio nibakhureerela khandi nibakhuboolela mbu, ‘Eshialo eshia OMWAMI Nyasaye wefwe akhuhelesinjia neshilayi.’

²⁶“Nebutswa shimwayenya okhutsia mushialo eshio ta, mwakhaya okhuhulila lilako elia OMWAMI Nyasaye wenywe.

²⁷Mana nimwiyiniakana abeene khubeene nimuboola muri, ‘OMWAMI Nyasaye wakhusira, niko akachila nakhurusia mushialo shia Misiri nakhurera mushialo shia Abamori mbu bakhwire.

²⁸Shichila shiina khutsieyo? Abasaatsa bakhwarumayo bakhuriisia nibakhuboolela mbu, abandu beshialo eshio nabakhongo khandi abamaani okhukhushila khandi bakhuboolela mbu, amatookho kabwe kasirwa namasisi amarambi okhuula mumaleesi; khandi mbu balolayo emindu emirambi muno!’

²⁹“Nebutswa ndamuboolela mbu, mulahende omwoyo noho okhuria abandu abo tawe;

³⁰OMWAMI Nyasaye wenywe oumwimililanga alamulwanila abandu abo shinga olwa yamukholela Misiri

³¹nende mushitsiimi. Mwaluutsi shinga olwa yamuchinjile obulayi shinga olwa samwana achinganga omwanawe, okhuula olwa mwayolile hano.

³²Ne kata kario mwalecheresia aka ndamuboolela nimulasuubilila mu, OMWAMI Nyasaye wenywe tawe.

³³Ne niye owamwimililanga khunjila okhumukhabila habundu halayi ahamukhoma amaheema kenywe. Khulwa okhumumanyia injila yamwimililanga ne lileesi liomulilo mushilo, ne mushiteere amwimilila nelileesi lilafu.”

³⁴“OMWAMI Nyasaye yahulila amakhuwa kenywe ne natiilwa noburuma, ne niyetsuba naboola ari,

³⁵‘Abulakhwo omundu kata mulala khubandu bolwibulo olubi luno oulinjilakhwo mushialo eshilayi eshiandasuubisia okhuhelesia abakuuka benywe tawe.

³⁶Habula Kalebu omusiani wa Yefuna niye oulinjilamwo, ndalahelesia ye nabaanabe eshialo eshia yalambuula, shichila ye yambulila nomwoyokwe kwosi.’

³⁷Khandi siesi OMWAMI Nyasaye yandililwa oburuma khulwa okhubela inywe, ne niyamboolela ari, ‘Kata iwe Musa shiolinjila mushialo eshio tawe.

³⁸Habula Yoshwa omusiani wa Nuni ouli omukhonyeleliwo, ye niye oulinjilamwo, omutinyie ikholo shichila yakhemilile Abaisiraeli okhubukula eshialo eshio.’

³⁹“Mana khandi OMWAMI Nyasaye nakhuboolela fwesi ari, ‘Abaana benywe abatiiti abashili okhumanya okhwahukhasia amabi nende amalayi abamwaboola mbu, balatiilwa nabasuku benywe, balinjila mushialo eshio. Ndilibahelesia eshialo eshio, nabo nibamenyamwo.

⁴⁰Nebutswa khulwa inywe shukhane mukalushe mushitsiimi, mulonde khunjila yokhunyanza inzakhanyu.’

⁴¹“Mana nimungalusia muri, ‘Khumalile okhwonoonela OMWAMI Nyasaye, nebutswa khulatsia bulano okhuseera shinga olwa OMWAMI Nyasaye wefwe yakhulachilisia.’ Mana buli mulala khwinywe narechekha ebimanulwabie biokhulwana nimupaaranga mbu, bulaba obwangu okhuseera abandu beshialo shiomubikulu eshio.

⁴²“Nebutswa OMWAMI Nyasaye yamboolela ari, ‘Boolela abandu abo baleshe okhutsia okhuseera, shichila shindalaba elubeka wabwe ta, ne abasuku babwe balabahula.’

⁴³Ndamuboolela inywe aka OMWAMI Nyasaye yali naboolile, nebutswa mwakhaya okhuhulila lilako elia OMWAMI Nyasaye, ne mubwichinjimisi bwenywe mwenjila mushialo shiebikulu eshio.

⁴⁴Mana Abamori abamenya mushialo eshio betsa shinga tsinzushi nibamukhupa nende okhumulondachila okhuula Horima, ne nibamuhulila mushialo shiebikulu shia Edomu.

⁴⁵Kho nimukalukha nimuhabila OMWAMI Nyasaye mbu amukhoonye, nebutswa OMWAMI Nyasaye shiyahulila okhuhaba khwenywe tawe.

⁴⁶Mana nimumenya Kadeshi khulwa oluhoono olurambi.”