Read wanga OKHUKALUSHILA MUMALAKO KA MUSA 10 Bible Online

OKHUKALUSHILA MUMALAKO KA MUSA 10 - wanga bible

OKHUKALUSHILA MUMALAKO KA MUSA 10

¹“Mana OMWAMI Nyasaye niyamboolela ari; ‘Baatsa amachina kabili shinga akali kokhuranga, mana okhome lisanduku lietsimbao okaremwo, mana otikulishe yino mushikulu.

²Ne nditsa okhuhandika khumachina ako amakhuwa akali khumachina kambeli aka waaraka. Mana okabiishe mwisanduku elo!’

³“Kho nekhoma lisandu okhurula khumusaala kwomukomari; nembaatsa amachina kabili shinga akali kambeli ako, ne nendikulukha mushikulu ninako.

⁴Mana OMWAMI Nyasaye nahandika khumachina ako amakhuwa aka yali niyahandika khumachina kambeli; amalako ekhumi aka yali niyamulachilisia olwa yaboola ninenywe okhurula hakari womulilo inyanga yamwakhung'anila hashikulu. Ne niyambelesia amachina ako.

⁵Mana neshiukhana nekholomokha okhurula mushikulu, nembiikha amachina ako mwisanduku lia ndali nekhomile shinga olwa OMWAMI Nyasaye yali niyandachilisiye, ne kashilimwo kario okhurula inyanga eyo.”

⁶(Abaisiraeli basumukha okhurula khumayabo kali kabandu ba Yaakini nibatsia Mosera. Haroni nafwilayo ne nayabilwayo. Omusianiwe mbu, Eliazari nakhalabana emilimo chiobwisaaliisi mushilenjeshie.

⁷Okhurula habwene yaho, batsia Gudigoda ne okhurula Gudigoda batsia Yotibatsa eshialo shialimwo emialo eminji.

⁸Nikhuli hashikulu yaho, OMWAMI Nyasaye yaahula abandu boluyia lwa Lawi okhulinda lisanduku lieindakano nende okhukhalabana emilimo chiobwisaaliisi, khandi nende okhurumbulanga tsikhabitsie okhubirira muliiralie. Chino nichio emilimo chiabwe okhuula olwa leelo.

⁹Niko akachila oluyia lwa Lawi nilulakabilwakhwo omukunda shinga tsimbia tsindi tawe. Eshiabakabilwa kwali omukabo kwokhuba abesaaliisi aba OMWAMI Nyasaye shinga olwa OMWAMI Nyasaye wenywe yasuubia.)

¹⁰“Ndamenya khushikulu eshio tsinyanga amakhumi kane eshilo neshiteere shinga olwali lwambeli. OMWAMI Nyasaye yahulila amakhuwa kanje khandi, ne nafuchilila mbu shialamusaasia tawe.

¹¹Mana OMWAMI Nyasaye niyamboolela ari, ‘tsia wimilile abandu, benjile nende okhubukula eshialo eshiandasuubisia okhuhelesia abakuuka babwe.’

¹²“Bulano inywe abandu ba Isiraeli, hulile aka OMWAMI Nyasaye wenywe yenyanga mbu mukhole, muhelesinjie OMWAMI Nyasaye oluyali nimukhola akalachilisinjia mumalakoke. Mumuheelenje nimumukhalabanila nomwoyo kwosi.

¹³Khandi mulindenje amalako nende amalachilisioke aka emulachilisinjia inyanga yino, kho mube nobulamu obulayi.

¹⁴Likulu nelia OMWAMI Nyasaye kata likulu elili ikulu muno nelilie, khandi eshialo nende ebindu biosi ebilimwo nebia OMWAMI Nyasaye wenywe.

¹⁵Nebutswa obuheeli obwa OMWAMI Nyasaye khubakuuka benywe bwali obunji kho niyaahula inywe mushilenje shiabandu bandi, ne mushili abandube abaahule okhuula olwa leelo.

¹⁶Khulweshio okhurula bulano murusie mumioyo chienywe amapaaro amabi koosi mana muleshe okhuba abakhayi.

¹⁷OMWAMI Nyasaye wenywe niye Nyasaye wabanyasaye khandi Nyasaye wabaami boosi. Niye Nyasaye omukhongo khandi owamukhoyile okhuhulila, shiakholanga ebiela kata okhufuchilila eshiomufuusi tawe.

¹⁸Akholelanga ababisandu nende abakhasi abalekhwa obukhalachi bwahabwene. Aheelanga abarende abamenya nabandu befwe, abahelesinjia ebiokhulia khandi abafwalanga.

¹⁹Mwesi khandi muheelenje abarende abo, shichila mwesi mwali abarende mushialo shia Misiri.

²⁰Muhelesinjie OMWAMI Nyasaye wenywe oluyali nimumwinamila ye yenyene. Mube abasuubilwa khuye, ne mwitsubenje okhubirira muliiralie lionyene.

²¹Mumwitsoomie shichila niye Nyasaye wenywe, khandi mwalola netsimoni tsienywe abeene, ebikhole ebikhongo khandi ebiamakana ebia yamukholela.

²²Olwa abakuuka benywe batsia Misiri bali butswa abandu amakhumi musafu. Nebutswa, bulano OMWAMI Nyasaye wenywe yamwinjiyiyie, muli abanji shinga tsing'ining'ini tsiomwikulu.