Read wanga OKHUKALUSHILA MUMALAKO KA MUSA 12 Bible Online

OKHUKALUSHILA MUMALAKO KA MUSA 12 - wanga bible

OKHUKALUSHILA MUMALAKO KA MUSA 12

¹“Kano niko amalako nende amalachilisio aka mukhoyile okhukhola mushialo eshia OMWAMI Nyasaye wabakuuka benywe amuhelesinjia okhumenyamwo tsinyanga tsiobulamu bwenywe khushialo, mukahulile.

²Olwa mwinjila mushialo eshia OMWAMI Nyasaye amuhelesinjia, musasie buli habundu aha abandu bamahanga benamilanga abanyasaye babwe; nibio ebikulu, amachina nende hasi wemisaala.

³Mulikulule ebimalilo biemisango biabwe, nimutonya mubipande tsisiilo tsiabwe tsiamachina. Musambe ebifwanani biabwe ebia omunyasaye wabwe mbu Ashera, khandi muremache ebifwanani biabanyasaye babwe biosi, kho baleshe khandi okhwinamilwakhwo habundu yaho.

⁴“Shimulenamilakhwo OMWAMI Nyasaye wenywe shinga olwa abandu abo benamilanga abanyasaye babwe tawe.

⁵OMWAMI Nyasaye wenywe alamwahulila habundu mwihanga lia aboluyia lwenywe, aha mulamwinamilangaho.

⁶Habwene yaho niho ahamwitsa okhukholelanga emisango chienywe emisambe nende echindi chiosi. Muhanilenjeho ebitonye bienywe bielikhumi nende ebihanwa biamwasuubia OMWAMI. Ebiamuhaana abeene mukhuchama, ebihanwa ebia ebikulanda betsing'ombe tsienywe nende ebia amakondi kenywe.

⁷Habwene yaho niho aha inywe nende abetsinzu tsienywe mutsia okhulia nimwikhoya khulwa emilimo chienywe, shichila OMWAMI Nyasaye wenywe yamuhelesia tsikhabi.

⁸“Shimulakholakhwo amakhuwa aka mwakholilenje okhuula hano tawe; mbu buli mundu okhukhola aka omwene alola mbu namalayi,

⁹okhuba mushili okhuula mushialo eshia OMWAMI Nyasaye wenywe amuhelesinjia mbu mumenyamwo nomulembe.

¹⁰Olwa mwambukha omwalo kwa Yorodani, OMWAMI Nyasaye alamunyalila okhubukula eshialo shiamuhelesinjia okhurula khubasuku benywe, nenywe mulamenyamwo nomulembe.

¹¹OMWAMI Nyasaye alamwahulila habundu ahahule ahokhumwinamila; ne habwene yaho mulareeraho ebindu biemulachilisiye biosi, nibio emisango chiokhusambwa, nende emisango chindi chiosi, ebitonye bienywe bielikhumi, nende ebihaanwa bindi biosi ebia mwetsuba okhuhana khu OMWAMI Nyasaye.

¹²Mana inywe nende abaana benywe abasiani nabakhana, nabakholi benywe abeshisaatsa nende abeshikhasi mulikhoya nimutsaatsahala imbeli ewa OMWAMI Nyasaye wenywe. Mwikhoye halala nende Omulawi ouba niyamwenya mwinywe shichila shibalaba nomukabo kwabwe abeene tawe.

¹³Muletsukhana nimukholelakhwo emisango chienywe chiokhusamba habundu hosi hosi aha mwenya tawe,

¹⁴Habula mulakholelalanga emisango chienywe chiokhusamba nende koosi akemulachilisiye habundu aha OMWAMI Nyasaye wenywe atsia okhumwahulila muluyia lulala mwihanga lienywe.

¹⁵“Nebutswa muli abalekhule okhwira nende okhulia inyama yemiruko chienywe hosi hosi ahamwenyile. Munyala okhulia inyama yatsio shinga olwa OMWAMI Nyasaye amuhelesia. Mwesi, abasiiye nende abalali abasiiye ta, munyala okhulia inyama eyo, shinga olwa mwakhalia inyama yeshitsusu noho eyeimbongo.

¹⁶Habula mulaliekhwo amalasile katsio shinga eshiokhulia tawe, mukatasinjie hasi shinga amaatsi.

