Read wanga OKHUKALUSHILA MUMALAKO KA MUSA 13 Bible Online

OKHUKALUSHILA MUMALAKO KA MUSA 13 - wanga bible

OKHUKALUSHILA MUMALAKO KA MUSA 13

¹“Inyanga yindi omulakusi wobubeeyi noho owokhukalula amalooro anyala okhumusuubisia eshikhole shiamakana,

²kho mbu mwinamile abanyasaye bandi abamushili okhwinamilakhwo. Kata eshikhole eshio nishiba eshiatoto,

³mulalonde amakhuwake tawe. OMWAMI Nyasaye wenywe alaba namuteemanga inywe okhubirira mumulakusi noho oukalula amalooro oyo. OMWAMI Nyasaye alaba niyenyanga okhumanya nikakhaba mbu, mwamuheela nomwoyo kwosi noho tawe.

⁴Muhulilenje OMWAMI Nyasaye nimuhelesia oluyali, mutiile amalakoke mana mukalonde. Khandi mumukhalabanilenje nimusuubilila muye.

⁵Nebutswa omulakusi wobubeeyi oyo noho omukaluli wamalooro oyo okhuula yeerwe shichila amwechesinjia okhukhaya okhuhulila OMWAMI Nyasaye wenywe, owamurusia Misiri ewa mwali ababohe. Omundu ario nomubi shichila yenyanga okhumwimilila okhulekha okhumenya shinga olwa OMWAMI Nyasaye wenywe yenyanga mumenye. Kho okhuula murusie omundu omubi oyo hakari wenywe.

⁶“Kata nabaho omusiani wenywe noho omwanawo omusiani noho omukhaana, noho omukhasi owawaheela noho omwitsawo owawachama muno, nakhuhombelesia mumasilisi mbu, winamila abanyasaye bandi aba abakuukabo baleyenamilakhwo ta,

⁷abanyasaye babandu bandi abamenya ahambi ninenywe noho kata abanyasaye babandu bamenya ehale ninenywe,

⁸mulafuchililekhwo amakhuwa nende obubeeyi bwomundu shinga oyo tawe. Kata omundu ario mulamubeelelelakhwo noho okhumulolela tsimbabasi tawe.

⁹Mwire omundu oyo khandi iwe mwene obe owambeli okhumulasa namachina, kho abandu bandi boosi balondekhwo.

¹⁰Mulase omundu oyo namachina afwe shichila yenyanga okhumurusia khu OMWAMI Nyasaye wenywe, owamurusia Misiri ewamwali ababohe.

¹¹Mana abandu ba Isiraeli boosi balahulila akalaba nikekholeshe, ne nibaria, ne omundu undi shialikholakhwo eshindu eshibi shinga eshio mwinywe khandi tawe.

¹²“Olwa muba nimumenyile mumatookho aka OMWAMI Nyasaye wenywe amuhelesia, munyala okhuhulila mbu,

¹³abandi khubandu balakhoyele ta, belihanga lienywe bayemilila abandu bamatookho kabwe okhwinamila abanyasaye bandi abamulamanyakhwo okhurula khale ta.

¹⁴Nimuhulila likhuwa shinga elo, mureebelesie nende okhurunilisia obulayi okhumanya likhuwa elo niliba nilili eliobwatieli noho eliobubeeyi, nimunyoola mbu neliobwatieli,

¹⁵mwire abandu belitookho elo boosi, netsing'ombe tsiabwe tsiosi, mubamulule boosi pe nolukanga.

¹⁶Mubunjelesie emiandu chiabandu abo chiosi, mana muchibunjishe halala mulwanyi lwabwe, ne musambe litookho elo neshituli shiemiandu echio chiosi shinga omusango musambe kuhaanilwe khu OMWAMI Nyasaye wenywe. Eshituli eshio shisikaleho emiyika chiosi, ne litookho elo lilombakhwakhwo khandi tawe.

¹⁷Ne ebindu biomusilo biosi bilanyoolekhakhwo mutsinzu tsienywe tawe. Lino lilachila OMWAMI Nyasaye aleshe okhutilwa noburuma obululu khwinywe ta, habula amulolele eshisa. Alamubelela ne alamwinjiyia nimumeetekha shinga olwa yasuubia abakuuka benywe.

¹⁸OMWAMI Nyasaye wenywe alamukholela kano nimuba nimumuhulila nende okhutiila amalakoke koosi akemulachilisinjia inyanga yino nende okhukhola akayenyanga.