Read wanga OKHUKALUSHILA MUMALAKO KA MUSA 17 Bible Online

OKHUKALUSHILA MUMALAKO KA MUSA 17 - wanga bible

OKHUKALUSHILA MUMALAKO KA MUSA 17

¹“Mulahanilakhwo OMWAMI Nyasaye wenywe omusango kweing'ombe noho likondi lili nobulema kata obubi bwosi bwosi ta, shichila eshio neshisinyo khu OMWAMI Nyasaye wenywe.

²“Nimuba nimuhulila mbu elala khumatookho aka OMWAMI Nyasaye, Nyasaye wenywe amuhelesia lilimwo omundu omusaatsa noho omukhasi oukholanga amakhuwa amabi imbeli ewa OMWAMI Nyasaye nafunaka indakanoye,

³khulwa okhukhalabana nende okhwinamila abanyasaye bandi noho eliuba, noho omwesi noho tsing'ining'ini ebia ndamukaya,

⁴nimuhulila likhuwa shinga elo, murebelesie obulayi. Ne nimunyola mbu, neliatoto khandi limanyiishe obulayi mbu eshindu eshibi shirio shiekholekha mu Isiraeli,

⁵okhuula mubukule omundu oukholile likhuwa libi elo mumurusie elwanyi welitookho mana mumulase namachina afwe.

⁶Kata kario omundu oyo okhuula yeerwe nikaba mbu, abandu babili noho bataru bakhola obuloli khuye. Nebutswa naba nali omundu mulala yenyene oukhola obuloli khuye, omundu oyo aleerwa tawe.

⁷Abakhola obuloli khumundu oyo, babe abokhuranga okhumulasa amachina, mana olunyuma abandu bandi boosi balondekhwo. Munjila yino nolwa mularusiaho obubi obwo mwinywe.

⁸“Abandu nibareerela Abayaasi benywe amakhuwa amatinyu okhukhalaka shinga akokhumanya oukhoyile okhubukula omukabo, noho akokhusalisania emibili, noho akokhwahukhasia hakari hokhwira khwachiminiayo nende okhwira khwokhwitsukhana; mutsitsenje habundu aha OMWAMI Nyasaye wenywe amwahulila hokhumwinamilaho.

⁹Habweneho muboolele abesaaliisi boluyia lwa Lawi babanibaliho mubise ebio, nabo balamukhalachila amakhuwa ako.

¹⁰Balamukhalachila, nenywe mulakhola shinga olwa baba nibamukholele.

¹¹Mufuchilile akobukhalachi bwabwe. Mulakholekhwo akandi akahukhane nende akabamuboolela tawe.

¹²Omundu yesi oukhaya okhuhulila aka Abayaasi noho akabesaaliisi bakhalabananga imbeli ewa OMWAMI Nyasaye, okhuula yerwe. Munjila yino nolwa mularusiaho obubi obwo mu Isiraeli.

¹³Mana abandu boosi balahulilakhwo ne baria, ne omundu undu shialitsaalikhakhwo ario tawe.

¹⁴“Olwa muba nimwakhabukula eshialo eshia OMWAMI Nyasaye wenywe amuhelesinjia okhuba eshienywe, ne bulano muboola muri, ‘Khularaho omuruchi akhuruche shinga amahanga kandi akakhubotokhane.’

¹⁵Toto mwene omundu owamwahula okhumuruka abe owa OMWAMI Nyasaye yaahule. Okhuula abe mulala khubolwibulo lwenywe. Mularobola mulala khubarende benywe okhuba omuruchi wenywe tawe.

¹⁶Omuruchi tsana alebunjishila tsifarasi khulwa okhulwana noho okhuruma abandu Misiri okhukula tsifarasi ta, shichila OMWAMI Nyasaye yamuboolela ari; ‘mulakalushekhwo eyo khandi tawe.’

¹⁷Omuruchi oyo alateeshia abakhasi abanji ta, shichila balachila ashiukhane okhurula khu OMWAMI Nyasaye. Khandi alebunjishila obuyinda bweifetsa nende itsahabu tawe.

¹⁸Olwa yemekhwa okhuba omuruchi, ne niyekhasibwa khushifumbi shioburuchi, okhuula abe neshitabu shiamalako nende ameechesio aka Nyasaye okhurula khumalako akambeli akabesaaliisi aboluyia lwa Lawi babiikha.

¹⁹Abetsenje neshitabu eshio nashisoma tsinyanga tsiobulamubwe tsiosi, kho mbu yeeche okhuhelesinjia OMWAMI Nyasayewe oluyali nende okhulonda amakhuwa koosi akalachilisibwa mushitabu eshio.

²⁰Ako kalachila aleshe okhwilola mbu nomukhongo okhushila Abaisiraeli bashie ta, khandi aleshe okhufunakakhwo amalako aka OMWAMI Nyasaye tawe. Nakhola ario, omuruchi oyo alaruka oluhoono, khandi abolwibulolwe balatsiililila okhuruka Isiraeli khulwemiyika eminji.”