¹⁷Ebindu biokhuhanila OMWAMI Nyasaye wenywe, nibio ebiamulakhoyele okhulia hango tawe, nibio; eshitonye shielikhumi shieimele, eshieidivai nende ebikulanda bietsing'ombe namakondi kenywe. Khandi mulahanile hango ebihanwa bienywe ebiamuhana khulwa okhuchama nende ebihanwa bindi biosi biosi tawe.

¹⁸Inywe nende abaana benywe abasiani nabakhana, nabakholi benywe beshisaatsa nende abeshikhasi halala nende Omulawi owamenya hakari mwinywe okhuula mulile abindu bino habundu aha OMWAMI Nyasaye amwahulila okhumwinamilaho. Ne mulatsaatsahala nimwikhoya imbeli ewa OMWAMI Nyasaye wenywe mubuli shindu shiamukhola.

¹⁹Ne mumanye mbu, khulwa oluhoono olwa mumenya mushialo eshio, mulebililakhwo Abalawi tawe.

²⁰“Olwa OMWAMI Nyasaye wenywe akhola lihanga lienywe okhuba likhongo shinga olwa yamusubisia, munyala okhulia inyama shinga olwa mwenya.

²¹Nikaba mbu, habundu aha OMWAMI Nyasaye amwahulila mbu mumwinamilenjeho halaba ehale okhurula khwinywe, kho munyala okhwirakhwo ndala khutsing'ombe tsienywe noho amakondi aka OMWAMI Nyasaye amuhelesia, mana mulile aha muba nimumenyile shinga olwa OMWAMI Nyasaye wenywe yamulachilisia.

²²Omundu yesi omusiiye noho oulali omusiiye ta, anyala okhulia khuinyama eyo shinga olwa yakhalia inyama yeshitsusu noho imbongo.

²³Habula mulalie inyama eyo niyishili namatsayi tawe, shichila obulamu buli mumatsayi, ne shimukhoyile okhulia inyama niyishilimwo obulamu tawe.

²⁴Shimulekhoonyela amatsayi shinga eshiokhulia tawe, nebutswa mukatasinjie hasi shinga amaatsi.

²⁵Shimulakhaliekhwo inyama eyo niyishili namatsayi tawe, kho amakhuwa kenywe nende akabolwibulo olwitsa inyuma wenywe kabetsenje amalayi khandi akokhuchamisia OMWAMI Nyasaye.

²⁶Habula ebindu bienywe ebitakatifu nende ebihaanwa bienywe mubihanilenje habundu aha OMWAMI Nyasaye amwahulila.

²⁷Muhanilenjeho emisango chienywe chiokhusamba, inyama nende amalasile, mubihaane khushimalilo shiemisango eshia OMWAMI Nyasaye. Amalasile katsio okhuula mukatatsinjie khushimalilo shiemisango eshio, nebutswa inyama yatsio munyala okhulia.

²⁸Mulinde amalako kemulachilisinjia kano koosi, kho amakhuwa kenywe nende akabetsinzibulo tsienywe kabetsenje amalayi buli lwosi, khandi akamwitsa okhukhola kalachamisinjia OMWAMI Nyasaye wenywe.

²⁹“Olwa OMWAMI Nyasaye wenywe asasia amahanga kali imbeli wenywe, mulenjila mushialo eshio nimumenyamwo.

³⁰Olunyuma olwa OMWAMI Nyasaye okhumusasilia amahanga ako, muletsukhana mwalonda emilukha chiabwe echiokhwinamila ebifwanani tawe, kata shimulateemekhwo okhukhabilisia shinga olwa benamilanga abanyasaye babwe kho mbu, mwesi mubenamile tawe.

³¹Shimulenamilekhwo OMWAMI Nyasaye wenywe munjila eya benamilangamwo abanyasaye babwe ta, shichila mukhwinamila abanyasaye babwe bakholanga buli shiashindu shieshisinyo eshiokhusinyisia OMWAMI Nyasaye. Bahananga kata abaana babwe okhusambwa khubimalilo biemisango khulwa abanyasaye babwe. Inywe mulakholelekhwo OMWAMI Nyasaye wenywe murio tawe.

³²“Mukhole buli shindu shiemulachilisiye, ne shimulameetekhwo eshindi noho kata okhulemiakhwo shilala tawe.