Read wanga OKHUKALUSHILA MUMALAKO KA MUSA 16 Bible Online

OKHUKALUSHILA MUMALAKO KA MUSA 16 - wanga bible

OKHUKALUSHILA MUMALAKO KA MUSA 16

¹“Muhelesinjie OMWAMI Nyasaye wenywe oluyali khulwa okhulia lisabo lia Pasaka mumwesi kwa Abihu,[3] shichila eshilo shiomumwesi okwo OMWAMI Nyasaye yamurusia Misiri.

²Mutsitsenje habundu aha OMWAMI Nyasaye wenywe amwahulila khulwa okhumwinamilaho, ne nimuhanilaho ing'ombe noho likondi khulwa okhulia lisabo lia Pasaka.

³Olwa mulia eshiokhulia eshio, mulaliekhwo emikaate chilimwo limela tawe. Khulwa tsinyanga musafu mulalitsanga emikaate chibulamwo limela, nichio emikaate chiobusandibwi. Mukholenje murio khulwa okhwitsulila mbu, mwarula mushialo shia Misiri matetekhana. Ne olwa mukhola murio mwitsulile inyanga yamwarulilakhwo Misiri.

⁴Limela lilanyolekhakhwo mutsinzu tsienywe khulwa tsinyanga musafu etsio tawe. Khandi inyama yamuba nimukholeele omusango khunyanga yambeli khungoloobe yilatong'akhwo yakona okhuula nyanga yilondakhwo tawe; muchilie yosi eshilo eshio.

⁵Mulahanilekhwo omusango kwa Pasaka mumatookho aka OMWAMI Nyasaye wenywe amuhelesia okhumenyamwo tawe.

⁶Habula mulakuhanilanga habundu aha OMWAMI Nyasaye amwahulila mbu, mumwinamileho, ahene yaho muhanilenjeho omusango kwenywe khungoloobe, eliuba niliyeela, khubise shinga ebia mwarulilakhwo Misiri.

⁷Muteshe inyama eyo nimuchilila habundu aha OMWAMI Nyasaye amwahulila yaho, ne olwa bushia mukalukha ingo wenywe.

⁸Khulwa tsinyanga tsilondakhwo tsisasaba mulitsenje emikaate chibulamwo limela, ne khunyanga yomusafu mukhung'anenje halala okhwinamila OMWAMI Nyasaye wenywe, khunyanga eyo mulakholakhwo omulimo kwosi kwosi tawe.

⁹“Mubalenje amachuma musafu okhurula khunyanga yamuchaka okhuchesa imele,

¹⁰ne mulie lisabo lielichesa. Khulwa okhuhelesia OMWAMI Nyasaye wenywe oluyali, mumurereele eshihaanwa eshia beene muchama okhumuhanila, obunji bwashio bulalondana nende obunji bwelichesa elia OMWAMI Nyasaye aba nakhunyalile.

¹¹Mwikhoye nimuitsaatsahala imbeli ewa OMWAMI Nyasaye wenywe nabaana benywe, nabakholi benywe, nende Abalawi abamenya ninenywe, nende abarende benywe nende ababisandu, nabakhasi abalekhwa abamenya mumatookho kenywe. Mukholenje kano habundu aha OMWAMI Nyasaye wenywe amwahulila okhumwinamilaho.

¹²Mwitsulilenje mbu mwali abasumba mushialo shia Misiri, mana mukhole akemulachilisinjia kano koosi.

¹³“Olwa muba nimwakhabunjelesia imele yenywe okhurula mulwanyi lwokhuhulilamwo, nende idivai yenywe okhurula mushitinyilo shiayo, okhuula mukhole lisabo liamatili khulwetsinyanga musafu.

¹⁴Mwikhoye nimutsaatsahala olwa mulia lisabo elo nende abaana benywe, abakholi benywe, nende Abalawi abamenya mwinywe, abarende benywe nende ababisandu, nabakhasi abalekhwa abamenya mumatookho kenywe.

¹⁵Muhelesinjie OMWAMI Nyasaye wenywe oluyali khulwa okhulia lisabo elo tsinyanga musafu, mulilenje habundu aha OMWAMI Nyasaye amwahulila okhumwinamilaho. Mwikhoye shichila OMWAMI Nyasaye wenywe yara tsikhabi mwichesa lienywe nende mumilimo chiemikhono chienywe.

¹⁶“Abandu beshisaatsa belihanga lienywe boosi okhuula benamile OMWAMI Nyasaye wenywe okhuula khataru khumuyika, batsitsenje habundu aha amwahulila hokhumwinamilaho, khundukho yelisabo lia Pasaka, lielichesa nende liamatili. Ne shibalatsia imbeli ewa OMWAMI Nyasaye amakhono amakhaya tawe.

¹⁷Buli mundu areere eshihaanwa okhulondana nende shinga OMWAMI Nyasaye wenywe aba namunyalile.

¹⁸“Mulobole Abayaasi nende abasinjilili babandu mumatookho aka OMWAMI Nyasaye wenywe amuhelesia koosi. Abandu bano betsa okhukhalachilanga abandu eshiina shiahabwene.

¹⁹Abayaasi bano balashiamia obukhalachi ta, balakholanga ebiela mubandu noho kata okhufuchilila eshiomufuusi tawe; shichila eshiomufuusi shibofusinjia abachesi tsimoni, khandi shishiaminjia amakhuwa kabalunjishi nishichila nibakhalachila abandu eshiina obubi.

²⁰Mukholelenje abandu aka habwene konyene buli lwosi, kho mbu mulibukula nende okhumenya mushialo eshia OMWAMI Nyasaye wenywe amuhelesinjia.

²¹“Olwa mukaasia eshimalilo shiemisango eshia OMWAMI Nyasaye wenywe, mularekhwo halubeka washio eshiefwanani eshibaatse shiomunyasaye Ashera tawe.

²²Khandi mulasinjisiakhwo isiilo yamachina khulwa okhwinamila abanyasaye bandi ta, shichila OMWAMI Nyasaye wenywe yasila ebio biosi.”