Read wanga OKHUKALUSHILA MUMALAKO KA MUSA 11 Bible Online

OKHUKALUSHILA MUMALAKO KA MUSA 11 - wanga bible

OKHUKALUSHILA MUMALAKO KA MUSA 11

¹“Muheelenje OMWAMI Nyasaye wenywe buli lwosi, nimulinda amalakoke.

²Mwitsulile inyanga yino koosi akamwechile khu OMWAMI Nyasaye. Shichila shibali abaana benywe abalola ebikhole bino ta, habula inywe abeene. Mwalola obukhongo obwa OMWAMI Nyasaye, amaanike nende obunyalibwe obukhongo.

³Mwalola ebikholebie biamakana ebia yakholela omuruchi wa Misiri nende abandu beshialoshie boosi.

⁴Mwalola shinga olwa OMWAMI Nyasaye yamulula abelihe elia Abamisiri, netsifarasi tsiabwe, namakari kabwe koosi khulwa okhuyembia amaatsi keinyanza inzakhanyu, olwa bali nibamulondachililanga. Khandi shinga olwa OMWAMI Nyasaye yabasasia okhuula olwa leelo.

⁵Mumanyile aka OMWAMI Nyasaye yamukholela mushitsiimi nimushili okhuula hano.

⁶Mwitsulile aka yakhola khu Datsani nende Abiramu, abasiani ba Eliabu woluyia lwa Rubeni. Abaisiraeli boosi nibalolanga eshialo shiasama nishibamila halala nabetsinzu tsiabwe, namaheema kabwe, nabakhalabani babwe nende buli shindu eshiali mwoyo eshialonda tsinjila tsiabwe mu Isiraeli.

⁷Mwalola netsimoni tsienywe ebikhole ebikhongo bino ebia OMWAMI Nyasaye yakhola.

⁸“Bulano mulinde amalako koosi akemulachilisinjia inyanga yino; kho mube namaani, nimwambukha omwalo kwa Yorodani khandi nimwinjila mushialo eshiamuli ahambi okhubukula.

⁹Kho mumenye tsinyanga tsinyinji mushialo eshinulu khandi eshilayi eshia OMWAMI Nyasaye yetsuba okhuhelesia abakuuka benywe nende abolwibulo lwabwe.

¹⁰Eshialo shiamutsitsanga okhubukula shishili shinga eshialo shia Misiri ewamwarula tawe. Ebweneyo buli olwa mwarakanga imwo, mwakholanga emilimo namani kho mutsushilila emikunda chienywe amaatsi.

¹¹Nebutswa eshialo shiamutsitsanga okhubukula neshialo shiebikulu, namabanda, eshinyoolanga amaatsi keifula okhurula mwikulu.

¹²Neshialo eshilindungwa nende OMWAMI Nyasaye wenywe, khandi tsimonitsie tsishihengangakhwo okhurula khuchaaka khwomuyika okhuula khukhuhwa khwako.

¹³“Khulweshio mulonde amalako akemulachilisiye inyanga yino, muheele OMWAMI Nyasaye wenywe nimumukhalabanila nomwoyo kwosi.

¹⁴Nimukhola ako alamukwisilia ifula mumikunda chienywe olwa muba nimuchienya eyeirotso nende eyeshiubwe, kho mube nende imele, idivai nende amafura.

¹⁵Khandi alamurachila obunyasi mumikunda chienywe khulwetsing'ombe tsienywe. Nenyu mulaba nende ebiokhulia biamwenya biosi.

¹⁶Mube meeso muleshe okhukatilisibwa okhwinamila nende okhukhalabanila abanyasaye bandi tawe. Mulashiukhana okhurula khu OMWAMI Nyasaye wenywe tawe.

¹⁷Nimukhola murio, OMWAMI Nyasaye alamutililwa oburuma, ne shiamukwisilia ifula tawe. Emikunda chienywe nachio chitsia okhuuma, mana ebiraache bienywe bifwe. Ne kata eshialo shiamutsitsangamwo nishili eshilayi, muba mulafwa bwangu.

¹⁸“Mwitsulile amalako akemulachilisinja kano, mana mukabiishe mumioyo chienywe. Mukabohe khumikhono chienywe nende khubweni bwenywe, kabe eshilolelo eshiokhumwitsusinjia.

¹⁹Mana mukechesie abaana benywe, ne muboolenje khu akatsana ako olwa muba nimuli hango, nimuchendanga khunjila, nimuhuluukhanga nende nimukholanga emilimo.

²⁰Khandi mukahandiche khumiliango chietsinzu tsienywe nende khubiliibwa bienywe.

²¹Kho mana inywe nabaana benywe mulimenya tsinyanga tsinyinji mushialo eshia OMWAMI Nyasaye wenywe yetsuba okhuhelesia abakuuka benywe. Mulamenyamwo khulwa oluhoono lwelikuli lishili ikulu weshialo.

²²“Mulonde obulayi amalako kemulachilisinjia kano mbu; muheele OMWAMI Nyasaye wenywe, mukholenje buli shiashindu shiamulachilisia, ne mube abesiikwa khuye.

²³Nimuba nimukhola kano koosi, naye alamurusilia amahanga kali imbeli wenywe koosi, khandi alachila mubukule eshialo shiamahanga amakhongo khandi akamaani okhumushila.

²⁴Buli eshialo shiebilenje bienywe bisenakhwo, shilabetsanga eshienywe. Ne lihanga lienywe lilarula emulambo khushitsiimi okhuula emasaba khulwakho lwebikulu bia Lebanoni. Ne ebukwe lilarula khumwalo kwa Yufurate okhuula mumbo khunyanza ya Mediterenia.

²⁵Abulaho omundu oulasinjila okhumulwana tawe. OMWAMI Nyasaye wenywe, alara oburi mubandu beshialo shiosi shiosi eshiamwinjilamwo, nabo balamuria shinga olwa OMWAMI Nyasaye yamusuubisia.

²⁶“Lole! Inyanga yino eretsanga imbeli wenywe amakhuwa kabili, ikhabi nende eshilaamo.

²⁷Nimuba nimulonda amalako aka OMWAMI Nyasaye wenywe akemuhelesinjia inyanga yino, mulanyoola ikhabi.

²⁸Ne nimuba nimulalonda amalakoke ta, nimushiukhana okhurula khu akemulachilisinjia inyanga yino, khandi nimwinamila abanyasaye bamulamanyile ta, mulanyoola eshilaamo shiobubi.

²⁹Ne olwa OMWAMI Nyasaye wenywe amwinjisia mushialo shiamutsitsanga okhubukula, murumbule tsikhabi etsio nimuli khushikulu shia Gerizimu, nashio eshilaamo shiobubi eshio, mushirumbule nimuli khushikulu shia Ebali.

³⁰Ebikulu bibili bino bili elubeka lwomumbo womwalo kwa Yorodani, mwihanga lia Abakanani abamenya mwibanda lia Yorodani. Bili ahambi nende litookho lia Giligali elihengane nemisaala emiruba chia More.

³¹Muli ahambi okhwambukha omwalo kwa Yorodani nimwinjila okhubukula eshialo eshia OMWAMI Nyasaye wenywe amuhelesinjia okhumenyamwo. Olwa muba nimwinjiilemwo,

³²murekhwo omwoyo okhutiila nende okhulonda amalako nende amalachilisio aka OMWAMI Nyasaye akemulachilisinjia inyanga yino.