Read wanga OKHUKALUSHILA MUMALAKO KA MUSA 15 Bible Online

OKHUKALUSHILA MUMALAKO KA MUSA 15 - wanga bible

OKHUKALUSHILA MUMALAKO KA MUSA 15

¹“Buli olunyuma lwemiyika musafu okhuula murusieho amakofi akabandu behola khwinywe.

²Ne mulakarusinjiaho munjila yino: Buli omundu owahosia omuisiraeli washie amapesa arusieho likofi elo; alamubanza omuisiraeli washie ta, shichila OMWAMI Nyasaye omwene wamala okhurusiaho likofi elo.

³Munyala okhubanza abarende benywe, nebutswa eshiamwahosia Abaisiraeli bashienywe, mulababanze tawe.

⁴“OMWAMI Nyasaye wenywe alamuhelesia tsikhabi mushialo shiamuhelesinjia okhuba eshienywe, kata mulala khwinywe shialabakhwo omumanani tawe.

⁵Kano kalaba kario nimuba nimuhulila OMWAMI Nyasaye nende okhutiila obulayi koosi akemulachilisinjia inyanga yino.

⁶OMWAMI Nyasaye wenywe alamuhelesia tsikhabi shinga olwa yamusubisia. Mulahosinjia amapesa khumahanga amanji, nebutswa inywe abeene shimuleholakhwo khubo ta; khandi mularukanga amahanga amanji nebutswa nako shikalimurukakhwo tawe.

⁷“Nikaba mbu mushialo eshia OMWAMI Nyasaye wenywe amuhelesinjia okhuba eshienywe mulala khwinywe naba omumanani, mumatookho kenywe, shimulaba abemani nimulekha okhumuhosia tawe.

⁸Habula mube abahani mana mumuhosie eshiaba natamba

⁹Shimulaloba okhumuhosia shichila mbu omuyika kwomusafu kwokhurusiaho amakofi kuli ahambi tawe. Shimulakhabekhwo namapaaro amabi kario ta. Noba nolekha okhumukhoonya, omutakha oyo alahabila OMWAMI Nyasaye, nawe olaba neshionoono imbeli ewa OMWAMI Nyasaye.

¹⁰Mumuhelesinjhie nomwoyo omulekhuule, ne mulasinyikhanga olwa mukhoonya abamanani ta, shichila khulwa likhuwa liene lino OMWAMI Nyasaye wenywe alamuhelesinjia tsikhabi mumilimo chienywe chiosi nende mubuli shindu shiamukhola.

¹¹Buli lwosi abamanani balabetsangaho mushialo shienywe, khulweshio emulachilisiambu, mukhonyenje Abaisiraeli bashienywe abamanani.

¹²“Omuisiraeli washio weshisaatsa noho weshikhasi omwene niyekusia khwiwe alakhukhalabanila khulwemiyika chisasaba, ne khumuyika kwomusafu olamulekhula akhurulekhwo.

¹³Ne lwoba nomulekhula, olamulekha watsia amakhono amakhaya tawe.

¹⁴Omuhelesiekhwo nomwoyo omulekhuule khu ebia OMWAMI Nyasayewo yakhuhelesia; amakondi, imele, nende idivai.

¹⁵Mwitsulile mbu, mwali abasumba mushialo shia Misiri nebutswa OMWAMI Nyasaye wenywe yamununula okhurulayo, niko akachila nakhulachilisia likhuwa lino inyanga yino.

¹⁶“Nebutswa omusumbawo naba nakhuboolela ari, ‘Shindenya okhukhurulakhwo ta,’ shichila yakhuheela khandi amenyanga obulayi nende abomunzuyo,

¹⁷kho omubukule omuyile hamuliango kweinzuyo, ne habwene yaho, ofutule eshirwishie, naye alaba omusumbawo mubulamubwe bwosi. Kata abasumbabo beshikhasi boosi obakholele orio.

¹⁸Shiolabuuluula lwolekhuula omusumbawo nakhurulakhwo ta, shichila alaba niyakhukholele emilimo khulwemiyika chisasaba echihela omurungo kwomundu womushara eshikhabili. Mukhole kano, ne OMWAMI Nyasaye wenywe alamuhelesia tsikhabi mukoosi akamukhola.

¹⁹“Mwahulile OMWAMI Nyasaye wenywe ebikulanda bieshisaatsa bietsing'ombe nende amakondi kenywe. Ebikulanda bietsing'ombe tsienywe mulabikholele emilimo noho kata okhuteta ebikulanda biamakondi kenywe obukoya tawe.

²⁰Buli khumuyika inywe nende abetsinzu tsienywe mulabilitsanga imbeli ewa OMWAMI Nyasaye wenywe habundu hamwahulila ahokhumwinamila.

²¹Nebutswa nibiba nibilikhwo nobulema bwosi bwosi, nibitiechelenga, noho nibiabofula noho nibilikhwo nobulema bundi bwosi bwosi mulabimala khulwa omusango okwa OMWAMI Nyasaye wenywe tawe.

²²Ebienebino mulabililanga mungo mwenywe, mulabilitsanga mwesi abasiiyikhu nende abalali abasiiyikhu ta, shinga olwa mulitsanga imbongo nende shitsusu.

²³Ne shimulalie amatsayi kabio shinga eshiokhulia ta, habula mukatatsie hasi shinga amaatsi.”