Read wanga OKHUKALUSHILA MUMALAKO KA MUSA 14 Bible Online

OKHUKALUSHILA MUMALAKO KA MUSA 14 - wanga bible

OKHUKALUSHILA MUMALAKO KA MUSA 14

¹“Muli abandu aba OMWAMI Nyasaye. Kho olwa abandu benywe bafwa mulatuma emirwe chienywe noho okhubeka liswi lienywe tawe.

²Muli abandu abatakatifu aba OMWAMI Nyasaye wenywe. Ne OMWAMI Nyasaye yamwahula okhurula mutsimbia tsiabandu boosi okhuba abandube bolukoosi.

³“Mulaliekhwo eshindu shiosi shiosi eshiomusilo tawe.

⁴Tsisolo tsiamunyala okhuliakhwo nzietsino mbu; ing'ombe, likondi, imbusi,

⁵imbongo, eshitsusu, ikongoni, ipuri imbusi nabulimo, ikhulo nende likondi linabulimo.[1]

⁶Munyala okhulia isolo yoluhakayo lwayo lweshilenje lwakabukhana khandi eyinyanyanga ikaamuula.

⁷Habula mu etsinyanyanga ikaamula noho etsili noluhakayo lweshilenje lwakabukhana; mulalitsenje ingamia, eshituyu nende licheneli tawe. Tsino netsiomusilo khwinywe, shichila tsinyanyanga ikaamuula nebutswa shitsiakabukhana oluhakayo lwebilenje tawe.

⁸Mulalitsenje ingurwe ta, shichila kata oluhakayo lwayo lweshilenje nilwakabukhana shiyinyanyanga ikaamula tawe; khulweshio neyomusilo khwinywe. Mulaliekhwo noho kata okhutiila khuinyama yetsisolo tsino nitsifwile tawe.

⁹“Khutsinyeni munyala okhulia etsili neshibeye nende amakhambaya.[2]

¹⁰Habula eshindu shiosi eshiamenya mumaatsi nebutswa eshibula eshibeye nende amakhambaya shimulaliekhwo ta, shichila neshiomusilo khwinywe.

¹¹“Mulitsenje amanyonyi amasiiyikhu koosi;

¹²Habula akalondakhwo kano mulalitsenje tawe mbu, indutsu, ingosia, nende lihuutselo.

¹³Eshikhupi, nolukakha shinga olwa tsimbia tsialwo tsili.

¹⁴Likhokho nende tsimbia tsialio shinga olwa tsili.

¹⁵Nende lihuto, imbukambuka, inyanje, nende lihungu netsimbia tsialio shinga olwa tsili.

¹⁶Nende likhuule, liyichichi, neifutibili;

¹⁷neimarwi, ingosia, namulobi;

¹⁸likuyi, linakha, khumbia tsiabio shinga olwa tsili, lihutihuti nende linyinya.

¹⁹“Ebindu biosi ebiselaselanga khwiloba nebiomusilo khwinywe, mulabiliekhwo tawe.

²⁰Nebutswa ebisiikhu biosi mu ebiselaselanga, munyala akhulia.

²¹“Mulaliekhwo eshindu shiosi shiosi eshifwa butswa eshiene tawe. Munyala okhuhelesia abarende abamenya mumataala kenywe balie, noho munyala okhukusilia abarende bandi; okhuba inywe muli abandu abatakatifu aba OMWAMI Nyasaye wenywe. Mulateekhakhwo eshimeme mumabeele kanyina tawe.

²²“Muhanenje eshitonye shielikhumi khubirakwa bienywe biomukunda buli khumuyika.

²³Mutsitsenje habundu aha OMWAMI Nyasaye wenywe amwahulila okhumwinamilaho, ne habwene yaho mulalilangaho eshitonye shienywe shielikhumi shieimele, idivai, nende amafura komiseituni; halala nende ebikulanda biamakondi netsing'ombe tsienywe. Mukholenje kano kho mweche okhuhelesia OMWAMI Nyasaye wenywe oluyali buli lwosi.

²⁴Nikali mbu, habundu aha OMWAMI Nyasaye wenywe amwahulila okhumwinamilaho halaba ehale okhurula aha mumenyile, ne shimunyala okhuyilaho eshitonye shienywe shielikhumi ta, kho mukhole murinanwa;

²⁵Okusie amapesa mana ochinje amapesa ako okayile habundu hokhwinamila OMWAMI Nyasaye wenywe yaho.

²⁶Mana wikhonyele amapesa ako okhukula shiosi shiosi eshiomwoyokwo kwenya; niyiba inyama yeing'ombe, noho yelikondi; idivai noho amalwa shiosi shiosi eshioba niwikombanga okhulia. Mana mulileho imbeli ewa OMWAMI Nyasaye wenywe, mwikhoye nimutsaatsahala nende abomunzu mwenywe boosi.

²⁷Ne mulebilila Abalawi bamenya mumatookho kenywe ta, shichila babulakhwo omukabo kwabwe abeene tawe.

²⁸Olunyuma lwemiyika chitaru mureere ebitonye bienywe bielikhumi biebirakwa bienywe, mana mubishe mumatookho kenywe.

²⁹Ne Abalawi shichila babula omukabo kwabo abeene, nende abarende, ababisandu nende abakhasi abalekhwa abamenya mumatookho kenywe balitsenje khubienebino. Mukholenje murio, ne OMWAMI Nyasaye wenywe alamuhelesia tsikhabi mumilimo chienywe chiosi.”